[真人真事][校園][純愛]《最陌生的人，就是曾經最熟悉的人》: 第四十一章

之後我地拿拿臨去藥房買膠布同埋紅藥水
買完之後,
就喺返附近有得坐嘅地方幫呀琳整好隻腳
唔怕話俾你地知
其實我咁大個仔
係從來冇整過呢啲野
平時就算我整親,
我都係等個傷口自己埋口
唔好話用紅藥水,
連膠布都冇用過


不過冇辦法啦,
今次受傷嘅係呀琳
唔可以再係咁樣得過且過
跟住呀琳遞隻腳俾我,
再一次望住佢個傷口
我就咁望,
都覺有啲痛
平時電視係咪成日都有啲男主角,
又或者屋企人會講一句嘅
呢句野,


通常佢地係喊晒口咁去講
咁究竟呢句野係乜
答案就係「寧願有事嗰個係我.」
如果你有睇tbb的話,
一定有聽過呢句野
唔好扮冇聽過
喺我望住呀琳個傷口嘅呢一刻,
我終於明呢句野點解
原來句野唔係離地,
tbb成日俾人話離地,


唔真實,
但當你見住你重視嘅人受傷嗰陣,
你個腦就會浮現呢句野出嚟
我:「其實我冇幫人搞過呢啲野 」
呀琳:「唔緊要啦
慢慢整咪得
又係你講嘅,
邊有人一出世就識啫 」
我:「係咪要先塗藥水再貼膠布 」
呀琳:「梗係啦
貼左膠布先至塗藥水有乜用喎哈哈 」
直覺上,
喺傷口上面塗藥水應該好q痛
所以想佢開心啲
等塗藥水嗰陣會冇咁痛


而且,
再低能嘅笑話,
換到你嘅笑容
咁我又唔介意講多啲低能笑話
我:「忍住痛呀 」
呀琳:「嗯 」
呀琳出奇地冇大聲叫
我已經同佢講左,
如果真係仲痛,
你就掐住我隻手
但係佢又冇咁做,
成個過程好順利
我:「你唔痛咩 」
呀琳:「唔痛呀 」
我:「唔係掛


我望住都覺得痛喎 」
呀琳:「平時嘅話可能痛
但係頭先完全唔痛
嘻嘻 」
呀琳竟然仲笑得落
唔通真係唔痛
但係我又冇理由特登整親自己
跟住走去塗藥水
試下痛唔痛架
我:「你講野咁難明嘅 」
呀琳:「你唔明架喇 」
我:「你講得啱我真係唔明,
根本冇可能唔痛 」
呀琳:「跟住去邊呀 」
我:「搞到咁樣梗係返屋企啦 」



之後我地就搭返車返去我地住嗰個屋村
原本想喺佢屋企落,
但係架巴士唔經佢屋企
所以好似平時咁樣,
先返去屋村
再喺屋村搭巴士上去佢屋企
點知,
當我地去到巴士站嗰陣,
去佢屋企嗰架巴士啱啱走左
真係頂左出嚟
呀琳:「架巴士要等好耐架 」
咁我地就諗住搭的士
點知等左成個字都冇的士
我:「不如行上去啦


咁樣等唔係辦法 」
呀琳:「但係我要行得慢先得......
行得快會痛 」
我:「咁呀......
不如我孭你行上去 」
呀琳:「下
咁你會好辛苦架 」
我:「你都唔重
怕乜野
得啦你上嚟啦,
與其咁樣等落去,
不如我孭住你快啲返到屋企抖下 」
呀琳:「咁好啦 」
我:「不過有一樣野你唔好介意,
就係我個背脊出晒汗
可能會令你唔舒服 」
呀琳:「唔介意呀
辛苦你就真 」
咁之後我就孭住呀琳上去,
我知你地實會話我有冇抽水
坦白講,
我嗰一刻,
淨係諗住呀琳會唔會痛
我孭得佢舒唔舒服
完全冇諗過我係捉住佢隻腳
由頭先我幫佢貼膠布嗰陣已經係咁
完全冇非分之想
唔係因為我不舉
其實我都係一個腳膠
但我真係冇諗過呢方面嘅野
淨係一心想佢快啲返到屋企抖下
行行下嘅途中,
我都出晒汗
大佬始終真係孭住個人
呀琳點樣輕都好,
始終都係有重量
我就咁一個行呢條路都出汗啦
更何況孭住個人
突然之間,
呀琳拎張紙巾出嚟幫我抹汗
我:「唔該晒 」
我嗰下真係觸一觸電
我完全估唔到佢會咁做
呀琳:「咁你咪舒服啲囉 」
我:「咁我孭得你舒唔舒服
唔舒服出聲喎 」
呀琳:「好舒服呀 」
呢一次之後,
我覺得,
我同呀琳個距離又近左一步
唔知可唔可以再近啲呢.