[真人真事][校園][純愛]《最陌生的人，就是曾經最熟悉的人》: 第三十一章

新一年降臨,
代表我地嘅聖誕假已經放完
又要返學,
都好嘅
起碼可以見到呀琳
第一日返學嘅小息,
大家都仲記得,
Candice同呀琳都係坐我前面
呀琳更加係坐我嘅正前方,
佢地傾偈我聽到晒


Candice:「呀琳你除夕去左邊度 」
呀琳:「同樂仔出左去 」
Candice:「估你唔到喎 」
呀琳:「你又唔喺度
去咁耐 」
Candice之後望住我
仲要陰陰嘴笑咁講:「去耐啲都好嘅 」
嗰個樣衰到呢
正狗西
不過算啦,


佢起碼都俾左個機會我
不過狗西就一定係架喇
好彩呀琳聽唔明Candice嗰句「去耐啲都好嘅」嘅真正意思
如果唔係就穿晒煲
咁跟住落嚟都冇乜特別野,
又係返下學
星期一,三,五就去補習
補完習就同呀琳行一陣
夜晚就傾下電話
得閒玩下msn game


都冇乜特別,
係有時呀琳會彈琴俾我聽,
佢開住個speaker
之後喺度彈,
不過始終冇真人喺我面前彈咁好
因為我冇得見佢個樣,
不厭其煩地講多次,
佢彈琴個樣真係好靚

我好記得一月裏面有一日好特別
嗰日係星期五嚟,
點解咁特別
因為嗰日呀琳特別冇厘神氣
由返學嗰陣已經係,
之後行去補習社嗰陣都冇變到


補完習喇,
呀琳:「樂仔你有冇野做 」
呢個時候我都feel到少少唔係好妥
所以我打死都話冇野做
我:「冇呀 」
呀琳:「不如上去天台囉 」
我:「好 」
從佢嘅動態,神情話俾我知,
佢應該係出左啲事
我最唔想就係見到佢咁樣
所以我好樂意陪著佢
即使係做狗,
又或者只係一個聆聽者嘅身份都好
我都冇乜所謂
上到天台之後,


我:「係咪有野呀
你想講就講啦
講完出嚟會開心啲 」
其實我就唔識安慰人嘅
不過我見tbb啲電視節目
通常安慰人個開場白都係咁樣
所以就有樣學樣
呀琳:「你唔會嫌我煩呀嘛.」
我:「點會
最怕你唔講
有時唔開心唔好收埋收埋 」
呀琳:「嗯 」
跟住呀琳講左啲野俾我聽,
我聽完之後好驚訝
個故事大約係咁嘅,


原來呀琳依家嘅爸爸,
並唔係佢嘅親生父親
佢嘅親生父親以前對佢媽媽好衰
基本上每次輸馬仔,輸波就會係咁鬧
嚴重起上嚟仲會打佢
所以佢媽媽當時係好唔開心
有次打完佢媽媽仲走埋佬
呢個時候,
呀琳個繼父鍾意左佢媽媽
鍾意到明知佢有個女都肯接受
而當時呀琳只得六歲
佢個繼父當正呀琳係親生,
好錫佢
同時亦對佢媽媽好好
點知近幾日,


佢嘅親生父親無啦啦上左嚟搗亂
話佢周圍勾佬又盛
搞到佢媽媽好唔開心
好彩嘅係,
佢個繼父冇受到影響
冇因為咁樣而怪責佢兩母子
佢媽媽呢幾日心神恍惚,
呀琳見到佢媽媽咁樣
自己又點會開心呢
同埋佢話佢好憎佢親生爸爸
冇養過佢兩母子都算,
仲要無啦啦上嚟
俾麻煩佢地三個人,
我:「嗰個係你親生爸爸喎
真係嬲得落 」
呀琳:「話就話係有血緣關係,
但我同佢都冇乜感情,
以前見佢鬧媽咪同打媽咪,
已經唔係好鍾意佢
不過嗰陣細個唔識咁多 」
我:「睇嚟你都幾恩怨分明
親生都冇情講 」
呀琳:「係架,
所以你第日咪激嬲我呀
我會好嬲你架 」
我:「我點會激嬲你呢 」
呀琳:「咁又係,
嘻嘻 」
我:「笑返咪好囉
頭先你個樣知唔知幾唔掂 」
呀琳:「多謝你肯聽我講呀 」
我:「你咁讚我唔知會點喎
不過每個人都有心情唔好嘅時候嘅,
攞出嚟傾下點都好啲 」
呀琳:「嗯
呢單野唔好同咁多人講呀
原本得Candice一個人知.」
我:「知道喇 」
好彩下個禮拜見到佢開心返
咁就得喇,
鍾意一個人就係咁樣
佢唔開心,
你自己都會唔開心,
縱使佢唔開心嘅嗰樣嘢唔關你事都好,
鍾意一個人最想就係見到佢笑