[真人真事][校園][純愛]《最陌生的人，就是曾經最熟悉的人》: 第三十三章

到左第二日,
我就好期待同呀琳第二次出街
講起上嚟真係有啲搞笑
明明係自己生日,
但期待嘅原因竟然係喺人地度
咁我地同上次除夕一樣,
相約左喺屋邨巴士站等
呀琳同上次一樣咁準時
雖然著得好casual,
但無損佢嘅氣質




依然係咁靚
呀琳:「生日快樂呀 」
我:「尋晚咪講左囉 」
呀琳:「面對面講同喺電話講唔同架嘛 」
我:「咁我再一次多謝你先 」
講起上嚟,
真係得呀琳一個女性朋友係同我講生日快樂
你話慘唔慘
呀琳:「嗱,
生日禮物 」




呀琳竟然送生日禮物俾我
我真係諗都諗唔到呀
你知唔知,
當你得到你鍾意嘅女仔所送嘅禮物嗰陣
嗰種感覺同平時開心係好唔同
有啲難以置信
唔係好真實咁樣
之後再搣一搣自己大脾
痛楚嘅感覺非常清晰
證明我唔係喺度發緊夢




我:「呀琳多謝你呀 」
呀琳:「我見你之前喺我生日嗰陣......
請左個蛋糕我食,
咪......做返啲野囉
你快啲拆開嚟睇
睇下鍾唔鍾意先 」
唔理佢因乜野而送俾我,
總之呢一刻我就好興奮
咁我跟住就拆開嚟睇,
原來係一條頸巾
我:「你自己織架 」
呀琳:「係呀
所以有啲位織得麻麻地
你會唔會介意呀 」
我:「梗係唔會啦 」




呀琳:「你鍾意呀可 」
我:「鍾意 」
呀琳:「咁就好喇
我見你咁怕凍,
咪送呢樣野俾你 」
我:「你尋日話今朝要做野
就係做呢樣 」
呀琳:「係呀
我織得慢,
今朝先啱啱搞掂咋 」
我:「真心多謝你
我都唔知講咩好 」
呀琳:「既然鍾意就要戴住佢
知唔知我織得好辛苦 」
我:「得得得




即刻戴 」
呀琳:「嘻嘻 」
我又點會介意佢嘅手工丫
因為個重點根本唔係喺條頸巾度
而係喺織嗰個人度,
即使佢織得再差,
我都一樣咁鍾意
雖然本身我唔係好鍾意戴頸巾
但係呢條頸巾係呀琳織嘅
我搵唔到唔戴嘅理由
當我面對呀琳嗰陣,
我就係一個咁冇原則嘅人
呀琳:「去邊度你話事啦,
生日大晒 」
我:「我冇所謂呀




你揀啦 」
叫我揸主意就死啦
呀琳:「咁呀,
去溜冰好冇 」
我:「下
我唔識溜喎 」
呀琳:「我都唔識架,
咪當玩下囉哈哈 」
我:「玩下囉 」

之後我地就搭車去西九龍,
去到溜冰場
呀琳:「落到嚟又真係有少少驚 」
我:「你啱啱好牙擦架喎 」
呀琳:「你咪一樣唔識溜 」




唔知大家點睇溜冰,
我自己就真係唔識溜
特別係冇野扶嗰陣,
真係好似就嚟跌咁樣
有啲淆
當然,
呀琳都同我差唔多
我平時好少聽佢尖叫,
但喺溜冰場度都聽唔少
「好驚呀 」
「平衡唔到平衡唔到 」
慢慢佢跌得多,
之後就扶住我
呀琳:「俾我扶住丫
完全唔識溜呀 」
佢咁驚,
我冇可能唔應承佢啦
我:「但係我都唔識溜喎 」
呀琳:「兩個人跌好過一個人跌 」
我:「原來搵我陪襯 」
呀琳:「講下笑啫
扶實我又好
俾我扶又好 」
我同呀琳又有親密接觸
當然我係冇生理反應
唔係因為我不舉
而係因為我太緊張
同埋對住呀琳係唔會諗嗰啲野,
不過佢真係捉得好緊
有時一齊跌嗰陣,
大家都好大聲咁笑
皮肉雖然痛,
但係個心就甜到不得了
我唔知佢啦,
我就係咁
其實我好想出到溜冰場之後,
佢都仲係會咁樣捉實我
但係我好清楚,
佢唔會咁做
我只可以利用溜冰場做武器,
去偷一啲唔屬於我嘅福利
暫時借住啲歡樂時光,
但係每次借野,
終歸都要還.