「高登情緣」「港產片Feel」有一種愛叫做純愛。: 第六章

 
「OK，收到，咁隻VCD我留俾你。」我即刻喺wechat綁定香港銀行卡，想拎錢，點知拎唔出嚟，個絲打俾嘅錢係人民幣，我轉換地區用香港銀行卡拎唔到筆錢，正當我fuck出聲之後，個絲打傳嚟信息。
 
「係呢，巴打你有咁多VCD應該係港產片發燒友啦，你最鐘意邊部戲咖其實？」
 
「唔多嘅。我最鐘意嘅戲南海十三郎。」
 
「謝君豪！我都好鐘意呢套戲。」
 
「呢套戲真係不停loop都唔會厭。我好認同佢將嘅個句文章有價！佢話：我要證明文章有價。再過三、五十年，冇人會記得個啲股票、黃金、錢財，世界大事都只係過眼煙雲，但係一個好嘅劇本，過了五十年、一百年，依然會有人欣賞，就算我死咗，我嘅名字我嘅戲，冇人會忘記。呢啲就叫做文章有價。


」
 
「啱。咁你有冇寫下觀後感，即係影評。」
 
「有嘅。我同我ex都係港產片發燒友，我哋都會寫下影評，有日佢就叫我開嘅blog裝住我哋嘅影評，而我得閒會更新嗰blog。」
 
「我同我ex一樣好鐘意舊嘅港產片，得閒會煲。但搵唔到都市情緣隻vcd，所以見到你放我即刻WhatsApp你啦。」
 
我份人好易投入，尤其係人哋同我講起港產片，我就會唔記得自己諗緊嘅其他嘢。
 


「80-90年代嘅港產片係最正嘅！就算好多冷門戲都好有意思，例如【正將】同【刀手】呢啲，我好鐘意雷宇揚呢位演員，佢真係好戲。睇舊嘅港產片，係可以發掘到好多好嘢。我好榮幸我可以做一個舊港產片嘅白老鼠，去發掘舊戲，雖然偶爾會遇到為拍而拍嘅伏戲，但大部分都係驚喜居多。」
 
「家陣好多新上映嘅戲都係引人中伏咖啦，所以我好少入戲院睇港產片，我都係鐘意喺屋企煲舊戲，好好feel。」
 
「就算冇碟在手，都可以上YouTube等網站睇返，既然網絡咁發達，梗係要好好利用啦。」
 
「同埋提起香港喜劇電影，唔好成日講周星馳周星馳周星馳，明明就好多做喜劇做得好出色嘅演員，好似黃秋生梁家輝張家輝劉青雲吳鎮宇等等，都係戲精。」
 
頂，呢個絲打同林佳君講嘅嘢都幾似wor，令我刮目相看，識貨呀佢！
 


「絲打你睇戲都好有見解呀！」
 
「呵呵，交流下。」
 
我眼訓了，我冇力再打字了，於是錄音同佢講第日再傾。而呢個絲打亦同我道謝。話雖無力，我都係有睇下佢wechat朋友圈，見到好多佢個舊相，原來佢真係澳洲絲打嚟。
 
睇睇下訓著，又開始發噩夢，今次係睇住黃秋生整叉燒包，on my god，因為發太多夢啦，我一早已經意識到黃秋生出場就肯定係夢，但係我醒唔到，仲喺夢入面……
 
到我喺夢入面抽離出嚟，我已經成身冷汗。早知道就唔好逞強，為咗同林小姐打開話題，不惜鋌而走險傾黃秋生，仲睇曬成套八仙飯店VCD，而最諷刺係，我逼完自己去面對我嘅難處，我哋卻已經分咗手，再也不會聯絡。唉。
 
如常訓到五點，起身食晚餐，之後返工。行過報紙檔，買本小朋友雜誌【快樂龍】。我習慣每期都買，因為我細嗰我爹地成日買呢本雜誌俾我睇，我仲成日寄信參加抽獎，中過一部GBA SP，即係GameBoy最高級個部（好似係）。我爹地好錫我，我係孤兒仔佢帶我返屋企，視我如己出，我幾乎晚晚發惡夢大嗌嘈住佢哋，佢既要安撫媽咪唔好鬧我，又會摸下我嘅頭，幫我蓋被，然後同我講，爹地係度，唔好驚啦。
 
全世界可以當佢係死賭徒，但我唔會，我當佢係我最尊敬嘅父親。我不幸嘅人生，好彩有爹地佢撫平我嘅心靈。記得喺孤兒院睇電視劇，人哋都有父母，我父母卻死曬，我好渴望有人錫可以當我係仔。直到爹地拎領養我，我有返嗰屋企，起初佢哋掛住返工交我俾婆婆湊，我受到虐待。普通細佬會頂唔順，但我忍住，每個禮拜六日爹地媽咪就會帶我出街。
 
短暫嘅父愛，點都好過未曾得到父愛。媽咪話我縱容爹地，其實我只能用錢去報答爹地，或者我嘅做法唔啱，但係，我每一次俾錢爹地，我都盼望佢有日戒賭。輸到盡頭，便會浪子回頭，對嗎？


 
我一直都係咁樣認為的。就好似【元州街皇后】入面嘅張國強，佢唔係唔錫屋企人，佢唔係唔勤力，但佢想改善屋企人嘅生活，佢選擇賭。有時候，賭係平凡人最後嘅希望。香港地，唔係不嬲都係屬於有錢人嘅天堂，窮人嘅沼澤咩？窮人唔賭，唔買個希望，做人嘅動力又何處尋？
 
巴士到了，我掀開雜誌，撕開最後一頁，用筆填上個人資料同回答問題，為心儀嘅禮物打上剔。
 
或者係某個時空內我哋一家三口依然過得安逸，唔需要避大耳窿。係呢個時候黑仔咗啲，但我相信烏雲會好快離開我哋。