[人性] [感情事]我不會講你知，其實是第幾次: 琪琪朋友 - Kary

我都唔知點解樂仔可以識咁鬼多幼齒。 
晏晝佢已經話我聽佢識一個琪琪既朋友。 
佢約左人地聽日去街，仲嗌埋我出去。 
呢個機會我點可以錯過呢？ 

第二日一早，我就換好哂衫，出左去尖沙咀搵樂仔。 
佢一早已經到左，仲同個女仔係M記食緊早餐。 

"早晨。" 



"喂早呀。同你介紹先。呢個係Kary。 
呢個係Hugo。今日佢咁岩冇野做，你唔介意佢一齊出黎玩呀可？"樂仔問Kary。 

"Hello Hugo。唔介意呀一齊玩仲開心。" 
雖然Kary咁講，但係佢好似有少少不悅。 
我諗一定係我打亂左佢同樂仔既二人世界。 
Kary 唔係好高，有少少Baby Fat；不過佢係個種睇落好需要人保護既女仔。 

我地之後去左海港城行街。 
一路我地都閒話家常，我亦都唔急於同佢提起琪琪既事。 



睇住Kary望住樂仔既眼神充滿住傾慕， 
我突然覺得有少少內疚。 
我清楚樂仔份人，Kary佢就應該睇唔上眼架喇。 
佢根本唔鍾意俾人管，加上佢咁多狂蜂浪蝶，我好難想像有人可以治到佢。 
如果唔係幫我，我諗佢甚至唔會同Kary出街。 

好快到左食飯既時間，樂仔去左廁所，我就借呢個機會同Kary傾下。 

"係呢，我都識你地FORM既人架。你知唔知邊個係琪琪？" 



"琪琪？你居然識佢？佢好少男仔朋友架喎。你中意佢？"　Kary碌大對眼望住我。 

"係呀我識佢呀。唔好話中意，做個朋友咁啦。 
你咁了解佢，你同佢應該好熟咁喎。"我明知故問。 

"OK啦，我同佢都算幾好傾咁啦。做咩呀想借我過橋呀？" 

丫，呢條女又幾醒目。 

"唔好咁講。咁岩見你有Common friend，問兩句姐。 
不過我聽佢個呢排有個男仔成日煩住佢喎。" 

"佢連呢樣都有同你講?係呀，佢成日都黎我地班搵佢，都真係幾煩既。" Kary滿臉疑惑。 
聽佢咁講，似乎Kary對佢都冇乜好感，應該可以拉攏佢。 



就係咁，我拎左Kary msn，以便同佢打好關係，收集情報。