第二日我同crystal拖著手咁一齊返學,臨近學校段路引黎少男仔羨慕嘅目光。當然,我同crystal都冇點理其他男仔。

我又點會估到你會轉得咁快.....

上到班房,高佬俊同仆佳第一時間就串黎串我

「威啦,希哥,有女大曬」 「食飯唔好搵我地呀,去食你個crystal啦」

大家兄弟都知佢地其實係講下笑,串完我之後又會聚埋一齊9下9下 。青春,最難能可貴莫過於身邊嘅兄弟願意放棄面子肯同你一齊癲,出到黎社會根本冇呢隻歌仔唱。




咁過左一個月,其實都冇乜特別—得閒就同佢去下睇戲,有時就接下佢翻學放學咁。

2015年12月25日
今日係聖誕節,理所當然地,我就約左crystal出黎食下飯,睇下戲。

「我幫你比啦,難得今日聖誕」
「唔得呀,你仲要養我一世架,你依家洗哂d錢,大個點養我呀」

crystal就係咁善解人意,我當時真係諗會同佢一齊長相廝守落去...



你仲要養我一世架....


2015年12月31號
除夕,我其實係琴日已經諗好左同crystal去邊,去完西九再陪佢去行下街,之後就去下海旁睇日落,夜晚就去倒數。其實都冇乜特別,都係普通情侶會做嘅野。

「行囉,死蠢」我去到crystal樓下,拖實佢隻手

佢今日唔知點解好似好唔開心咁,好似...好似有野瞞著我咁。



「你係咪唔舒服呀,冇乜聽你講過野嘅」
「冇..冇呀..」crystal坐係巴士上面,攬到我好實好實...

行左成日街,到左尖沙咀海旁,呢日特別多人,5點嘅時間已經見到有唔少人霸定位,等緊今晚倒數。應該係冬天嘅關係,日落時間特別早,所以到左5點已經見到成個天空染上左橙色。

「不如我地坐天星小輪去中環囉,我想玩個摩天輪呀」crystal成個細路仔咁講。難得見佢講返野,咁我梗係話好。
「好呀,傻豬」

上到天星小輪,我挨著crystal個膊頭,正當我差d訓著果陣,crystal捉著我隻手無啦啦同我講

「逸....逸希..你知唔知點解我今日好似好唔開心咁?」.
「唔知呀,做咩呀」
「我爹哋媽咪要送我去外國讀書,我1月15號就要走...」crystal講完,我見佢好似想喊咁
「吓,咁突然?」我當時好震驚


「其實我11月果陣已經知,我果陣中意左你...我唔想去到外國先黎後悔,所以我決定趁你生日同你表白」crystal講完之後,d眼淚滴左係我隻手到

我攬實佢,攬得好實好實....

「小火龍...我去到外..外國之後...你唔準唔要我架...」佢喊著講完之後錫落我塊面到。
「傻豬,點捨得唔要你呀」


我冇唔要你,係你唔要我...

之後果d日子,我地更加珍惜對方,因為大家都知要維繫一段long d唔係一件易事,大家見得一日得一日

2016年1月15號
crystal今日走,咁作為男朋友梗係要去送佢機。



「嗱,我去左new york之後你日日都要同我facetime,每日都要同我講做左d咩,每日同我講我愛你,仲有唔準識...」
 crystal仲未講完,我已經錫左落佢個嘴到—好似佢向我表白果日咁...

「我應承你啦,放心啦,我個心得你一個咋,點裝其他人呀?」
「好啦,算小火龍乖啦」

crystal走左之後,我基本上係冇得訓—因為紐約同香港係相差岩岩好12個鐘,換言之,我翻學果陣佢就訓教,而美國果邊就特別d,佢地靜係翻到下午2點—即係我由凌晨2點一直同crystal傾到朝早7點,因為得呢段時間我地先得閒。

其實每次我都好想訓,但係見到crystal傾到好似好興奮咁,我都唔忍心打斷佢。

而我地之間嘅裂痕亦都愈撐愈大....

其實每日翻到學校,高佬俊同仆佳都唔忍心見到我個殘樣,於是佢地每朝都會買罐咖啡比我。

兄弟就係咁,斬釘截鐵,唔會同你講假言假語



過多一個月左右,crystal就成日同我講學校好忙,好多野做,我地由一開頭日日facetime變到一個禮拜可能靜係打一次電話,每次可能連10分鐘都冇,而佢每次答都係答嗯 哦 係咩

其實明眼人都知係事..

我有日終於忍唔住,同佢傾傾下電話果陣

「crystal 我有野想問你」 「Devin,我有d野想同你講」

佢平時完全冇叫過我做Devin,其實佢咁叫,我已經知發生咩事。

我忍著淚水,同佢講:「你講先」

「不如我地都算係啦....我知你為我付出左好多...但係每次我真真正正需要人關心果陣,你又唔係我身邊,我想要安全感,但係你比到我咩?」



點解我付出左咁多你都可以視若無睹....

落力為你好,得不到分數...

黠解....明明我已經對呢段愛情珍至重之,你一句冇安全感就將我辛辛苦苦經營嘅感情一次就吹散佢...

我每日聽曬你講,定時定候打比你,每日同你講我愛你,點解你仲咁狠心離我而去...

你辛苦?你有冇諗過我辛苦過你幾多...


「嗯...我明白,我..我地都係做翻朋友」講完之後,我cut左佢線。大概,佢應該估唔到我依家淚流滿面。好似一個蕩失路嘅小朋友,對未來完全無哂方向感...

你比Hugo拋棄果陣係邊個陪著你?唔通你一啲都感受唔到我對你嘅誠意?

我仲記得果晚我生日,你係星空下對我許下諾言,唔通你連少少片段都唔記得?

你仲送左一條你親手織嘅頸巾比我,叫我唔準整唔見...

我冇整唔見佢,唔見嘅係我同你之間嘅感情...


我將條棗紅色嘅頸巾,擺左入我衣櫃最入最深果格,亦都順勢將我地間嘅感情好好封葬入去...


第二日翻學,高佬俊同仆佳見到我隻眼咁腫...問我發生左啲咩事...

我將我同crystal所有野同曬佢地講...

「屌!女咋嘛!我一個禮拜都溝唔少啦啦!今晚上我屋企啤啤佢,聽朝起身乜事都冇」仆佳疊著我膊頭咁講。

高佬俊都唔知可以做咩,見佢靜係猛咁遞紙巾比我。

朋友我當你一世朋友
朋友你試過將我營救


兄弟,在心中。

經過crystal件事之後,其實我唔係放唔低佢,只係..只係我心入面仲有條刺,驚又比人拋棄多一次所以先咁戰戰兢兢。






那動人時光,不用常回看...


待續...