[真人真事][校園][純愛]《最陌生的人，就是曾經最熟悉的人》: 第七十五章
係時候講呀我近年嘅感情生活
認真講,
其實我咁多年以嚟
由始至終都係鍾意咁同一個人
思念冇因為耐冇見而有所改變
當然啦,
小弟都係一個毒勁
所以咁多年都冇乜女埋身
喺外國好,
返返嚟香港都好
其實都見到有唔少幾靚嘅女仔
但始終都冇乜心動嘅感覺
呢個係真嘅
唔係話想同大家講我係一個好專一嘅人
而係事實上,
我個心一早俾人偷左
我都好想偷我個心嘅嗰個人還返俾我
但係咁多年都唔得,
始終最鍾意嘅都係呀琳
有人曾經講過,
唔好喺十六歲嗰陣鍾意一個人
因為呢個人係你一世都會記得
如果最後做到情侶就好,
萬一做唔到就大鑊
你要一世捱住單戀之苦,
當你鍾意一個人,
鍾意左七,八年之後,
你就會覺得好辛苦
因為晚晚都會諗起佢,
諗得多會好痛苦
當然亦都會好甜
甜同苦夾雜嗰個感覺唔係咁易受
我有足夠把握同你講.
講起感情生活
有一單野我可以同大家分享下
話說喺2015年,
我打工嗰間公司有一個女職員入左嚟做
佢叫做Keylus
年紀同我差唔多大,
都係廿零歲到
可能成間公司,
得我同佢個年齡係比較相近
所以我地好快就熟左
一齊食晏晝,
有時仲一齊放工
嗰個女仔幾靚
身材又幾好
概念圖就冇喇各位
總之你行街見到係會「目及」嗰啲嚟
話說有一晚,
佢冇啦啦同我講
Keylus:「其實你feel唔feel到有野
」我:「做咩呀
」Keylus:「咁你真係唔知啦
」我:「你都唔講我點知呀
」Keylus:「有冇人話過你好蠢
」有
仲要好多次添
不過佢依家已經唔會再鬧我
我:「冇喎
我咁醒
」Keylus:「真唔真呀
」我:「梗係真
」Keylus:「但我唔係咁睇喎
」我:「不如講白啲
」Keylus:「你覺得一個女仔,
成日同你放工食飯係代表乜野
」我:「搵人陪囉
」Keylus:「又唔見我搵第二個
點解淨係搵你
」我:「我唔識託你手踭
同埋我地個位近
方便聯絡
」Keylus:「都唔知你真傻定假懵
我鍾意你呀
係要人講到出面
」我:「今日唔係愚人節喎
」Keylus:「認真呀死人頭
」睇嚟我過左咁多年,
都係冇乜進步
我:「你講真呀
」Keylus:「都話係真呀
我好鍾意你呀
」我:「我對你冇feel喎
」Keylus:「可以培養嘅啫
你抗唔抗拒我先
」我:「唔抗拒嘅
咁你都不失為一個靚女
」Keylus:「不如我地拍拖丫
」我:「但我真係唔鍾意你喎
」你知啦,
感情呢啲野唔好玩
冇錯佢一個好靚嘅女仔,
身材仲要好好
但如果我因為咁樣而同佢拍拖,
我一定唔會開心
會覺得好辛苦
長期對住一個你唔鍾意嘅人
所以我好坦白咁同佢講唔鍾意佢
Keylus:「不如咁啦,
俾三日時間我地試下
三日之後先決定好唔好正式一齊
」我:「你當係試用期咩
」Keylus:「一於係咁話啦
暫時嘅男朋友
」我:「你認真呀
」之後Keylus翹住我隻手
Keylus:「認真呀
行啦
」就係咁,
我同佢試下拍三日拖
不過喺呢三日入面
我冇同佢一齊踩單車,
因為其實我麻麻地運動
我冇同佢一齊溜冰,
因為我唔鍾意俾人挨住
我冇同佢一齊分享甜品,
因為本來我就係一個自私嘅人
唔鍾意同人分享
我冇同佢一齊掃街,
因為我覺得咁樣唔飽
我冇借個膊頭俾佢瞓覺,
因為咁樣好攰
我冇同佢一齊用同一個耳機聽歌,
因為我唔鍾意一邊有聲一邊冇聲
我冇孭住佢行路,
因為我唔鍾意汗水交纏嗰種感覺
我唔鍾意同佢拍拖,
因為我唔鍾意佢
其實係我自己好幼稚咁樣諗
我唔想有其他人侵入我同呀琳之間嘅回憶,
所以我好努力咁樣捍衛住呢啲碩果僅存嘅回憶
我好想喺我腦海入面,
只有呀琳同過我做呢啲野
所以我一樣都冇同Keylus做過,
又或者咁講
其實我以前會踩單車,溜冰,分享甜品,掃街,借膊頭,
戴住一邊耳機聽歌,孭住人行路,
唔係因為我鍾意
亦都唔會因為我大方
其實只係因為同我做呢啲野嘅人係呀琳
三日之後,
我仲喺度諗緊用乜野藉口
