[人性] [感情事]我不會講你知，其實是第幾次: Ada前男友 (2)
"不如我地搵個地方傾下計？"
我提議。
"嗯。"
我地兩個走左去starbucks，幾經辛苦終於有位坐。
"點解你覺得自己仲未放低？"
我劈頭就問。
"唔知呀...我見到佢之後又諗番起以前同佢既事。
成個日好down...我發現我情緒好受佢影響..."
Ada愈講愈細聲。
"會唔會係你未習慣冇左佢？
又或者，佢只係見到佢之後諗起d唔開心既事？"
我嘗試開解佢。
"我成日有一絲覺得佢當日個番說話唔係認真。
我心底入面有少少希望佢仲係中意我。
唉，我覺得我好犯賤。"
睇黎佢前男友係佢心目中都仲唔係衰得哂。
"唔可以咁講既，慢慢黎啦。
有朝一日，你會放低佢架。
只係新個個未出現姐。"
"或者啦。但係你知道唔容易架。
你自問放低左Stella未先？"
"咁又點同。
個男人拖欠你。
而我係拖欠人個個。"
呢一刻，我地都冇出聲。
因為我地明白，拖欠人又好，被拖欠都好。
我地都係受傷既一群。
呢一刻，我好想將Stella完全放低。
"黎，番去沖個涼先。
沖完涼我帶你去個地方！"
我心生一計，向Ada提議。