昨夜星辰恰似你: 3 .

終於挨到放學。

日日翻學等放學，翻到屋企，攰到訓咗係將床到篤手機，Loop ig , fb ，連登⋯

嚟嚟去去都係個啲post，唔係八卦放閃光彈，就乜都批評一餐。

「咦？」

鄭梓熙發咗張相，將相又係個啲點贊遊戲圖。





「mk妹」但係我都係like咗
「叮！。」鄭梓熙傳來了消息。

：第十個贊喎你，要買一個星期早餐俾我食😂
：你都癡線 呢啲都玩
：我唔理啊 
：咁咪唔好理

過咗幾分鐘，鄭梓熙依然無回覆。我唔耐煩咁點咗入聊天室





已讀？

好你個鄭梓𤋮，小氣鬼。

-
第二天朝早，我如常頭不掃面不洗的咁著件校服，拎住個空書包出門口。

落到樓下開始覺得唔對路，明明平時翻學應該周街都係學生。

我望下手錶。





「恭喜你個發財啦今鋪，又俾個鬧鐘伏咗」

都已經八點，我索性悠悠然然咁去到小巴站隔離個麵包店買早餐。

嘩，$5三個腸仔包。

我不知不覺咁夾咗兩份，即係六個，仲拎咗枝豆漿。

「今天食咁多嘅啊仔？」收銀啊姨奇奇怪怪咁望住我
「買俾朋友⋯啊唔係我自己食，啊唔係唔係」我都唔知自己乜。
「買俾女朋友啊？」啊姨笑我
「癡線，當然唔係」

-




係小巴上面我一直係到諗，我頭先急乜野。
唉算啦，麻煩。

八點三，準時到學校。

「笑面虎」黃sir叉住手咁企係門口，唔講真係以為特登迎接我。

為咗無咁柒，當然就咬住個包行入去同佢正面交鋒。

「陳永健。」佢又笑笑口同我講野，一睇佢個死人樣就不懷好意，笑裏藏刀咁。

「okok留堂班啊嘛」

「下次唔該你合作小小」講完佢就轉身走人。





「okok」我對住佢做咗個ok嘅手勢

橫掂，我都唔會去。

-

上到課室，我就丟袋包同枝豆漿俾鄭梓𤋮。
佢呆咗咁望住枱上面嘅早餐。 

「你⋯買架？」佢望住我
「係啊係啊，因為佢搞到我遲到」我不知覺咁R頭
「我鍾意食甜嘅包喎」佢笑住咁開咗枝漿
「我無打算再買俾你喎」
「一！個！星！期」佢啤咗我一眼





我無答，佢亦無再問。

-

「上個星期我已經改完，你地簡直係我教過最差嘅一屆D班」miss托一托眼鏡

「有人三分添」肥東偷睇完分數指住我捂住個嘴笑

佢係林志東，我由細到大嘅死黨。天生微卷豆髮，人如其名，典型肥仔。開口埋口一係乒乓球一係LOL，成績係叫好我少少咁囉，365日都係到擦啊sir miss鞋。

「有分就好好啦，你仲想佢點啊？」黃思付和

成班開始係到起哄，Miss拎本書好大力咁拍台，示意叫我地唔好再嘈。

「宜家派卷」





Miss順次序將分數由低至高咁派，當然第一個就係我，亦都只能係我。

拎完卷之後就用嚟摺紙飛機，唔係就用嚟遮掩，然後訓教。

「喂，你到底可唔可以認真少少？」鄭梓熙一路改正一路講

「又嚟」

我睇下佢份卷，85分。

「你以為個個都好似你咁，咁勁啊？」真係燥咗，搞到我好似乜都唔嗲唔吊咁

佢沉默。

我抬頭望咗下佢，見到佢臉上流露出嘅失望，我竟然有啲不忍。

「咁你教我囉」我繼續卟低係張枱度

「白癡仔」佢有啲愕然，然後用手摸咗下我個頭。

頂，咁大個仔都無俾女摸過頭，除咗我啊媽。

然後落堂佢又真係一題一題咁解俾我聽，但係聽聽下我就悶到瞓著咗。

今次佢無叫醒我，只係留低咗條紙條。
：喂陳永健，你想一世俾人睇死啊。

呢啲鼓勵說話真係好老土，但唔知點解我會不知覺咁笑咗。

我塞咗紙落褲袋就即刻9衝出學校搵肥東佢地一齊去網吧happy hour。

.
係好耐好耐之後我先知道。
有一種感情叫做比情人更親，親近到令你誤會係愛。
而當你鍾意上一個人，你就會唔忍心。唔忍心佢唔開心，唔忍心佢皺眉。
所以為咗令佢笑，你會選擇傷害自己。