[人性] [感情事]我不會講你知，其實是第幾次: 紋身既女孩

我同Ada就係咁，係呢個暑假既時間， 
遊遍左港九新界。 
迪士尼，山頂，赤柱，長洲等等都有我地既足跡。 
漸漸，我地建立左默契。 
漸漸，我地不可或缺。 

直至有一日，我地之間出現左考驗。 

八月下旬，酷熱天氣警告無阻一班大學生進行迎新活動。 
我今年既角色，已經由新生轉為組爸。 


Ada今年冇參與，佢話佢唔想冧到班仔仔暈哂大浪喎。 
而我個組，男仔就正正常常；女仔就青春無敵囉。 

其中一個女新生特別引起我注意。 
唔係佢外表特別出眾，而係我見到佢心口左邊有個玫瑰紋身。 
恕我保守，我唔係太中意女仔有紋身係心口呢d位置。 
當然，呢d係人地私事，我都唔會過問。 

我真正同佢有一對一交談，係ocamp後既一次聚會。 
話說大家都仲未到既時候，我同佢係最早到。 



"Hugo爸爸，咁早既？"Rose問我。 

"係呀，頭先係附近行緊街之嘛。你又咁早既Rose？" 

"我不嬲準時架啦！話時話，原來大學生活同中學咁唔同。 
我好多野都唔識呀！"　Rose一臉無知。 

講下Rose既外表先，佢唔係太高，對眼好大，齊陰。 
其實佢個樣唔係太似香港人，有少少鬼鬼地。 



"唔識咪慢慢學囉！我地好多人都幫到你架！" 
當然，有一班餓狼組爸，佢地點會唔教你。 

"靠你地喇！我有咩會問你架喇Hugo爸爸！" Rose好似好興奮咁。 

"無任歡迎。" 

我地交換左電話，不過彼此都知道頭先係寒暄既說話， 
所以都冇搵過大家。 

直到有一日，Rose冇啦啦話約我出去，想問下我功課喎。