[真人真事][校園][純愛]《最陌生的人，就是曾經最熟悉的人》: 第二十四章

有一晚呀琳打嚟,
呀琳:「樂仔我聽日去旅行喇
要咩手信 」
我:「你話事啦
你覺得靚咪得囉
不過最好係飾物 」
呀琳:「依家係你要唔係我要喎
我唔知你要啲乜 」
我:「得啦,我信晒你 」
呀琳:「你話架


唔準唔要呀 」
我:「一定唔會唔要 」
呀琳:「我聽日早機呀
返嚟先再講啦,
拜拜 」
我:「拜拜 」
點解我想要飾物呢
其實係有原因
因為我覺得飾物係一樣實實在在存在嘅野
當然,


食物都係存在嘅野,
不過食物唔可以保留咁耐
又唔可以唔食喎
冇理由為左保留而浪費食物架嘛
咁樣係本末倒置,
反而一件飾物就可以保存好耐
到我第日可以回味返中學生涯
或者係回味同呀琳相處嘅日子,
都可以有一樣野
證實我曾經係有呢段生活


唔係我自己空想出嚟
我覺得咁樣先最重要
當然冇左呀琳嘅聖誕,
實質影響又唔係真係話好大
我只係過返早幾年嘅生活啫
得閒打個丁
又或者同frd打下機
再唔係咪聽下lonely christmas囉
死唔去嘅
唔知呀琳去日本玩咩呢
唔緊要啦,
下年聖誕,
又或者跟住落嚟嘅聖誕
我總有機會同呀琳一齊過
當時嘅我係咁諗



去到平安夜嗰晚,
我特登自虐走去聽lonely christmas
我發覺,
呢首歌喺聖誕節嗰陣聽係有加成
平時聽都唔算話有好大問題
一去到聖誕節前後聽就出事喇
嗰種空虛感,寂寞感出晒嚟
正當呢啲情緒陪著我嗰陣,
手機無啦啦響起嚟
咁我就拎起個手機聽啦
我仲諗緊邊個喺度煩我嗰 ,
就聽到一把我好掛住,好鍾意嘅聲音
只係幾日冇聽過
就已經開心到不得了


睇嚟我都係自欺欺人
其實冇左呀琳嘅聖誕,
實質影響可能係大到我自己都唔知
呀琳:「聖誕快樂呀樂仔 」
我:「今日好似係平安夜咋喎 」
呀琳:「我呢邊已經十二點喇 」
我:「係喎,
唔記得左日本同香港係有時差
我仲未到25號呀 」
呀琳:「我打嚟同你講聖誕快樂
點解你冇表示嘅 」
我:「係喎
聖誕快樂 」
呀琳:「做緊咩呀 」
我:「上緊網囉 」


我梗係唔會同佢講,
我喺度掛住佢
同埋聽緊lonely christmas
呢啲說話實在講唔出口
呀琳:「好悶呢冇人同你傾偈 」
我:「少少啦.」
呀琳:「明明就唔只少少 」
我心諗你又幾醒喎
我:「係喇係喇
唔只唔只 」
呀琳:「嘻嘻
好快到除夕啫 」
我:「係呀 」
講就話係啫,
其實一個禮拜可以好短可以好長


睇下你點睇
如果係開心嘅
一個禮拜其實好短,
但如果好似我依家咁
等緊呀琳返嚟
就變得好長好長
特別係你每過一日,
就數住仲差幾日先到除夕
嗰下啲時間先漫長
呀琳:「好喇
我呢度打返嚟俾你都唔平
返到嚟搵你啦拜拜 」
我:「好啦,
你返到嚟香港就搵我啦,
拜拜 」
我梗係有少少開心啦
呀琳專登打返嚟俾我,
係咪反映緊我喺佢心目中有一定嘅地位
我唔知,
亦都唔敢去諗,
與其係咁,
不如我自己對呀琳專登打返嚟俾我呢件事暗爽算
我相信每個男仔都有呢啲時間
就係會為一件微不足道嘅事而興奮
嗰件事如果係第二個做,
你會覺得冇乜野,
唔會因為咁而開心,
但如果嗰件事係由你鍾意嘅女仔做
就會變得心如鹿撞
鍾意一個人真係好奇怪