呀琳:「不如買支水
有啲口渴
之後我地就去左買水飮,
飲完之後,
抖順條氣
就向住沙田再次出發
呀琳可能好少嚟呢邊,
一見到科學園呀,馬場呀就覺得好新奇
「哦,原來科學園係咁嘅
「原來馬場係咁大嘅


不過點解冇馬仔嘅
我都唔知點答佢好
之後踩到去一條直路,
嗰度冇乜人
我地大聲啲講野都唔驚
當然你可以話,
即使有人,
我地大聲啲講野都冇問題架
不過咁樣會騷擾人丫嘛哈哈
我:「正,冇人


呀琳:「係喎呢度冇人嘅
我:「今日平日丫嘛
呀琳:「又係喎
我:「不如喺度大聲叫咯
呀琳:「下,
唔係掛
我:「嚟啦
咁樣好爽架
呀琳:「好舒服呀
我:「咁樣唔夠大聲喎


呀琳:「好舒服呀
我:「咁就差唔多
呀琳:「你都一齊叫啦
我:「唔想考試呀
呀琳:「係喎,
六月有個大考
玩多陣就差唔多考
我:「通常大考就好q難
呀琳:「一齊溫咪得囉
好似之前咁
我:「嗯
估都估唔到,
我約呀琳出嚟踩單車,
原來可以約埋佢遲啲一齊溫書
bonus嚟


大考唯一個價值就係呢度
不過講開又講,
以前成日話點樣唔鍾意考試,
好想到大個去逃避考試
但係原來,
畢左業之後先至係真正嘅考試
呢個試係要試一世,
都係中學個考試好,
至少有呀琳喺度.

踩踩下就嚟去到沙田還車嗰度
突然之間,
喺我前面嘅呀琳失一失平衡
連人帶車撞左落去左邊嘅石壆度
嗰下真係嚇一嚇


唔知巴打們有冇試過,
自己鍾意嘅人喺你面前發生意外
嗰下個腦係一片空白
完全諗唔到野,
我依家先明,
點解啲電視劇,
自己嘅女朋友受傷會咁緊張
原來真係可以咁震撼
我:「有冇事呀
呀琳:「有啲痛呀
我:「邊度痛
呀琳:「左腳
同埋左手都有少少痛
之後我一睇,
佢隻左腳個膝頭哥真係流晒血


睇見都肉赤
我:「抖下先去買膠布
使唔使買埋紅藥水
呀琳:「唔使呀
撞傷少少啫唔使咁誇張
我:「又唔係咁講呀
整親隻腳可大可小
都唔知第日會唔會有疤痕
呀琳:「應該唔會掛
我:「都係唔好,
你依家行唔行到
呀琳:「行得慢都ok嘅
我:「咁我扶住你慢慢行
估唔到我可以再一次咁樣扶住佢,
但係如果要佢受傷,


先有呢種機會
我真係寧願唔扶佢
如果呢啲傷發生喺我身上梗係冇所謂啦,
男人老狗整親少少算得係乜
但係今次係發生喺呀琳身上,
佢啲皮膚咁幼嫩
萬一因為咁樣,
令到隻腳有少少瑕疵
我都唔知點算
畢竟係我叫佢嚟踩單車
之後我地搵到個地方有得坐嘅
我就叫呀琳坐喺度先,
順便睇住其中一架單車
我自己就先還返另外一架單車
因為如果我扶住呀琳,
係冇可能還得晒兩架單車
所以我先還一架,
之後我去到單車鋪
我同佢講仲有一架單車未還
但係我地有人受左傷,
問佢可唔可以出嚟,
幫我地拉返去單車鋪
好彩嗰個單車鋪嘅人都好配合
即刻跟住我返去呀琳嗰度
拎埋淨低嗰架單車,
我,呀琳:「唔該晒
單車鋪嘅人:「唔使
快啲同女朋友處理好個傷口先啦
之後我同呀琳對望左
然後笑左一笑
如果佢真係我女朋友就好喇
望住我地嘅途人,
我估佢地都覺得係咁樣
但係,
幻想同現實始終係有分別.