返左一陣學,
學校又放假
放完聖誕假,新年假,
之後就梗係復活節假
一放假就冇得見呀琳
生日又完左
冇晒慶祝理由
唔通我同佢講,
不如我地一齊慶祝復活節咩
傻都知我想點啦


正當我諗緊有咩理由可以約佢出嚟,
乘機見佢嗰陣,
呀琳就打俾我喇
呀琳:「樂仔復活節有冇去旅行
我:「似你咁有錢咩
成日去旅行
呀琳:「我邊有成日去
係聖誕嗰次咋嘛
我:「我最近都係搭巴士返鄉下咋
似你去日本咩


呀琳:「你唔去咋呱
我:「打嚟做咩呀
呀琳:「復活節有冇野做
我:「冇呀
呀琳:「你唔係踢開波咩
我:「太勁廢事落去屠人
呀琳:「真唔真呀
我:「真呀
呀琳:「不如出嚟睇你踢波
好冇


我:「唔好
呀琳:「點解呀
我:「嗰度好污糟
唔啱女仔去
除左嗰度污糟之外,
大家都知啦,
球場最多變態佬
特別係街場,
有啲pk仔成日搏懵省個波埋去女仔度
之後扮q晒嘢喺度搶波
輕則睇女,
重則抽水
喺度扮專心搶波,
之後隻手就唔知摸左去邊度
點解我會知


因為我都係其中一個有咁樣做嘅人
呢啲野做就爽
但係,
當個女仔係你鍾意嘅嗰個人嗰陣,
你就爽唔出喇
同埋,
呀琳喺現場我一定好唔自然咁踢
所以拿拿聲拒絕左
千祈唔嚟得
一嚟就出事,
呀琳:「咁去邊度呀
我:「你諗啦,
我冇乜所謂
呀琳:「點解你成日都冇所謂
我:「乜都啱玩


哈哈
其實梗係唔係啦,
出嚟玩乜根本就唔係我嘅重點,
我嘅重點係你咋嘛
呢啲野梗係冇同佢講

呀琳:「咁呀......
戲就睇過
冰又溜過
行街行得多都厭
不如唱k
我:「好呀
呀琳:「不如你卜好冇
懶唔想搵neway電話
我:「好,


一陣打俾你丫
之後我打俾neway問,
間間都話中學生放復活節假,
好多booking
所以得兩三個鐘
我頂你啦,
兩三個鐘夠你唱定夠我唱
所以最後都係冇卜,
最慘係乜野?,
係連加州紅都係咁樣
咁就收得皮啦
之後我打返俾呀琳,
我:「間間得兩三個鐘咋喎
仲唱唔唱
呀琳:「咁少時間唔唱啦


即係又要諗去邊度
我:「你諗
啱啱電話就我搵
今次靠你喇
呀琳:「喂我諗唔到呀
今次你諗丫
我:「咁呀......
不如去做運動
你見我話做運動,
就知我真係諗無可諗
呀琳:「做咩運動先
我:「去踩單車咯
但係我唔知邊度有得踩喎
呀琳:「大埔咪有囉
我:「咁好囉
雖然有少少遠
不過你識唔識踩單車
呀琳:「識少少啦
我:「咁踩唔踩
呀琳:「好呀
我:「我地幾點出嚟
呀琳:「一點好冇
我:「好,
食唔食野
呀琳:「不如踩完先食
咁樣好似滿足啲嘻嘻
可以食好多個海底撈野同埋楊枝甘露
我:「未踩你就諗住食
服左你
呀琳:「你唔恨得咁多架喇
我:「咁好啦聽日見啦
聽日之後,
我同呀琳之間嘅回憶又多左一樣野
咁起碼到我第日,
當我回味緊中學生活嗰陣
唔使成日諗嚟諗去,
都係係嗰幾樣嘢
依家咁樣,
起碼有多一件叫做踩單車嘅回憶
事後睇,
好彩當初我地有踩單車,
不得不服自己有先見之明
至少今時今日嘅我,
當回味緊同呀琳一齊玩嗰陣,
真係有多一樣野去豐富呢一段生活
如果冇嘅話,
就好似個乞衣兜俾人偷錢咁樣,
雪上加霜,
本來已經唔多,
依家仲少一樣,
咁就真係慘過食屎.