「高登情緣」「港產片Feel」有一種愛叫做純愛。: 第二十九章

得知曼喬有新男朋友後，我冇一日唔係喊住咁過，係呀，我係一個淚腺發達嘅男仔，大喊包，諗起曼喬就喊。我唔似啲有錢仔，佢哋由細到大要乜有乜，我冇咖，所以好珍惜我擁有嘅嘢。曼喬搬走，我連幻想嘅空間都冇，點會唔失落？同曼喬一齊嘅日子我嚟到呢個世界最開心嘅時期，教我如何唔掛住？
 
 
 
想起胡彥斌嘅歌，【婚禮進行曲】
 
「
 
你的FB表態把我攔在心外
我只能雙手放開無奈 無奈


把最後的疼愛做成了點心
親手讓它送進了你的口上」
 
疊埋心水繼續整點心，每日等曼喬嚟鋪頭食嘢，然後偷望佢。而我平時最愛貼住墻係度聽下隔離曼喬有冇動靜，雖然從來都冇聽到，但感覺一墻之隔，我哋那麼近。而我每日都好俾心機經營【舊的港產片新的影評】Facebook Page，cut啲舊港產片嘅精華片段擺上page，偶爾寫下影評，我硬係覺得曼喬一直有follow有睇，所以我好有動力地經營page。
 
期間爺爺入院，我即刻趕返鄉下探爺爺，期間見到爹地媽咪，佢哋問起我關於曼喬。
 
「陳家安，嗰女仔呢？你哋唔係拍拖咩？點解唔帶佢返嚟等爺爺嬤嬤開心下？」
 
「都話係朋友lor。」


 
「你冇心裝載下嘛？快啲拍拖呀你！」媽咪著急地催促我。
 
「知道啦。」
 
 
喺鄉下經過一個香火繁盛嘅廟，迷信嘅我即刻走入去跪拜，買咗幾幾十嘅香同捐咗香油錢幾百蚊，然後跪均曬廟內所有神明，保佑我屋企人，保佑林小姐，同埋保佑曼喬同佢男朋友：
 
「保佑曼喬同佢男朋友白頭偕老，幸福美滿，出入平安，長命百歲，身體健康，大吉大利……如果真係要有等價交換，我願意孤獨終老去完成呢份保佑。」
 


我都唔明點解我成日要同神明講咁多無厘頭嘅說話，但我童子嚟又誠心，加上食素，我諗神明一定會聽到，一定會幫我。
 
返香港後，我繼續好俾心機喺茶室度整點心，打理茶室。返到屋企就開著電視煲港產片VCD，或者上YouTube追舊片，見到好嘅片就cut精華upload上page介紹下。
 
有晚，茶室將近收舖，我喺廚房都執埋啲嘢，隔住廚房門聽到出面有個女仔話：
 
「唔該，我想要食魚肉燒賣，蝦餃燒賣。」
 
係曼喬！估唔到曼喬咁夜都特登過嚟食嘢，於是我開爐蒸野，不過佢男朋友就冇陪佢嚟。正當我蒸完隊出去，我發覺出面冇曬人……Ken呢？其他侍應呢？廚房就得返我一個，咁點算……曼喬喺出面。
 
即刻打俾呀Ken佢地都冇人聽，呢個時候廚房門被打開，我抬頭一望，係我朝思暮想，日掛夜掛嘅女仔—曼喬 大家四目交接，佢微笑，我報以尷尬的微笑。
 
「鐘意人又唔表白，又唔主動，死傻佬！」曼喬行近我。
 
「你點知我喺度咖？」


 
「有個死傻佬，明明發現我喺旺角開鋪都唔搵我，仲喺我隔離開茶室，嬲死你呀！」
 
「咁你點發現我咖？」
 
「點解會得我有得堂食平10蚊，其他人冇嘅？呵呵有日我咪問你個同事Ken，本小姐用咗600蚊收買佢，佢乜都同我講曬啦，佢話老細係一個四眼仔，肥肥地，個樣好敦厚，呵呵」
 
「二五仔!」
 
「點嘛，呢個moment你好似差我一句嘢wor。」
 
「人妻就唔好搵情夫啦。」
 
「Facebook嗰個朋友嚟咖咋，我用嚟激你咋，點知你個死傻佬見到都唔搵我，俾你激死啦。」
 


「你係幕後玩家呀。你又知道我會嚟旺角搵你呀？」
 
「好似我哋第一次喺見面，我見到你個傻佬為咗我喺機場搵咗幾粒鐘，我就知道你一定會搵返我，如果唔搵，我咪當係我地冇緣份lor。送俾你咖啦，傻仔。」
 
曼喬遞上一條圍巾，我攤開一睇，上面織住安同喬兩個字。乜唔係織俾呀Wing咖咩？原來愛一個人係要表白，而唔係收收埋埋，唔問就永遠諗餐死。我呢個愛情白癡終於意識到我錯咗好耐好耐。
 
我眼都濕埋，我行上前，我攬住曼喬，曼喬攬住我。
 
 
 
「我愛你，江曼喬！」
 
「我愛你，陳家安！」