[真人真事][校園][純愛]《最陌生的人，就是曾經最熟悉的人》: 第十九章

說時遲那時快,
又到禮拜六喇
平時嘅禮拜六,
我呢啲小毒勁梗係留喺屋企啦
都冇人約
不過今個禮拜六就唔同喇
事關呀琳約左我買鋼琴
原本佢話唔想我咁辛苦,
買完要自己拎返佢屋企嘅,
不過我地嗰日問琴行,


佢地話送貨要加幾多錢
本來呀琳都話加就加
但係萬一加左錢送貨,
我點樣做威水呀
所以決定死就死啦
最多都係重一陣
好彩嗰間琴行會提供一架板車俾我擺部琴上去
板車即係好矮身,
下面有四個轆嗰啲車
咁我地相約喺禮拜六嘅朝頭早


順便食早餐
佢朝頭早就已經好開心
成朝喺度笑咪咪
我:「你睇你個樣,
出賣晒你心情喇 」
呀琳:「咁係丫嘛
我恨買恨左好耐 」
我:「部琴真係好靚 」
呀琳:「係呀
啲音色又啱我 」


我:「買左記住彈俾我聽 」
呀琳:「其實你真係覺得好好聽 」
我:「係呀
唔係氹你 」
呀琳:「多謝你呀
你知唔知一個彈琴嘅人,
最開心就係有人鍾意聽佢彈琴 」
我:「我冇諗咁多呀
淨係覺得好好聽 」
當然我冇同佢講,
我其中一個鍾意聽嘅原因,
係佢彈嗰陣個樣好吸引,好迷人
不過事實上真係好好聽
呀琳:「多謝呀 」
我:「一陣我幫你拎,


係咪又要講多次多謝 」
呀琳:「係呀,
你真係醒
多謝多謝多謝,嘻嘻 」
之後我同佢就向住目的地進發,
去到琴行
就梗係拿拿聲買琴
部琴都唔平
成五位數
定其實係正常價位
冇計我見識少
呢方面靠巴打絲打講下喇
之後就搬左佢上去板車度,
呀琳:「好野終於買到嚕 」
我推推下,


見到呀琳又一齊推
我梗係制止佢
喺我角度睇,
每一個男仔或者男人,
如果係真心鍾意一個女仔,
你一定唔會想嗰個女仔辛苦
無論係乜程度嘅辛苦都好
寧願辛苦嘅係自己
我呢個諗法直至今時今日都冇變
我:「唔使喇,
你負責行就得喇 」
呀琳:「好重呀
我幫你手啦 」
我:「你要幫手嘅,
一陣就彈返首歌俾我聽


咁就最幫手喇 」
呀琳:「嗯 」
呀琳講完之後,
面上掛左一抹淺笑
不厭其煩地講多次,
真係好靚

終於行到去佢屋企,
原本想話搭巴士嘅,
不過攞住部琴上巴士好麻煩
所以最後都係行
我:「都唔係好遠啫
平時你咁死懶架
咁近都唔行 」
呀琳:「嘻嘻


懶得就懶丫嘛 」
不過話晒我都係第一次上女仔屋企,
點都有啲緊張
搭𨋢嗰陣呀琳同我講:「唔使咁緊張喎 」
我:「我未試過上女仔屋企架...... 」
呀琳:「我都睇得出
如果唔係就唔會咁驚啦 」
一出𨋢佢都仲未拎條鎖匙出嚟
我:「做乜唔拎鎖匙開門呀 」
呀琳:「屋企有人開咩門 」
我:「下有邊個呀 」
呀琳:「我媽咪囉
不過放心喎,
佢好玩得
唔使驚 」
估都估唔到,
原來佢媽咪會喺現場
呀琳:「其實呢佢好快就出去
唔驚唔驚 」
我:「信晒你啦 」
之後我就正式踏入呀琳屋企,
當時仲暗自ff係咪見家長