「高登情緣」「港產片Feel」有一種愛叫做純愛。: 第二十五章

咁就過咗兩個月，我亦開始慢慢學識整點心，咁啱廚房有個廚房佬因為吸毒俾人拉咗，於是我俾師傅推上去出整點心。我冇諗過第一次整點心俾客人食，就成功過關，俾師傅大讚。
 
「安仔，你唔食煙唔飲酒，仲唔返大陸，點樣融入我哋嘅生活？」師傅問。
 
「唔啱呢啲，呵呵。」
 
「叫雞都唔啱？」第二個廚師問。
 
「我有女朋友。」老作下先，費事再認青頭。
 


「有女都可以一齊去叫雞咖，好爽咖。」
 
「呵呵，唔啦。」
 
廚房佬日日傾賭波賭馬，傾叫既，傾wehcat食女，我都係冇參與討論，沉醉於整點心當中，我相信我會越整越好味。
 
「5，,11，12，16，,21，29…… 呢六個號碼我每個禮拜都買幾次，六合彩呀嘛，5係代表我大曼喬五日，11代表我地係11月認識，29代表我地係29認識，12係我地生日月份，16係我出生日子，21係曼喬出世日子。所以我唔理獎金得800萬定8000萬，我都係買呢幾個數字，最叻一次中四個號碼派600蚊。
 
點知六合彩冇中，有一次是但買場馬中四重彩，4967 死狗碌柒，我純粹貪佢粗口諧音，咁就中咗成1300000
 


OMG，亂咁買都中百三萬。我第一時間諗起曼喬……
 
但係悉尼咁大，點搵？唔覺意俾我見到呢個世界有私家偵探嘅廣告，於是我就走去搵佢哋幫手，收錢嗰陣佢哋講到自己幾咁神通廣大，叫我提供照片同其個人資料，但係收錢之後就好似不了了之咁，每日打電話去問佢哋有冇結果，佢哋就話搵緊，同追問我有冇更多資料，例如知唔知悉尼邊個區。我屌！好似俾人昆咗幾萬蚊咁！
 
而我繼續返茶樓，每日如常。太子站唔只一個出口，好多我都試過，咁輪到試下A出口。一出就見到彌敦道大馬路，向左行就係去深水埗，向右行就係去旺角，於是我就開始試下A出口。沿途有好多店鋪，尤其係服飾店，我諗曼喬應該好鐘意呢啲，呵呵。
 
過馬路繼續行，遙遠見到一個服飾店舖外，一男一女喺度煲緊煙，煲完煙就入返店鋪繼續傾計。本來out forcus，但咁感覺似曾相識，我定神一望，好似曼喬wor。
 
正當我含著淚光行埋去，我發覺佢隔離嘅男仔同佢打情罵俏咁，於是我諗諗下，算啦，避開我原來係為咗重新開始，梗又係嘅，或者我一開始就係水泡角色，唔會係戀愛對象。
 


自此我開始集中喺A出口行，遙遠偷望曼喬但又驚俾佢發現。有時候一日行十幾次，就係為咗捕捉佢嘅一舉一動同表情。原來個個真係曼喬唔係人有相似呀！
 
見返佢既開心又失落，原來佢冇離開香港，匿埋係旺角開舖頭。但點解要block我唔理我呢？係咪我做錯乜嘢？算啦。話曬都開心過半年，我應該知足啦。
 
寄情工作啦，茶樓老細忽然話全家移民，所以要結業，班廚房佬個個哀嚎咁款。
 
「唔撚係呀？話執就執？十幾年啦！」
 
「屌，做得好哋哋。」
 
「租金升幅太多呀，冇計。」
 
平時我都好少參與佢地嘅討論，因為我唔想討論叫雞同食女等等話題，但係今日我忽然好撚man
 
「如果我喺旺角開間茶餐廳，唔係，係茶室，一樣賣港式點心同港式嘢，大家可唔可以過嚟幫手？」


 
師傅同其他廚房同事都好詫異我呢個平時好少講嘢嘅小朋友，竟然拋出咁認真嘅議題。
 
「好呀，我哋繼續拍住上。」師傅率先表態支持。
 
「叻仔呀阿安！」
 
「英雄出少年，廚房做老闆，好嘅嘗試！」