那年，我在補習社遇上她..: 第三章 兄弟

7月26號，我地成班升f5嘅學生被逼翻返去學校補課。其實學校話就話係補課，其實只不過係求其搵個藉口逼我地翻黎。

我基本上由24號見到佢果刻開始，個心就一直諗著佢，成晚都差唔多冇訓過咁。所以臨翻學之前索性去7仔買枝redbull隊一隊佢，廢事陣間上堂訓著，比學校個老屎忽屌。

基本上成個朝早都冇乜特別，有時就聽下書，有時就諗下佢...可能係枝redbull問題，令我一d睡意都冇。但係到晏就就唔掂啦，兩塊眼皮好似裝左石咁，愈黎愈眼訓。開頭諗著趁食飯時間訓個靚教，點知一坐低無耐就比高佬俊一野拉跌張凳，成個跌左落地。

高佬俊全名叫鄧家俊，點解佢叫高佬?因為佢真係好L高，成193。相反，我只係得果168，行埋去成個minions咁。而條契弟除左識打波之外，仲識成日恰9我。不過大家都知呢d純粹係兄弟間嘅玩笑，都冇乜太介懷。

「傻仔，錄左你片啦，陣間就post上ig，訓得你咁開心」冇錯，呢個就係仆佳，佢全名叫林明佳，我地個個都慣左叫佢仆佳，可能叫下叫下叫順左掛，佢都唔係幾介意。



無錯，佢地兩個就係同我同班嘅交心老死，基本上我地有咩都會開心見誠咁講。我都幾信佢地，平時有咩都同佢地講，包括係上學期發生嘅果件事...
​

「喂，屌，咪撚搞啦，我琴晚冇訓過」我當然一黎就爆左幾句粗口以解怒氣。
「希哥，咪玩啦，你又唔打機，又唔係學霸，做咩搞通宵呀?」😏
望著高佬俊個奸笑樣，我都知佢諗緊d咩。
我輕輕拋低一句:無野呀，比我訓啦

始終，紙包唔著火，仆佳冇啦啦講:「你試下唔講，我即刻拖行成班corn 9你。」無辨法，仆佳就係咁仆街。



於是，我將24號補習社嘅事一五一十同佢地講。果然，高佬俊同我講:「得啦，你下次補習一野衝過去問佢拎ig，如果佢比嘅，咁咪得囉，同埋你又可以睇下佢ig有冇男朋友，進亦得，退亦得。」

我其實知我下一步應該要點做，只不過係...係我心入面驚條刺仲係到，即使對著補習社果個女仔，雖然我係真心中意佢，但係講真，來得快，去得快，我驚又會重蹈覆轍，話曬我都係人，我都有情感....

仆佳好似知我諗緊d咩咁，佢摒開左岩岩玩我果個笑容，單刀直入咁同我講:「陳逸希，你係咪男人黎，都過左成大半年咯，比人飛姐，有咩咁大不了，佢唔識珍惜你姐，唔代表呢個世界所有女仔都唔識珍惜你。依家你難得遇上一個一見鐘情嘅女仔，好應該把握呢個機會。唔通你諗著成世因為佢果件事而單身一世呀?機會話冇就冇，醒下啦，傻仔。」

我支吾以對，仆佳其實真係講得好岩，只係我自己仲未走出被人拋棄呢個陰霾...

「嗯...我知啦...」我唔識回應，只好輕輕拋低呢句說話。





佢唔識珍惜你姐，唔代表呢個世界所有女仔都唔識珍惜你。​機會話冇就冇，醒下啦....