[真人真事][校園][純愛]《最陌生的人，就是曾經最熟悉的人》: 第三十七章

喺當日嘅晏晝,
當學校響起午飯嘅鐘聲,
呀琳即刻擰轉個頭同我講:「好,去食飯 」
我:「食囉食囉 」
呀琳:「望住你等你冇得偷走先 」
有得俾呀琳捉出去食飯,
食豬餿都制
呀琳:「靚靚Candice呀
今日呢條友同我地食飯
以後都會 」


Candice:「我ok呀
你知我冇乜所謂,
不過點解先
唔通你地 」
呀琳:「梗係唔係啦
唔係......你諗咁樣 」
Candice:「人地都喺度唔玩你啦 」
呀琳:「Candice呀 」
之後我地三個就一齊去餐廳,
好彩呀琳冇冷落我


冇掛住同Candice講野而冇理我
你知啦,
有時三人行,
最衰就係有兩條友掛住講野
另一條友就唔知喺度做乜
大佬,
呢個情況好尷尬架嘛
又搭唔到嘴,
淨係可以跟住行
咁我不如自己一個行


反正都係冇人傾計
仲唔使咁尷尬添
好彩呢個情況冇出現
Candice亦都好識做
冇死攬住呀琳,
呢個朋友識得過
係有時狗左啲
食飯嗰度冇乜好講,
大家三個都有講有笑
Candice少不免就間唔中喺度抽水
我就冇乜野,
反而就幾享受
當自己同自己鍾意既女仔俾人抽水嗰陣,
其實我覺得係一樣好甜蜜嘅野
起碼有人曾經覺得,


我地係有關係,
雖然我知道,
事實上唔係咁樣,
但起碼有俾人誤會嘅機會
咁樣就已經好夠

幾日之後,
Candice又乘乘機機上嚟黐餐
Candice:「伯母你好呀
我媽媽:「又同媽咪上嚟食飯呀 」
Candice:「係呀
伯母你煮野咁好食 」
我:「假到
收皮啦 」
我媽媽:「衰仔收下把口啦 」


我:「係 」
Candice:「順便有野想搵你
入房傾啦不如 」
我:「入房傾想溶左我
男寡女獨處一室唔多好喎 」
Candice:「你唔介意可以喺度講嘅 」
講完之後仲陰陰嘴笑
個樣奸到呢
所以我最後都係屈服
同佢入左房傾,
我:「想講乜呀 」
Candice:「點解你會同我地一齊食飯嘅 」
我:「唔係我話事架
係呀琳命令我去 」
Candice:「命令添呀


有冇吹水呀 」
我:「講到命令又誇左啲嘅
不過真係唔係我要求
你唔鍾意咩 」
Candice:「我梗係冇所謂啦
不過想八卦點解咋嘛 」
我:「唔係唔講得俾你知,
但你千祈唔好同我呀媽講 」
Candice:「得啦 」
我:「亦都唔好同你呀媽講
因為你同你呀媽講,
你呀媽就會同我呀媽講
到時我就慘過食屎 」
Candice:「唔會唔會 」
老實講,


Candice幾守得秘密
以前小學嗰陣,
我喺學校做嗰啲惡作劇
Candice從來冇篤爆我
每次我呀媽問Candice,
我喺學校有冇曳嗰陣
Candice次次都話冇,
人品唔評論佢
不過把口幾密就真
我:「基本上我晏晝係唔食野嘅
因為想慳多啲錢,
你知我第日有可能出去留學架嘛
儲住啲食飯錢,
當我第日想買野嗰陣,
咪係可以即刻買
唔想再問老豆呀媽拎咁多錢
我就係知佢地一定會買俾我先咁樣
咪講俾佢地知 」
Candice:「得啦
不過你好野喎
晏晝唔食野都成日頂到 」
我:「捱捱下就慣 」
Candice:「捱得多都係唔好呀 」
我:「呀琳就係咁講
所以就捉住我,
叫我同你地一齊食飯
睇實我咁話.」
Candice:「你條傻仔真係唔知咩事架 」
我:「做乜春 」
Candice:「呀琳好少會帶人一齊嚟食飯
嗰陣有條友想溝佢,
話一齊食飯嗰陣,
佢都冇睬佢 」
我:「原來呀琳有時都會咁串架 」
Candice:「因為條友好煩,
成日黐住晒 」
我:「咁關我係傻仔咩事
定係你條友想乘乘機機鬧我 」
Candice:「我要鬧你使乜乘乘機機
佢咁緊張你,
你唔知嘅咩 」
我:「真係唔知架 」
Candice:「識左十幾年
講句真心話,
我覺得呀琳係鍾意你 」
我:「係咩,
我又唔覺喎 」
Candice:「你豬到咁
梗係唔覺啦
不如你試下表白啦 」
我:「你都唔知,
如果表白之後衰左
我就再冇得同佢咁接近
成功固然好,
但我真係接受唔到衰左之後會點樣 」
Candice:「咁我都知
點都好啦,
撐你呀 」
我:「你係撐先好喎 」
同Candice傾完之後,
我發覺有一樣野好奇怪,
呀琳,Candice同我都係朋友,
但佢地對我唔食晏晝個態度係有啲分別
乜唔係大家都係朋友式嘅關心咩
定係一直以嚟,
我搞錯啲嘢
如果係,
咁究竟我搞錯啲乜
唔知丫好煩呀,
都係唔諗咁多,
講開又講,
之後我地直至中四學期完都係一齊食晏
Candice有時都好識做
間唔中有一日食完飯會行返學校先,
話唔知有啲咩集會定係做功課
所以要早走,
咁變左有啲時間係得我同呀琳獨處
錫晒你Candice