四日後,輪到曼喬嘅生日,佢話想去迪士尼,於是一早我哋就去咗。
 
真係新奇,原來入迪士尼喺搭特別嘅地鐵入去,成架車廂都係米奇老鼠。曼喬拎住電話狂自拍,車廂人都算多,佢捉我自拍,嚇到縮埋一舊。
 
「喂,好多MK仔MK妹望住我哋……」我細細聲咁對住曼喬講。
 
「邊有呀?好多大陸人wor。」於是我即刻鼓起勇氣稍微望下周邊,果然係好多大陸人。
 
「唔係咁方便呢!」我再閃,再避,逃離鏡頭。
 


「點嘛,你又有乜問題?」曼喬,唔理我驚繼續cam,頭挨埋嚟想自拍,我用手遮住自己側面。
 
「大家萍水相逢,合照好似唔係咁好,萬一你遲啲搵返你嗰ex,佢睇到我哋合照,懷疑我哋有咩咩點算?」
 
「咁咪等佢呷下醋lor 。」佢再捉我,我再避開。
 
「我咁大個仔都好似冇自拍過,唔識望鏡頭。」
 
「你係咪男人嚟咖?你咪再避鏡頭呀,我打你咖呵呵。」
 


「我其實真係唔係男人嚟咖,你當我女人啦,我哋做姊妹啦。」
 
兩條友就係咁喺車廂內旁若無人咁玩,我諗其他人一定以為我哋仲喺青春期小學雞,直到車門一打開,我即刻跑出去,呵呵,想我自拍?做我條女先啦。之後曼喬使出大絕扮嬲,又想引我中伏?我梗係扮唔睬佢啦,點知佢一見到我繼續走,佢就放棄扮嬲,喂我。
 
「乜澳洲冇迪士尼咖嘛?」我見曼喬黎到迪士尼後好雀躍,我第一次嚟都唔覺得有乜特別。
 
「冇呀。」曼喬拉住我行迪士尼專賣店。
 
坦白講,我真係對迪士尼既陌生又提唔起勁。大佬我男人嚟咖嘛,點代入迪士尼世界?如果呢度喺數碼暴龍主題公園我就會興奮返少少,因為我好鐘意仙女獸。不過曼喬喺隔離嘰嘰喳喳跳跳扎扎,我又覺得幾有趣。卒之我喺度望緊一件得意嘅鎖匙扣,佢就喺隔離偷影我。
 


曼喬突然上前捉住我,強逼我同佢發生第一次激烈自拍。
 
當我應承咗佢出去再自拍,佢就忽然拎個米奇老鼠嘅頭箍戴喺我頭頂,我想除,佢話如果我除嘅話佢就笑我食飯個陣會流鼻水。正所謂士可殺不可辱,我真係唔想食飯流鼻水呢件咁on膠嘅事情喺迪士尼內傳開,我唯有就範,但動作和表情好僵硬。
 
「我堂堂男子漢,戴住個米奇老鼠頭緊箍咒,成何體統?以後唔使出嚟見人啦。」
 
「你唔係話做姊妹咩?梗係要戴啦,呵呵。」曼喬左手拎住電話,右手搭住我膊頭,唔係wor,係攬住我膊頭,咔嚓一聲,自拍成功。
 
「你真係好鬼得意呀,個表情。成個小羔羊咁俾人屠宰前嘅無辜表情。」曼喬望住張相,笑到gag gag聲。
 
原本悶到嘔嘅迪士尼設施,因為有曼喬嘅陪伴而變得有趣。我充當人體模特兒俾佢捉住自拍,又或者充當cam man幫佢影相。
 
「收手未呀?行一步影三張,幾時先行得曬成個迪士尼呀?」我不禁發問,就好似啲學生咁催老師快Q啲落堂咁。
 
「咁我靚呀嘛梗係要影咖啦,呵呵。」


 
雖然帶住成皮嘢遊迪士尼,但我一件嘢都冇買,反而曼喬就大開殺戒,買公仔呀買得意飾物呀,搞到我要拎住兩袋嘢咁行,佢大小姐仲要沿途自拍,偷拍,拉我自拍。我以為佢會擺上Facebook同IG啦,點知冇wor。咁影嚟做乜,等拍賣呀?
 
坐低食嘢後,佢仲喺度影食物,於是我就搶走佢部電話!
 
雖然我唔知佢係咪講大話,但佢咁講,我又真係幾冧。唔好問我冧嘅點喺邊度,毒L不嬲都會莫名其妙地覺得好冧好sweet咖啦。
 
食完嘢,平排而行,忽然曼喬差錯步一個前傾,差啲仆街,好彩我扶住佢
 
「我好似扭親呀!我好痛呀!」佢把薛凱琪把聲勁0爹。
 
「咁……義氣行先,我孭你lor。」
 
一個肥仔孭起一個有少少肉地嘅女仔,其實唔可以話係輕鬆,佢問我想聽咩歌,然後喺我耳邊唱歌,唱我好鐘意聽嘅友情歲月。不出意外佢記唔到歌詞,我遞部電話俾佢Google,然後就喺咁行返去搭地鐵。
 


離開迪士尼後我同曼喬搭地鐵落旺角行街,同佢食街邊小食例如腸粉魚蛋燒賣,之後就入去朗豪坊。如果唔係嚟講,我真係唔知朗豪坊原來咁多衫埋,我長期住喺香港都及曼喬咁熟香港……原本我以為女仔貪靚買自己衫,點知佢第一時間帶我去揀西裝。拎住件西裝喺我身上打量,個下我真係有少少感冒,咁大個仔第一次有女仔帶我去買衫,平時我啲衫褲都係求表妹幫我買咋,連底褲都係我老母幫我買,可見我真係毒到核爆,高登最毒我認第二冇人夠膽認第一。sorry lor個膽真係好早俾人割走咗。
 
如果唔係曼喬喺我隔離,我諗我莫講話問價,連入店鋪都唔敢啦。最後揀咗一輪,試咗一輪,就買咗一套西裝西褲,幾件恤衫同皮鞋。
 
「曼喬,多謝你陪我嚟買衫呀。今日你生日仲要勞煩你,咁你想要咩生日禮物呀?我送俾你。」
 
「水晶球。」
 
「你講個啲玻璃入面有水,好多垃圾喺度飄忽嘅啲?」
 
「妖,唔係垃圾呀,喺靚靚公仔!阿Wing都好鐘意水晶球。」
 
「今日約佢出嚟lor。」
 
「唔啦,減完肥先啦。我地行去食啲嘢啦。珍珠奶茶我想飲,雞蛋仔我想食。」曼喬見到食物又兩眼發光。


 
之後我走去銀行,入咗5000蚊落戶口,然後過數俾老豆。雖然佢哋返咗鄉下,但我習慣咗過數,感覺過咗數就盡了自己做仔嘅責任。
 
打開Whatspp send咗兩條message俾老豆老母,同佢地講我好好,同埋入咗錢俾佢地應急。