[人性] [感情事]我不會講你知，其實是第幾次: 番香港

原來琴晚既事我只係發夢。 

"呀又幾鬼真實喎。"我望住眼前既Ada心諗。 

Ada叫醒我之後，我地就開始動身執野， 
準備出發去機場。 
由於我地冇上網check in， 
結果去到機場就只係分配到中間機位靠近走廊既位置。 

由於只係好短既機程， 


除左Ada會埋怨下點解冇得坐窗口位外； 
我地係到睇下戲咁， 
好我地已經番到香港國際機場。 

"喂，衰人。你係到黎香港之後會唔會唔要我？"　Ada 搣左我手臂一下。 

"痴線做咩番左黎就唔要你？" 

"冇呀。當初你應承同我黎日本，都係為左令我忘記個個男人。 
咁而家都番左黎啦，你會唔會同我分手架？" 我都分唔清楚Ada係講真定講笑。 



"我同你一齊係想睇住你呢個白痴妹架嘛。 
廢事有人以後呢係廁所都喊冇人理啦。" 

"死賤人！窒少我一陣駛死咩你？" 

雖然Ada把口係咁鬧我，但係佢係笑住咁鬧。 
或者Ada係當我係佢前男友先同我一齊， 
又或者我係出於同情先同Ada一齊， 
不過呢一刻，我相信佢同我一樣覺得幸福快樂。 



我地好快排隊入左境，去左等行李。 
而我又要講多次，呢個世界真係好細。 
因為，我見到Stella，同樣等緊行李。 
我諗佢望我唔到，由於Ada亦都係到， 
我決定扮見唔到佢就算，廢事尷尬。 

不過我覺得個天一定係高登花生友，中意睇戲。 

"咦？Stella喎！" Ada同我講。