「高登情緣」「港產片Feel」有一種愛叫做純愛。: 附錄二

第二章 （曼喬版）
 
「咁我真係冇Pay Pal呀，係咪唔可以留俾我啦？我真係好鐘意睇睇古惑仔3 廟街故事同都市情緣咖。」我笑住錄音回覆。
 
「YouTube都有得睇，何必買碟？」
 
「我屋企都有好多碟，我鐘意買碟，就好似上講故台睇完一啲好鐘意嘅故，如果佢出書我都會買。」
 
「我都係，不過最近手頭緊無奈之下先放碟，希望有心人可以好好珍藏。」
 


「sorry，但我真係好想要。」
 
「碟留俾你啦，見你咁有Heart收藏舊碟。」
 
「唔好啦，你都係放咗佢啦，我都唔知幾時返香港咖，唔該你呀巴打。」
 
 
講起手頭緊，我何嘗唔係手頭緊？Hinson做批發生意，我開服飾店，點知我屋企人以為我幾百萬開頭咁，成日榨乾我。我家姐，我大佬，我細佬……當我係人肉ATM咁，成日老馮咁要我科水……我辛辛苦苦儲嘅錢俾曬佢哋啦，我見到靚嘅袋，靚嘅耳環，靚嘅鞋都唔捨得買，話曬我都算係靚女呀，仲要後生，邊個女仔唔貪靚唔鐘意買靚嘢咖？有少女心好正常咖。
 
前排我家姐又俾男人呃，搞到佢爭一筆貴利，而我就搵Hinson幫我。本來Hinson都幾錫我，但係最近佢嘅生意頭頭碰著黑，仲要聽我朋友亂講我仲對Wing有嘢，咪成日借醉發我脾氣。相處耐咗，好多嘢都會見識過，我唔怪Hinson，因為我屋企的確麻煩到佢，而佢又以為我之後對ex有嘢，心情唔靚飲醉酒情有可原，只不過當我見到Hinson唔信我之餘仲咁對我，我的確係對佢有少少反感，可能之前佢喺我心目中有百二分咁多，但家陣扣扣下，應該所剩無幾。


 
我望住電視機隔離嘅水晶球，諗起以前返香港搵呀Wing，一齊去沙灘玩，用好多個水晶球砌成個心心，我哋坐喺入面望住個海，而佢彈吉他唱歌俾我聽。只可惜呢段感情，大家都差一個為愛情犧牲嘅勇氣。其實我當時真係好愛佢，如果我肯留喺香港，我諗家陣我避開曬班屋企人，亦相信可以過得比家陣快樂。但我一個女仔人家，住喺澳洲幾年，霎時間為愛逆屋企人意而返香港，所以我係有顧慮，同埋我呀Wing等我幾年，到時候我可以返香港搵佢，咁咪大家可以喺香港生活。但等下等下，就等到我男朋友Hinson嘅出現。而我同呀Wing因為性格不合而成日嘈，所以我先決定放棄呢段感情。你話冇諗起Wing就肯定假，如此刻骨銘心嘅純愛，點可能唔記得？但係我揀得Hinson，就係全心全意對Hinson一個，冇其他胡思亂想。
 
正當我喺廳入面諗緊嘢嘅時候，忽然一個硬物憾埋嚟頭度，好痛，我仲有啲暈暈啲。
 
「我咁錫你，你俾綠帽我戴？」Hinson發狂咁撲埋我度，我本能地擋開佢。
 
我真係冇諗過Hinson嘅妒忌心可以去到如此恐怖，之前我都可以當佢係飲醉發up瘋，今晚佢作出咁多反常行為，實在令人心寒。
 
「都話我個friend屈我lor，我冇，我真係冇呀！」


 
「Friend都會屈你？係你嗰Friend都睇唔過眼你咁過份所以爆你大獲。」
 
Hinson在此粗暴地捉住我，我幾經辛苦擺脫咗佢，疾步而走奪門而出。
 
我開起汽車引擎，淚沙沙地掉下，返屋企俾班怪獸親人問長問短再加奚落？No啦，唔可以衰俾嗰班人睇！
 
漫無目的地在馬路上行駛，經過一間coffee shop，我見到入面又係有啲好靚嘅水晶球擺設，於是我停低，落車睇睇。
 
每次見到水晶球，我總係難忘與Wing嘅一段情。真係好pure，好true，有今生冇來世。
 
再靠近一點點，就讓你牽手，，再勇敢一點點，我就跟你走。
 
「我想返香港搵呀Wing，離開澳洲呢個傷心嘅地方！」