「同埋提起香港喜劇電影,唔好成日講周星馳周星馳周星馳,明明就好多做喜劇做得好出色嘅演員,好似黃秋生梁家輝張家輝劉青雲吳鎮宇等等,都係戲精。」
 
我承認我係俾呢句說話吸引住,不停Loop呢句嘢。放工返到屋企嘅早上,本應好眼訓,但都會打開WhatsApp望下,會睇下嗰絲打嘅上線時間。
 
mon人幾時online,自Xanga blog&Qooza blog開始,到MSN,再到WhatsApp,每當我有心儀嘅女仔我都會mon人幾時online過,睇對方最後上線時間,如果對方online我就會好興奮,將隔夜諗定嘅對白send過去,而到佢offline我就會盼望佢online,最鐘意睇埋對方 Status打乜嘢。林佳君係第一個同我喺WhatsApp Status打字交流嘅人,每當我哋之間有冷戰,佢就好習慣喺Status打歌詞,而我就會搵歌詞覆佢,最高峰試過一日換十二次Status,大家都冇搵大家,但就mon住對方嘅為status嚟改。
 
冇諗到三年後,我會重新mon人status同上線時間,只見嗰絲打打住:
 
「有啲嘢唔駛一晚做曬。」出自【志明與春嬌】,志明喺賓館內攬住春嬌時講嘅對白。


 
而我staus長期都係高掛我對林佳君嘅感受:
 
「明日有天相遇相伴都未遲。」出自【洪興十三妹】,十三妹見到可樂死咗嗰陣嘅背景歌曲【暫停的故事】嘅歌詞。
 
可惜林佳君一早block咗嘅我任何嘢,佢唔會俾機會我解釋,其實我唔係掛住Ex,我只係身不由己要離開佢。不過算啦,解釋都冇用,我咁嘅處境都冇資格解釋啦,係咪咁講呀?
 
我唔敢主動WhatsApp 嗰絲打傾港產片,可能係我怕打擾到人,人哋有男朋友,我主動搵佢未免唔多好,所以我見到嗰絲打Online我都唔會搵佢。最後係佢搵我,打開我哋之間嘅共同話題:
 
「港產片不死!」


 
每日就係咁,傾起港產片,雞啄唔斷,而最後竟然不約而同傾到大家第二個共同嘅話題:
 
「我們的EX。」
 
而我終於得知呢個絲打嘅名叫KK。
 
「佢有次嚟澳洲公幹,特登買花同送玻璃球,搵人拎俾我,但冇見我……」KK講。
 
「網戀?」


 
「係呀。咁佢呢特登買兩隻烏龜嚟養,佢話代表大家嘅感情就好似烏龜咁細水長流,長長久久。而最長情嘅係,佢家陣都仲養住,明明大家分手已經幾年啦!」Kiko繼續講。
 
「會唔會係暗示呀?暗示仲鐘意你,等你搵返佢?」
 
「唔知呀!」
 
「咁你又唔問,佢又唔主動,點搞呀?」
 
「唔搵佢啦,我本來係嚟澳洲讀書後尾認識到我男朋友,佢同我搞緊居留權,同埋我都已經24歲,唔可以好似以前咁不顧一切去追求愛情。」
 
「咁你就唔好成日掛住你嗰EX啦。」
 
「咁刻骨銘心呀嘛,正如你提起你ex開心到成個開籠雀咁嘰嘰喳喳。」
 


「林小姐應該有第二段戀情lu,以前呢我喺高登出post佢都會mon住咖,然後再喺隔離post鬧我呃佢感情呵呵。不過最近佢好似冇mon我post睇我Facebook,我諗佢有仔lu,佢大我兩歲半。」
 
「佢一定仲mon住你嘅post同你Facebook咖!我家陣都成日mon住我ex Facebook,如果唔係都唔知佢同拍拖幾年嘅女朋友分手,我個下真係有少少開心,我喺度FF佢係因為仲鐘意我所以同條女分手。」
 
「你91年出世?幾多月生日?」
 
「係呀,我12月生日,係人馬座。」
 
頂,又撞,我都係91年12月出世。乜人馬座啲人都咁鐘意FF咖?
 
我同林小姐亦係冇見過面,係網戀。有次我特登買部IPhone上林佳君屋企送俾佢,但係又係唔見佢,我同佢講我月入三萬蚊我哋就拍拖啦,月入十萬蚊就談婚論嫁……可惜承諾只係戲言,我未曾搵超過兩萬一個月,所以一直好自卑,好驚佢大小姐嘅性格唔會接受到我。
 
咁啱林小姐又係住慈雲山,我一直認為高登嘅KingJer就係佢,我到講嘢一樣係mean mena哋,又好好笑,林小姐係有一種神神化化嘅特質,令人哭笑不得。
 
有次佢嚟M遲咗,佢打俾我,問我琴晚有冇對住佢打飛機,我話冇呀我都冇佢嘅相,佢就話我J佢把聲,我話冇呀,佢就話佢嚟M遲咗,我咪話係咪偷食背住我勾佬呀?佢就話我搞大咗佢嘅肚,我咪即刻笑到傻,大佬呀我都冇見過你點搞大你個肚?佢話我發夢梗係強姦佢!咁佢好鐘意儲七仔印花OK印花,我咪成日特登去七仔同OK買嘢,然後寄啲印花俾佢,咁佢通常都會回禮,真係見一次笑一次,第一次佢就寄佢啲頭髮俾我,第二次佢就寄啲過期coupon俾我,第三次竟然寄包下體清洗液俾我……前世我肯定做得好事多,上高登識到一個咁變態嘅絲打!但我又好鐘意佢成日發癲,好鬼正!


 
只要付出真感情,網戀都係戀愛,甚至比真實嘅戀愛更加令人刻骨銘心!