[真人真事][校園][純愛]《最陌生的人，就是曾經最熟悉的人》: 第二十五章

終於捱過左呀琳唔喺香港嘅聖誕
講起上嚟都有啲搞笑
竟然用"捱過"嚟形容
其實以前我咪又係咁過
嗰陣我都唔會用"捱過"嚟形容
不過今年唔同嘅係,
我同呀琳熟落左好多呀
佢連我啲生活習慣都改變埋
所以話,
鍾意一個人係會令一個人改變


呢句說話我深表同意

喺29號晚,
我個電話響左
屏幕顯示嗰八個數字終於有返啲親切感
日等夜等,
就係等緊嚟八個數字嘅主人打俾我
呀琳:「返嚟喇 」
我:「終於返到香港嗱 」
呀琳:「有人好似等左好耐喎 .」


我:「冇呀,
邊有
係咪你錯覺 」
呀琳:「算啦
有人唔認就算啦 」
唔知各位巴打絲打有冇一個感覺
就係當你關心一個你愈重視嘅人,
嗰個係情人又好,親人又好,朋友都好,
你就愈唔想俾佢知道你關心佢
唔知點解,


至少我係咁
我:「好唔好玩呀日本 」
呀琳:「好玩呀
啲景好靚
同埋啲日本野食好正
不過我覺得香港啲甜品好食啲 」
我:「唔係呀話
你出到去都仲掛住食甜品 」
呀琳:「唔得咩 」
我:「食咁多好野因住肥死你 」
呀琳:「你恨唔到架喇
食極都唔肥,呵呵 」
我:「冇人同你講啫 」
呀琳:「我知你又想講大話呃我呀
鬼信你呀 」


呃唔到佢添
我:「去完旅行返嚟醒左喎 」
呀琳:「不嬲都咁醒
似你咩咁蠢 」
我:「我又點蠢呀 」
呀琳:「好蠢好蠢呀 」
以前呀琳成日都話我蠢
當時我真係唔知衰乜野
要成日話我蠢
我:「最醒係你喇
得未 」
呀琳:「嘻嘻
係喇,
手信我買左啦喇
後日俾你 」


我:「咩嚟架 」
呀琳:「後日你咪知囉 」
佢咁講搞到我有啲期待係咩禮物
不過呀琳買得嘅,
應該都唔會差得去邊
呀琳:「都係屋企最舒服 」
我:「梗係啦 」
呀琳:「喂,
好耐冇玩過msn game
依家玩唔玩 」
我:「玩咪玩
不過唔好罰得唔得先 」
呀琳:「有人驚輸喎 」
我:「我驚你俾人罰到成碌葛咁咋 」
呀琳:「實係咁啦


唔罰咪唔罰囉 」
事實證明,
千祈唔好同女仔玩msn game
嗰晚我又係玩幾鋪輸足幾舖

好快就嚟到除夕喇,
我同呀琳相約左晏晝喺屋邨巴士站等
然後一齊出去旺角
話說今次係我第一次喺假期約呀琳出嚟
難免會有啲唔自然
其實我由尋晚已經緊張
唔知呀琳會著成點呀
不過老實講丫,
點著到咁靚
搞到成晚都瞓唔到


有啲似以前小學生時代,
期待去學校旅行咁樣
到左今朝,
出門前係咁照鏡
連涼都沖左幾次
驚有邊度唔係好掂
執完又執,
執左幾次,
又成日聞住自己嘅身
有冇陣味,
好彩冇
如果唔係臭親呀琳就唔好啦
不過嗰日好q凍
所以我著左件羽絨出嚟
鬼叫我本身潺咩
凍啲啲都唔掂
我係極怕凍嗰啲人嚟
所以以往冬天都盡量唔出街
與其落街食風,
不如喺屋企hea好過
不過今日冇計,
除夕呢啲大日子
本來就同我冇乜關係
反正對我嚟講,
都冇乜特別
話就話新一年
其實咪又係過左一日啫
再加上平時呢啲日子都唔會有人主動約我
所以我唔會對除夕放得太上心
但今日呀琳竟然會約我
就算我斷腳
都要坐住輪椅出啦
你話係咪先
我準時去到已經見到呀琳喺度
佢一擰轉嚟,
個心入面淨係得六個字
靚到唔識形容.