見到自己鐘意嘅人開心,自己唔係應該都係開心?


點解,陳文輝佢係相反。


啊,我記得佢今個月會殺死阿敏。


咁點解明明鐘意人,都要殺死佢。






除咗極強大嘅佔有慾之外,我諗唔到其他解釋。


人類,就係咁奇怪?


越得唔到,就越係想將佢摧毀。





「喂,阿輝,做咩又眼甘甘望住阿敏啊,鐘意人啊?」陳文輝隔離一個男同學特登大聲講大聲笑。



補習社放學之後,陳文輝就偷偷一直跟住阿敏。而阿敏喺等紅綠燈個陣,舉起咗手上紮花輕輕聞一聞後,就展現咗花一般嘅笑容。但見到依幕嘅陳文輝‧‧‧個樣不憤又悲痛咁不斷握實拳頭、咬實牙齒。


及後陳文輝就跟到阿敏,跟到樓下先自己返屋企,自己一個搭地鐵返去。陳文輝佢住喺天水圍嘅公屋,佢每日咁好毅力由世界另一邊,搭兩小時地鐵去補習社都幾好嘢。


陳文輝佢一入到屋企就先托一托副黑框眼鏡,然後去廚房拎啲冷菜冷飯嚟食。






而我,就喺佢屋企繞行一周。


直到我行入佢間房,先俾眼前嘅畫面震撼咗。


成間房嘅牆身,有八成都係貼住佢之前偷影阿敏嘅相,不過佢全部相都列印哂出嚟,然後當海報咁貼喺牆上。其中有一張係之前佢哋去南生圍,佢影到阿敏一張充滿笑容嘅相,更加用大相架框起。

佢部電腦就更加精彩,成個桌面都係一系列文件夾,包括阿敏去任何地方、著唔同衫、做唔同嘢,陳文輝都秘密偷偷跟蹤住佢。


阿敏一直俾緊個變態佬監視住啊。






到底要對一個人有幾深入嘅迷戀先會痴成咁?

陳文輝好快返入房,每日浪費四小時地鐵車程來回嘅佢,辛苦咁攤喺張床上,望住牆上其中一張相嘅阿敏。



「我幾時先可以同你起埋一齊‧‧‧‧‧‧」陳文輝對住張相喃喃咁講。


突然,陳文輝好似諗到啲咩,而甜甜咁笑一笑,拎部手機出嚟用133打俾阿敏。


「喂?」另一邊廂,阿敏接咗來電。






陳文輝聽到佢把聲之後即刻掩住把口,好似極之開心。


「喂‧‧‧?」阿敏又問。


陳文輝突然以嘴唇整個親吻形狀,然後「啜」一聲,就即刻收線。


「‧‧‧」我都唔知點樣去評價佢嘅行為。