[真人真事][校園][純愛]《最陌生的人，就是曾經最熟悉的人》: 第七十四章

無疑呀琳身邊已經多左一個「他」
我亦都講過盡量少啲接觸佢
但係我當年亦曾經講過,
如果我有一日可以親手揀禮物嗰陣
我一定會送禮物俾佢
咁我依家已經返到嚟香港,
我就自自然然要履行承諾啦
咁就又要麻煩Candice喇
好彩Candice亦都肯幫我
我問佢得唔得嗰陣,


佢淨係答左得
之後就再冇問其他野,
好朋友即係好朋友
果然好了解我
不過佢仍然係唔知我喺背後做左咁多野
至於送乜野禮物,
咁就梗係年年唔同.

由2013年講起
2013年,


我知道佢鍾意醫神
所以就特登買左一隻The Key俾佢
當然啦,
我事前梗係問過Candice
佢仲係咪鍾意醫神
同埋有冇The Key
咁佢話仲係鍾意醫神
同埋冇The Key嗰隻碟
我就去左買啦
買完之後,


好似當年咁樣
Candice同呀琳講話係佢媽咪買俾佢
我再一次做返Candice嘅媽媽
呀琳都有問返Candice,
點解Candice媽媽會知道佢鍾意醫神
好彩Candice識兜
咁先至冇穿煲
我仲好記得,
我第二日睇呀琳ig嗰陣
佢拎住The Key影左幅自拍
寫住,
「生日禮物,
我最鍾意嘅醫神,
多謝呀伯母.」
我見到樓下啲人仲留言話


係咪佢男朋友送俾佢
跟住呀琳澄清返,
話係Candice媽媽
當然我好清楚啦,
其實兩個都唔係
送俾你嘅嗰個人,
係一個你同佢形同陌路嘅人
咁我都有喺下面留言,
當然係用Angela個用戶留言啦
Angela:「醫神呀!!!!!!
呢隻碟好聽.」
呀琳好快喺下面覆番我
呀琳:「係呀好正 」
佢好滿意份禮物,
咁就可以喇


去到2014年,
原本我係諗唔到送乜野俾佢
但係,
喺佢臨生日嗰陣,
有一日Candice whatsapp我
佢話呀琳屋企嗰水杯跌爛左(呀琳whatsapp佢)
咁我就知送乜野喇
之後我搵左好耐,
見到有個水晶杯
係有鋼琴嘅圖案
於是我就買左佢
七年前我送水樽,
七年後我就送水杯
當然呢個水杯貴好多啦
不過冇所謂,


都係嗰句
呀琳鍾意就得喇
之後佢都有喺ig講,
「啱啱跌爛左水杯,
就有一隻新嘅水杯做生日禮物
仲要有鋼琴添.」
我都有喺下面留言,
Angela:「好靚呀 」
其實係自己讚緊自己買得好
呀琳:「Angela識貨 」
之後我都收到Candice嘅whatsapp,
佢話呀琳好鍾意
咁就得喇
2015年,
原本我想買醫神嗰隻新碟<<準備中>>俾佢


但係諗諗下,
兩年前我先送嗰左隻cd俾佢
冇理由咁冇新意
又送一隻cd俾佢,
諗諗下,
女仔都係鍾意公仔
跟住我就問Candice,
呀琳依家仲係咪鍾意蠟筆小新
Candice話係
佢話有一次同呀琳去日本旅行,
一見到小新就好開心
係咁影相
跟住話見到有個公仔好想買,
但係最後好似話驚超重上唔到飛機
所以最後冇買
Candice話呀琳好谷氣買唔到
聽完佢咁講之後,
所以我就送左一隻大型小新公仔俾佢
買小新公仔嗰個過程都唔係簡單
行左好耐先搵到,
不過為左呀琳開心,
就乜都抵返晒啦
佢同上兩年一樣,
都有喺ig出相
張相我估係喺屋企影,
因為佢瞓左落張床度
攬住小新,
至於係邊個屋企,
咁就唔知喇
「小新,
終於可以擁有你.」
類似係咁啦
我有一刻諗過,
不如做小新公仔算
仲好過做人
佢咁樣講,
即係佢好開心啦
又成功完成任務
至於上年,
我問Candice,
呀琳用緊乜野耳機
Candice話apple耳機
跟住我就二話不說,
問第二個朋友,
叫佢上高登幫手問下
乜野耳機適合聽流行曲
因為Candice話呀琳主要都係聽流行曲
跟住嗰個朋友話高登仔講Im70可以一戰
性價比高,唔算貴
咁我就二話不說,
即係去買
買完之後慣例交俾Candice
叫佢俾呀琳,
結果呀琳同對上三年一樣,
都有喺ig出帖
張相係影住佢帶住Im70,
仲講話有新耳機好開心
2013年到2016年,
年年我送俾佢嘅野都可以令佢開心
咁就已經足夠
我要多謝Candice比個身分我
如果唔係我就唔可以咁樣做
我諗呀琳唔會知道其實呢啲野係我送俾佢,
就算佢估到唔係Candice媽咪,
我諗佢都估唔到係我
又或者佢根本唔會想係我
如果我係用樂仔嘅身份送,
我相信佢ig起碼會小左四張相
就等佢一直以為係Candice媽咪送啦
其實有時我覺得謊言唔一定係衰,
善意嘅大話,
我覺得係正面,
就好似今次咁樣
其實我好清楚,
我咁樣做係好無謂
佢又唔會知道係我,
不過塵世間,
人類都係會做好多所謂無謂嘅野
都唔爭在啦.

除左送禮物俾佢,
其實2014年打後呀琳生日我都有做第二樣野
話說有一次同Candice上嚟我屋企食飯,
咁佢部電話就插左落我部電腦嗰度叉電
突然之間,
我見到呀琳whatsapp佢
跟住我就萌生一個念頭,
我試下解鎖Candice部電話
果然一解就得,
我實在太了解佢
識左成廿年,
當然啦,
我冇睇佢啲野
講真真係冇
我只係撳入去呀琳嗰個聯絡人資訊度,
見到呀琳個電話
就save落我部電話度
當然啦,
如果我大方咁樣問Candice,
我相信佢都會俾我
不過唔知點樣開口
就係太熟先唔敢開口
所以要出此下策
咁冇所謂啦,
拎到就得啦
我相信每個人部手機,
都有一個電話號碼,
係你永遠都唔會打
但你永遠都唔會刪除,
我就唔係冇打過呀琳個電話號碼,
不過只係唔係喺我部電話嗰度打
每逢佢生日,
我都會落去留下電話亭,
俾一蚊去打俾呀琳
第一次打嗰陣,
我聽到呀琳講左一句喂,
原本我想講生日快樂
反正佢都唔會估到係我
但係我真係唔夠膽
同埋一聽到佢把聲嗰陣,
自自然然成個人呆晒
乜野都講唔出口,
如是者一年又一年
年年我都咁做,
我每次都好想講生日快樂
但都係唔夠膽,
不過我覺得,
聽到呀琳講左一聲喂都已經好滿足
唔計喺社交平台嗰度聽佢把聲
我自從中五之後就冇再聽過佢講野
真係好開心,
開心到又忍唔住流眼淚.