點知Keylus話:「夠啦
多謝你俾左三日我
」我:「對唔住呀.」
我淨係識講呢句
Keylus:「唔使對唔住喎
愛情係冇對唔住.」
我:「對唔住
」Keylus:「其實我知道你唔鍾意我,
從你嘅眼神係睇得到
」我:「真係嘅咩
」Keylus:「係
同埋你記唔記得第一日,
臨走我叫你俾個goodbye kiss我
你只係錫我塊面,
而唔係嘴唇
」原來嗰陣佢知嘅
我:「記得呀.」
Keylus:「咁我就知你唔係真係鍾意我,
不過你好好人
陪多我幾日
呢啲時間係我偷返嚟架
」估唔到我都會俾人話好人
我:「咁你講過架嘛,
三日就三日
」Keylus:「我唔小心見到你銀包嗰張相,
你鍾意嘅嗰個女仔就係佢
」我:「係.」
Keylus:「最後係冇一齊
」我冇出聲,
默認就算
Keylus:「愛情就係咁
我鍾意你,你鍾意佢.」
我:「對唔住呀.」
Keylus:「都話唔使講對唔住咯
」我:「要嘅
」Keylus:「不過我可唔可以臨走之前,
借個人俾我攬住
我之前次次搭車嗰陣都想挨落你膊頭嗰度,
你都唔俾
唔該你丫,
今次俾個人我攬丫
一下就夠
」唔通我話唔俾咩
所以最後我梗係應承佢,
Keylus最後喺我面前都係冇喊到
不過我估佢同我當年一樣,
係背住嗰個人先敢喊
最後講多句,
對唔住呀Keylus
發生呢件事之後,
Keylus奇蹟好快康復
大家好似冇當呢件事有發生過咁樣,
咁都好啲,
起碼冇咁尷尬
不過一年之後就走左,
依家都係間唔中先會whatsapp下,
睇ig好似冇拖拍
呢單野我同左幾個男仔frd講,
佢地都鬧我有得食唔食
仲要咁正
我都知佢正
但係愛情真係冇得逼
如果我唔鍾意佢但又呃住佢,
對雙方都冇好處
我又冇咁好演技
可以扮到真係好鍾意佢
所以最後都係講真話,
坦白算
無謂再害多一個人.
呢幾年入面,
我一次都冇見過呀琳
如果係真人計,
自從我去外國之前喺社區中心出邊偷望佢
到依家起碼有九年冇見過
其實我真係唔貪心,
我都係想望佢一眼就得
唔使對望,
只要俾我見到佢就已經可以
我都知道,
當年我喺溜冰場嗰陣,
利用溜冰嚟偷左佢扶住我嘅時間
我亦都知道,
偷野係要代價
但都過左咁耐啦,
乜代價都應該還晒啦
況且我都只係想見佢一面啫
點解都可以見唔到
唔係話香港好細嘅咩
點解撞一個人都撞唔到,
呢一刻我先知,
其實香港唔係咁細
我喺外國返咗嚟都有兩三年
都仲未見過佢,
一次都冇
有時成班frd話去邊度食,玩嗰陣,
我次次都話去觀塘
唔係因為我知道觀塘有咩食
亦唔係想行apm
我只係好想去你居住嘅地區
睇下會唔會有較大機會見到你
每次我喺觀塘嗰陣,
我都好留心咁樣行
睇下會唔會見到你,
但原來都係我諗錯左
都係一次都見唔到,
甚至我間中學嘅開放日,
自從我返咗嚟香港之後,
每年都會盡量抽時間返嚟
但係始終都見唔到我想見嘅人
人我就見唔到,
我喺度諗,
我身邊有咩野係同你仲有關連
我諗到有三樣
就係鎖匙扣,頸巾,
同埋中四畢業禮嗰張合照
得返呢三樣野係仲係關於你
其他已經冇晒
咁多年以嚟,
呢三樣野我保存得好好
次次我都好小心咁樣處理,
如果我再整爛其中一樣,
同你有關嘅野就少一樣
你已經唔會再送野俾我,
所以我一定要好好保存呢三樣野
中四畢業禮嗰張合照到依家都仲喺我銀包嗰度
鎖匙扣亦都係,
仲係扣喺我屋企嗰條鎖匙
咁樣每次出街我就一定會帶
甚至頸巾都係,
每年嘅春天,秋天,冬天,
我出街都會戴著喺條頸度
夏天就不了
因為真係太熱
但係其餘嗰三個季節,
我都會戴喺身上
我呀媽,
甚至啲朋友,
都鬧我係咪痴乸線
我每次都冇解釋,
淨係話怕凍就算
久而久之佢地都習慣左,
所以各位巴打絲打,
如果你有一日出街見到有條友戴住頸巾
不妨同我相認
我完全唔介意
其實我知道咁樣做好無謂
不過就係解釋唔到我點解要咁樣做
或者我覺得,
呢三樣野親自帶住喺身上會安全啲掛
可以做到嘅,
我都盡量會保存
因為我真係輸唔起.