那年，我在補習社遇上她..: 第七章 重遇( 1 )

其實自從上次仆佳係補課果陣屌完我之後，我都知自己唔可以沉溺係以前嘅傷痛。
 
所以我已經決定左—無論如何下次一定要問到補習社個女仔拎電話。如是者，我一直係屋企練習開場白
 
「hello 我叫Devin」...咁樣會唔會好突然呢?
「你好，我係陳逸希，你叫咩名」...咁樣又好似好老土...
 
無錯，我呢一個禮拜就係不停咁練習，但係我又驚，驚比人話狗公，又驚無啦啦咁問會好唐突。
 
我一直心諗:「船到橋頭自然直架啦，練練下就慣。」



於是，我呢一星期係咁對著塊鏡練句開場白—希望我嘅努力唔會付之一炬。
 
到左第二次補習，我gel好曬頭，專登著件靚啲嘅衫褲，著埋對aj就出門。
 
傻均係火車站一見到我就問：「喂，你搞咩呀，二度發育呀？gel曬頭又著到咁靚咁？哦，你係咩想識上次果個女仔呀？😏」
 
我心諗：仆街啦，比個on9均知道曬，佢一定會唱曬出去，到時咪個個都知我係補習社識女？仲有，佢咁撚on9，陣間都唔知會係個女仔面前講乜柒。
 
我同傻均講：「係呀，你陣間醒醒定定，唔該唔好拆我台。」


 
傻均對著我露出一個奸笑嘅笑容，答左我一句：「知啦」
 
 
到左補習社，我一直忐忑不定，明明自己已經練左好耐，但係依家個頭腦緊張到乜春都諗唔到。其實有時與其事事預先準備，倒不如自然發揮，始終人與人嘅溝通基本上係冇得去預測的。
 
我心急如焚，每當有人推開棟門，我都一定會望一望，心入面期待著係佢。但係，希望愈大，失望愈大。我同傻均由4點半一直等到5:00個staff播帶，都係見唔到佢…
 
「好啦，今日我地就講到黎呢到，live班嘅同學有問題嘅話可以直接出黎問我；video班嘅同學可以上我個fb page到問我。如果無問題嘅話，我地下個星期見。」
 


一堂，一堂就咁完左。我轉身望下四周，睇下佢係唔係到。由於我同傻均坐最頭果排，基本上我地成堂如果靜係望著前面係screen嘅話，我地係望唔到後面嘅人。傻均好認真咁聽書，而我都三翻四次想逼自己專心翻係個課堂到，但係無奈—我個心已經飛左去個女仔到。
 
上緊堂果陣，我一直強逼自己唔好望後面，驚自己會因為見唔到佢而失落，影響上堂。

但係其實即使我唔望，佢已經竄左入我個心到，點走到走唔到...

 
到左落堂果陣，班房上面靜返5個人，我同傻均，一個男仔同2個女仔⋯果2個女仔並唔係佢地黎⋯
 
「見唔到人好down呀？」仆街，傻均明知故問，我唯有尷尷尬尬咁講：「唉，咪提啦」
 
由補習社到屋企，我坐係小巴上面聽著歌，唔知點解，我直情係前所未有咁失落，唔知點解，我其實完全唔識佢，甚至連佢叫咩名我都唔知。我靜係知果幾日我真係好down好down⋯其實，我都唔知點解，我靜係見過佢一面，一面就已經可以令我魂夢牽縈…我，我真係好中意佢⋯
 
呢一個禮拜，我不停咁諗：如果佢第一堂只係調堂過黎上，咁我以後咪見唔到佢? 可能我地真係無緣....…無錯，我往往都係對未知嘅事情抱有負面嘅態度。
 



聽人講，係寂黑靜穆嘅晚上，當你抬頭望一望天上面晈潔嘅明月，第一時間係你腦海出現嘅果個人，佢就係你最掛念最中意嘅人.....

無錯，就係你....
 
之後個一個禮拜都冇乜特別，我照舊日日係屋企9 hea，得閒就打下機，落街打下波咁....我已經決定左唔再格硬練果兩句毫無意義嘅開場白，因為我知道，有緣嘅，上天一定會比機會我同佢傾計。



終於，到左第3堂，好似上一堂咁，我又係著翻果套衫，果套鞋...

到左補習社，我一直好似一個迷途嘅細路，不停咁望，希望見到佢....

「擦」— 係開門聲，我好似一個細路開一個彩蛋咁，既興奮又忐忑。



佢仍然著對全白roshe she run，唔同既係佢著左件薄薄地嘅 a&f 冷衫同一條普通女仔出街短褲，孭著個herschel書包，加上佢果張令人生醉夢死嘅容貌；我可以好很肯定咁講 : 佢係女神。

佢行左過黎..坐左係我同傻均前面....

我已經完全唔記得個阿sir講咩，因為我...我成程好專注咁望佢個背影...臉紅耳赤同手汗滿溢嘅我當時隻手仲震過貓王，無錯—我對著傾國傾城嘅佢根本無可能專心得到....

屏幕上面，個阿sir講返佢落堂時講開果句「​好啦，今日我地............​下個星期見。」係呢個時候，我先知道成堂已經完左。


我好想好想拍下佢個膊頭，起碼問下佢叫咩名都好....但係，望著佢，我就變到好似唔識講野咁...........其實，我只係驚....

對著佢，我根本就無可能好似平時咁....

於是，我又錯過左一次機會...







無錯，就係你....



待續...