[人性] [感情事]我不會講你知，其實是第幾次: Year 1完結

我離開左之後，一直都冇再同火車姐姐聯絡。 
無他既，我接受唔到我好朋友厄我， 
仲要當我係一隻棋。 

究竟火車姐姐一直都係咁攻於心計？ 
定係佢漸漸變成咁？ 
我都無興趣去深究。 

經歷左呢件事之外，我多左一份防備，少左一份信任人既心。 
當然除左樂仔呢個好兄弟。 


我連佢都唔信既話， 
呢個世界都冇人信得過。 

Year1 餘下既生活都係平平無奇。 
我間唔中會搵樂仔食飯， 
睇下佢同Candy過成點。 
聽到一切安好我都好放心。 
我都會八卦下Stella既近況。 
暫時都係相安無事。 



至於琪琪，我偶爾都會同佢傾下計。 
佢同Philips離離合合。 
佢心情唔好就會搵我傾計， 
同Philips冇事既，我搵佢都會唔理我。 
呢舖真係鐘無艷。 
我都有諗過恨下決心，唔再理佢。 
不過佢每次搵我我就會心軟陪佢。 

基本上我同Ada都係形影不離。 
番學放假都一齊。 


連樂仔都收到風，問我係咪同佢一齊。 
既然樂仔都知道，我諗Stella知道都唔係一件出奇既事丫。 
不過坦白講，比起一年前，我對Stella既感覺都已經愈黎愈少。 
間唔中會係半夜諗起同佢一齊既事囉。