同曼喬順順利利行咗兩個禮拜IPHONE,有晚同曼喬搭車返去荃灣住所訓,無聊上高登望下,見到有個post好爆,請EX去婚宴…
 
我上高登其中一個習慣,就係search下林佳君嘅高登account有冇留言同出post,而同佢分手後嘅三年內,佢成日都提及我同鬧我,不過近半年就冇點見到佢留言。終於捕捉到佢開新post,我有少少開心,但又……百般滋味在心頭,林佳君要結婚啦。
 
我之前仲特登註冊多一個高登account,就係for見到林佳君新post留言講下嘢,於是我即刻login留言:「咪玩EX啦,咁尷尬,你老公都唔鐘意見到班襟兄弟啦。」
 
無聊喺樓下裝下信箱,發覺真係好多信,本來我都冇乜留意就直接拎返屋企,搭lift上到屋企,附近都探望過,確保冇人喺度裝,我先走去開鐵閘,手中堆信件當中,我發現有封信比較特別,仲要係手寫嘅字。我一拆開,OMG 係喜帖嚟……
 
「咦,咩嚟咖?」曼喬問
 


「我EX寄我嘅喜帖!林小姐呀!」
 
「Oh…你指林佳君?」
 
「係呀,佢結婚啦,請我去飲……」
 
「咁你去?」
 
「梗係去啦,點解唔去?呢世人可能最後一次見佢,順便都可以見下佢老公」
 


「發覺你每次提起EX都好開心,今次聽到EX結婚又會咁快決定到去,你唔似咁細膽呀。」
 
「呵呵,我鐘意佢呀嘛,得返一次機會見,唔見就冇機會啦。下個月先去啫,仲有一個月時間準備。」
 
趁曼喬沖涼而我轉身就喊咗,我諗我喊嘅係原因,第一係我終於徹底失去林佳君,因為就算我中咗六合彩我同佢都冇可能;第二係我覺得林佳君特登寄喜帖俾我,係想玩我定點?但我竟然都好想出席,我真係好傻。
 
第二日我哋順利行咗6轉,又袋1800蚊,放工後曼喬話帶我去見識下wor。
 
「我哋去睇戲啦。」曼喬翹住我手臂講,我有少少心動,定係受寵若驚呢?唔知。
 


「咁夜去睇戲?驚驚地。」
 
「有我喺度,你驚咩?嚟啦,毒毒安。」於是曼喬拉咗我入戲院。套戲好似係講星戰,原來戲院咁黑,得熒幕係光,套戲都唔好睇嘅。但點都好過啲合拍片,不倫不類。
 
「我哋仲扮緊情侶呀?」我細細聲喺曼喬耳邊講。
 
「今日天氣涼返啲,借嚟攬下係咪唔得呀?」
 
睇完戲,曼喬帶我去食嘢,嘩,今日曼喬成個主人咁帶我四周圍玩咁wor,食完嘢仲帶咗我去dup骨,我火星返嚟咁對呢一切都覺得好新鮮。
 
「生日快樂呀,傻佬!今日就係12月16日。」曼喬笑吟吟地捏我面豬登。
 
「呵呵,我真係冇睇日期!不過我好耐冇過生日lu。」
 
「你想我送咩生日禮物俾你?」


 
「我想你陪我買西裝買鞋,下個月再陪我去林小姐嘅婚宴。」
 
「車,呢啲都算生日禮物?不過我ok嘅。扮埋你女朋友啦,等你有得威下,嘻嘻。」曼喬輕輕搭我膊頭。
 
「咁四日後係你生日,你想要咩生日禮物?」我問。
 
「er……陪我遊玩香港。」
 
「好呀。等我哋搵多少少錢,一齊遊玩香港,我都想認識下香港呢個地方,住咗20幾年都唔知佢係乜樣。」
 
「我生日,我哋就請假一日,去旺角 去銅鑼灣 去尖沙咀 玩,ok?」
 
「我唔識路呀,你帶我去好冇呀?」
 


「0靚仔你玩嘢呀?嘻。」
 
「一齊減肥,一齊重新認識香港。」
 
「你減黎做咩呀?」曼喬眼仔碌碌望住我笑。
 
「上高登出post點解我冇女朋友,博同情呃下靚女絲打lor。」
 
dup骨場原來有得過夜,於是我就同曼喬要咗一個雙人床房間,老規矩又係拎啲枕頭擺係床頭中間,佢訓入面我訓出面。
 
「我幾驚林小姐上高登識人俾人呃,我一直追住佢account留過乜野言開過乜嘢post,聽佢話肥仔好好攬,又話佢男朋友養蛇好得意,又話識到個狗公,又話同巴打交換自拍等等……佢以前都冇咁鐘意上高登,同我分手後就成日喺高登講嘢,我都唔知佢係咪特登開俾我睇。」
 
「即係佢都一直有拍拖啦,係咪?」
 
「應該係掛,高登咁多叻嘅巴打,應該好易冧到佢嘅呵呵。我仲傻甘甘咁諗,如果佢俾人呃咗佢隻豬,到我搵返佢個陣我就可以同佢講,我俾返我隻豬俾佢啦。劇本應該係咁Happy Ending,點知佢結婚lu,呵呵,屬於佢嘅Happy Ending。」


 
「你話佢變態嘅,呵呵,即係點?」
 
「唔係個啲變態,即係話佢好鬼馬,以前我同佢成日玩寫信,我大大話話都收過佢過百封信,我銀包只袋住其中10封咋,信紙張張都唔一樣。佢真係好有心機寫,雖然大部分都係寸我鬧我,但佢都會冧下我嘅。正當我以為佢冧我啦,點知信封入面仲有佢嘅頭髮,指甲等等,好低能。」
 
「呵呵,你哋兩個真係搞笑。」
 
「咁我屋企有啲茶葉包幾好,我咪寄俾佢,佢就話我寄啲過期垃圾俾佢。嘩俾佢鬧足兩個禮拜,呵呵。但我問佢點解寄指甲嚟,佢就話知道我未掂過女人,未聞過女人除,咪俾啲頭髮同指甲我見識下,反指我冇良心唔識珍惜。我真係俾佢激死。有次佢就寄埋啲中學生物堂嘅圖俾我,介紹女性陰部wor,我收到之後真係笑咗好耐。」
 
呢一個生日,過得特別歡樂。