「高登情緣」「港產片Feel」有一種愛叫做純愛。: 第二十六章

而我就拜託師傅幫我去曼喬舖頭隔離嘅舖頭問價，冇諗過咁順利咁租到開舖位置。而我間舖同曼喬間舖只有一墻之隔，我特登就安排自己個廚房位貼住個墻。
 
而舊老細好好人，知道我開新舖，就送曬舊店鋪嘅廚具等等俾我。
 
一個月，就係一個月，喺曼喬店舖隔離開咗間茶室，取名為：OK茶室
 
 
 
開張大吉當日，我亦唔敢行出鋪頭，而係匿埋係廚房整點心：蝦餃，燒賣，牛肉，鮮竹卷。仲有親手整定腸粉，買靚嘅魚肉燒賣。好俾心機整定，而唔係整俾客食，而係擺喺我特設嘅愛心角落。曼喬最鐘意食呢幾位，啊，仲有黑椒雞扒飯，粟米班楠飯，係地盤佬鐘意嘅碟頭飯佢都啱，所以我set曬lunch set都係碟頭飯，碟頭飯加一盅兩件。
 


「Ken，幫我拎啲傳單俾隔離鋪嘅女仔，記住唔好話係我俾佢，你就同佢講，呢度有好好味嘅港式點心食。拜託曬。」我叮囑新請嘅waiter即刻幫我傳達嘅信息俾曼喬聽，張宣傳單張係我好俾心機整咖，一定會吸引到曼喬。
 
「好。」Ken收到order即刻過去派傳單。
 
幾分鐘後，我招Ken入嚟傾計。
 
「點嘛，個女仔有冇講啲乜嘢？」
 
「安哥，乜你想溝條女呀？呵呵。」
 


「呢啲嘢我自有定奪，你唔好爆響口，否則即刻炒你呀！點嘛，個女仔講啲乜？」
 
「話你聽，我有乜嘢著數？」呢個呀Ken竟然敢勒索我。
 
「加你人工呀，今個月開始額外多500蚊，以後你專門幫我負責招呼個女仔兼收風。」
 
「咁好呀？個女仔話一定嚟幫襯，仲問我點解知道佢鐘意食茶仔，條女笑得好甜。」
 
「咁你點答呀？」我有啲緊張。
 


「冇呀，咪話四周圍派傳單，附近嘅店鋪都派下。」
 
「Good Job！記得個女仔嚟咗你就通知我呀。佢張單你直接交俾我」
 
「收到」
 
Yeah，搞掂！我就開始等呀等，隔幾分鐘就喺門口邊裝下出面，曼喬嚟未呀，幾時嚟呀，出面坐滿人添仆街。
 
結果等到下晝落場，曼喬都冇過嚟食，於是即刻叫ken入嚟。
 
「人呢？又話一定幫襯嘅？」
 
「冇嚟，但佢蒲頭嘅男仔過嚟買外賣咋。」
 
「咁你唔通知聲？喔diu！」


 
「你又話係個女仔入黎先通知你。」
 
屌，晴天霹靂，曼喬唔過黎食，齋買返去食，我親手整嘅愛心電訊嘥曬心機……平時啲點心我邊會整得咁細緻呀救命！
 
仲有我特登就係等佢過嚟食，方便我偷望佢，我屌！。
 
「咁你拎部電話，去偷拍佢，俾幾張圖我望望啦。」
 
我即刻吩咐Ken幫手，人唔過嚟，有相睇下都好，冇諗到一墻之隔都見唔到入嚟，我啲心機嘥曬。