香港都市傳說三：無法逃離的上環地鐵站: 小小後話及宣傳

故事嚟到呢度，總算叫做完滿落幕

寫呢個故事途中，身邊剛好出現了一些變化

不得不承認，那變化某程度上，對我創作係有影響嘅

而最實際嘅影響，就出後期創作嘅時間非常緩慢，保持唔到一日一篇

多謝各位嘅體諒，最終我先能夠完成呢個作品

今次嘅故事究竟係好係唔好呢，就留畀大家去評價啦

我自己寫呢個故事嘅時候，投放咗好多心力，中間出現咗一堆好似Bug嘅嘢

其實係為咗最後結局嘅鋪排

個人嚟講，尚算滿意

其實喺出呢篇傳說之前，都有猶豫過，始終地鐵故事，其實有好多人已經寫過

當中篤姐（楝你個篤）寫咗好幾個地鐵站

而無默媽嘅西營盤，更加係將會拍埋戲添

出之前都好驚啲人會話我抄橋呀，或者「屌，咪又係咁」

好彩出到嚟嘅效果比我想像中好好多，我已經好安慰

講返個故仔，其實每個都市傳說背後，除咗懸疑恐怖之外，都總會有啲嘢想表達，不過感受到啲咩，就交返畀大家去感受啦

我反而想講，呢個故事去到最後，阿朗其實一直用兩個人格去生活，甚至製造出幻覺，等自己能夠生活得輕鬆啲，某程度上，我係將自己嘅平日嘅觀察，放咗落去而成就咗阿朗呢個角色

作為香港人，煩嘅嘢已經夠多，所以偶然做出一啲行為，等自己輕鬆啲生活，睇起上嚟係無可厚非

但如果，當我哋煩惱到一個地步，需要創造幻覺，需要去到自己呃自己先過活到嘅話，咁就要好好注意下啦

雖然自己呃自己嘅生活，可能會好似阿朗咁，其實無影響到其他人，但係，當你夜欄人靜，諗起自己嘅生活，又突然發現自己係自己呃梗自己，我相信感覺一定唔會好受

希望大家可以做返自己，唔駛自己呃自己都可以繼續開心生活，有問題嘅就迎刃而解