[人性] [感情事]我不會講你知，其實是第幾次: 復合大計

我將全副心機放哂係氹番Stella既計劃上。 
希望可以為我做彌補我做錯左既一切。 
萬事俱備，只欠東風。 

我拎起電話，望住Stella既號碼。 
既熟悉，又陌生。 
我猶豫左一陣應該點開口。 
算啦，諗到咩就講咩啦。 

"你所打既電話已經暫時停止服務。請查清楚再打過啦。 



我皺一皺眉，點解會停止服務既？ 
我打錯左電話咩？ 
冇理由呀，我係電話簿直接禁架喎... 

"唔通佢避開我？"我腦海閃過一絲既念頭。 

冇理由既！佢咁愛我，一定係等緊我氹番佢！ 
搵下Candy問下先！ 



"你又想點呀賤人？" 

"唔好鬧我住啦Candy姐！我知錯喇我想氹番Stella呀！ 
但係唔知點解佢電話唔通呀。" 

"你唔洗指意係我身上問到少少資料。 
何況，我講明先，我絕對唔支持Stella同番你一齊。" 

寧教人打仔呀Candy！ 
如果唔係你係Stella個好朋友，又係樂仔女人，我一定開火鬧爆你。 



"唔好咁啦Candy！我都知我衰架喇！ 
求下你幫下我啦！" 

"冇得傾，係咁！拜！" Candy咁就收左我線。 
我真係諗唔通點解Candy會咁決絕... 

呢個時候，唯有搵樂仔啦。 

"樂哥！！！小弟既終生幸福靠哂你喇！ 
你幫下我啦！！！" 

"唉你估我冇幫你咩？ 
我一早係咁同Candy講好說話啦。 
我都唔明點解佢咁堅決，連我都冇面比。 


我地都因為呢樣野嘈左幾次呀！ 
我再幫你問多佢一次啦..." 

"拜託哂你！"我唯有收線啦。 

呢個時候，我收到一個message。 
一個陌生既號碼。