[真人真事][校園][純愛]《最陌生的人，就是曾經最熟悉的人》: 第三十二章

呀琳心情好返之後
咁我地就繼續平時嘅生活模式
我地始終都係偏向有惰性
生活習慣嚟嚟去去都係嗰幾樣
唔會有咩特別變化
咁去到二月,
就係新年嘅大日字喇
以前新年最期待嘅,
就梗係新年嗰個長假期啦
俗稱叫新年假




不過,
自從今年同左呀琳同班之後,
唔知點解
就唔係好想放呢個新年假
可能因為冇得見掛
同以往好唔同,
以往直情係恨不得個假期快啲嚟
所以話,
鍾意一個人係會改變自己
講開又講,




有時做人真係好諷刺
以前讀緊書嗰陣,
成日都話想放假
唔想返學,
但係到大個左,
就好懷念以前有得返學嘅日子
有嗰陣你又唔珍惜,
依家冇先嚟後悔
咁又何必呢
所以,




仲讀緊書嘅巴打絲打,
要好好珍惜有得返學嘅日子喇
衰啲講句,
每返一日就少一日
一日一日咁過,
其實過得好快
老套啲講
時間從來都唔等人
幾多人想返返去讀書時代都冇咁嘅機會呀,
真係要珍惜呀

今個新年有啲特別
唔知大家仲記唔記得,
小弟係二月二十號生日
咁啱今年嘅二月二十號係大年初三嚟




唔知班契弟俾利是嗰陣,
會唔會大封啲啦
定係索性兩封當一封俾
你知啦,
有啲親戚真係好q縮骨
邊個咁話一定做唔出呀
咁其實我生日就唔係好多人知
一嚟我覺得冇乜特別
本身我唔係話好羨慕要啲乜野禮物
二嚟好少同人講,
唔知大家有冇一種感覺
就係唔慣做主角
硬係有種唔係好自然嘅感覺
特別係你見到一班人為你大費周章嗰陣,
就更加唔知點咁樣




例如會幫你安排好多節目
又或者食得好豪
其實我可能根本唔鍾意
淨係想平靜咁過
最慘係你又唔可以拒絕喎
始終人地一番心意,
拒絕又唔係
唔拒絕又唔係
有時真係好煩
聽落去係咪好奇怪
可能係我問題啫
天生冇主角命
當然,
同我慶祝嗰個係呀琳
咁我梗係好開心啦




人就係偏心架啦
唔怪得我架喎,
我就唔信你地冇大細超喇
不過睇怕呀琳都唔記得嚕
始終講俾佢聽嗰陣距離依家都好耐喇
你估人地好似我呢啲毒勁咩
成日記埋呢啲唔等使嘅野.

我地屋企就習慣年初二去拜年
咁啲大人,
去人屋企拜年,
多數就打埋麻雀架啦
打麻雀就冇我份
喺嗰度又悶
所以夜晚食完飯之後,




我就自己一個返屋企先
衰啲講句,
自己一個返屋企,
都起碼有得打丁丫
生日前夕,
陪著我嘅竟然係av女優
如果你話真人,
咁就梗係爽啦
但依家唔係丫嘛
佢只係隔住部電腦陪我
聽起上嚟都好悲哀
我自己就冇乜所謂嘅,
反正都係咁過架喇
只係俾人聽到就唔多好聽
生日前夕竟然自己一個,
正當我喺度咁諗嗰陣,
我個手機無啦啦響左
唔知邊q個打嚟呢
拎起一望,
原來係我最熟悉嘅嗰八個數字
但當時嘅我,
係以為佢想打過嚟講恭喜發財
而唔係講生日快樂,
你諗下幾可悲
呀琳:「樂仔生日快樂呀 」
我梗係好開心啦
原來呀琳仲記得
毒勁就是這樣的
你自己鍾意嘅人記得你嘅生日
就足以令自己開心到飛起
但可能喺人哋眼中,
只係一件好普通嘅事
我:「多謝先
估唔到你仲記得喎 」
呀琳:「梗係啦 」
我:「梗係 」
呀琳:「我意思係話......
我咁好記性梗係記得啦 」
我:「點都好多謝先
你知唔知你係第一個同我講生日快樂嘅人 」
呀琳:「我搭正就打過嚟
仲有人快過我咩 」
我:「咁又係喎 」
講起同我講生日快樂,
嗰個Candice完全冇表示過任何野
喂大佬我生日,
講句生日快樂都得呱
又唔係嗌你請野我食
飲野你就識搵我
正狗西
呀琳:「聽日唔好約人呀 」
我:「點解 」
唔好鬧我住,
我嗰陣真係唔知點解
呀琳:「咁都仲有得解 」
我:「梗係有啦
無啦啦做乜叫我唔好約人 」
呀琳:「我約你出去呀
明唔明呀豬頭丙
定係你唔想同我出去 」
生日有呀琳陪
正呀
我之前諗都冇諗過
得喇,
呢份已經係最大嘅生日禮物
我:「想
梗係想啦 」
呀琳:「咁聽日晏晝,
我地再喺msn約啦 」
我:「好
不過點解晏晝嘅
你唔使出去拜年咩 」
呀琳:「聽日唔使呀
同埋朝早有野做 」
我:「咁晏晝就晏晝啦.」
呀琳:「唔好收線住
送住份生日禮物俾你先
你等一等 」
正當我諗緊佢送乜嗰陣,
電話傳嚟生日歌嘅聲音
原來呀琳彈一首生日歌俾我
仲要自彈自唱
之後我無啦啦聽到佢媽媽講:「呀琳你係咪傻左呀
咁夜仲彈咩琴呀 」
呀琳:「你搞到我俾人鬧喇 」
我:「聽講係你自己要彈咋喎 」
呀琳:「哦,
即係你唔鍾意啦
話我多餘啦
係咪咁嘅意思 」
我:「唔係呀,
好鍾意呀 」
呀琳:「鍾意就好啦 」
一時間又變到咁溫柔
女人真係難捉摸
不過講句真心說話,
呢首生日歌
係我咁多年以嚟,
聽過最好聽嘅一首生日歌
去到今時今日,
依然都覺得係咁
一啲都冇變到,
只可惜,
有其他野,
已經變左好多.