[真人真事][校園][純愛]《最陌生的人，就是曾經最熟悉的人》: 第十二章

真心講
其實溫書都係其次,
最主要都係同呀琳相處啫
除左我鍾意佢之外,
同佢相處真係好舒服
唔計由細識到大嘅Candice,
由小學到依家,
咁多個女仔入面以呀琳最投契
當然樣方面都係最靚啦
唔好話靚喇,


應該話係最吸引到我先啱
咁放左學,
原本想喺學校圖書館溫書,
點知學校圖書館好鬼多人
插針都插唔入
咁咪唯有退而求其次
原本諗住去m記嘅
點知m記有好多細路仔喺度嘈
就算我地忍住啲聲溫呀,
都唔入腦啦


正當我地唔知去邊度溫好,
呀琳一言驚醒洛克人
係喎
點解我諗唔到嗰個地方可以溫書呢,
實有位不特止
仲要好靜
至於嗰個地方係邊度?
答案就係上次食蛋糕嗰個天台

講開又講,


呢個天台真係俾左我好多回憶
讀中學嗰陣成日同呀琳一齊上嚟
放心,
我地冇做啲衰野,
上親嚟都係溫書,食野,傾計
一般中學生做嘅嘢
嗰陣我以為我同佢日後仲有好多機會一齊上嚟,
以為我地可以喺度渡過會考,生日,高考,畢業等等人生重要時刻,
但原來只係以為嘅啫,
好似講遠左少少,
返返嚟先
我同呀琳就上左去天台,
好彩呢個天台冇mk仔
如果唔係呀琳實俾人溶左都似
咁我地就坐喺度溫書,


初初我地坐喺度各自各溫
咁各位巴打絲打都知道,
有時溫耐左,
專注力就梗係下降架啦
我從來就唔係一個專注力好高嘅人
加上坐我隔離嗰個係呀琳
溫溫下就不其然望左隔離
近望佢仲加靚
皮膚好幼嫩,
加上本身膚色又係好白
呀琳:「望住我做咩呀
有野唔識呀 」
死火,
俾佢發現左我望住佢
我望得太入神,


我:「係呀
呢度唔識呀.」
梗係扮有野唔識啦
費事俾佢知我真係望住佢
呀琳:「哦,
呢度好簡單咋嘛,
你先咁咁咁再咁咁咁就計到架喇 」
我:「真係有補習架喎.」
呀琳:「梗係啦,
似你咩,
補完咁快就唔記得 」
我:「唔係咁快就唔記得,
係呢條唔識啫 」
呀琳:「即係我問你第二條就識啦 」
我:「廢話,


梗係喇 」
呀琳:「咁呢條又點計呀 」
死喇又唔識計添......
呀琳:「咪咁計囉,
嗱你先咁咁咁再咁咁咁就得架喇 」
我:「我都知,
俾你快左一步講咋嘛 」
呀琳:「實係咁啦 」
我:「夠膽就整多條.」
呀琳:「就呢條啦.」
嘩呢條都好難喎
我:「俾我諗下先.」
諗左一陣都係唔識
呀琳:「嗱你先咁咁咁再咁咁咁就得架喇 」
結果成日就係好似呀琳幫我補習咁樣,


佢問一條,
我就唔識一條
之後佢就講點樣計,
呢個動作重複左好多次
不過好奇怪,
平時啲老師講極我都唔明
但聽呀琳講就好易明
可能係我平時冇專心,
又或者係佢教得好
不過有人話過,
愈鍾意一個人,
就愈留意嗰個人講嘅嘢
可能呢個係原因掛
咁大家都知,
十月尾十一月頭好快就天黑
六點零就開始黑喇,
咁天黑就睇唔到野架
所以我地就落返去啦
原本想去m記繼續溫,
點知m記仲係好多人
呀琳:「咁多人不如返屋企啦.」
我:「好呀.」
呀琳:「一係我地夜晚傾電話搵好冇 」
我:「唔好喇,我驚阻到你 」
呢句係我真心說話嚟,
雖然咁樣我係可以拎佢個電話,
但好驚會對佢做成不便
點知佢話,
呀琳:「唔會呀,
我幫你溫嘅話我自己會記得仲入腦
俾我電話你喇,
xxxx xxxx.」
就係咁,
我就抄左佢牌喇
呀琳:「記住今晚打俾我呀
唔係唔識嘅話冇人可憐你
我全晚都得閒呀,
不過最好唔好咁夜啦 」
我:「好 」