那年，我在補習社遇上她..: 第十一章 相識.改變 ( 2 )
「望見你那天，只知心裏面已不能變遷…」係我手機鬧鐘嘅鈴聲⋯點解我會用回憶碎片呢首歌做鈴聲？因為呢首歌真係好代表我對佢嘅心意⋯
「嘩⋯頂，依家先八點，訓多陣先啦」我望一望部手機，心入面第一個念頭就係繼續倒頭大睡，但係又有另一把聲音不斷叫我起身⋯
「陳逸希，你唔係唔記得自己琴晚點解要set呢個鬧鐘呀？為左佢，為左angela啦」唔知點解，啲人話愛情係可以改變一個人，我個腦唔知點解一諗起angela,就變到一啲懸念都冇，即刻撥開我張被⋯去邊？去我平時從來未去過嘅自修室。
「喂衰仔，咁早起身做咩，你今日要翻學咩？」老媽子見我今日咁早起身當然嚇左一跳，因為平時返學我次次都懶著張床唔肯起，直到最後半個鐘先刷牙換衫，狗衝返學。
「唔係呀，我去自修室呀」
「吓？你食錯左咩藥，冇啦啦咁識諗？」連我老媽子聽到我講話去自修室果陣差啲感動到喊就知我平時係幾咁懶同埋啲成績有幾咁差。
因為你，我願意去改。
「早晨👉🏼👈🏼起身未呀」我去到自修室第一時間唔係拎啲書出黎，反而係開ig direct佢…
之後問左一句好都冇乜點睇過部手機，開埋飛行模式，因為我想真係成程投入咁溫，溫到econ果陣我連demand supply係乜春都唔識，其實個心都幾頹，但係一諗起佢，就知自己唔可以咁，為左佢，我一直同自己講要入U
一直溫一直溫，溫到去晏就2點，呢個時候先發覺自己原來早餐都未食，成朝靜係飲過杯奶。趁出去食飯果陣咁我當然就熄翻飛行模式，睇下wts ig咁。
「起左啦🙈估唔到你又會咁早起身wo」估唔到佢都幾好傾，起碼目前同佢唔會一句起兩個止，對我黎講都係一件好事
「冇呀，訓唔著咪起身囉😛」當然，我邊敢同佢講我真正目的係乜⋯
之後食完飯一直到我6點離開自修室都冇收到佢啲message。坦白講，即使你係等緊message，你個心一樣會好忐忑，你唔知佢下一個message係乜，你會不斷去諗如果佢咁覆，你會點覆等等杞人憂天嘅野。無錯，我果時就係係到估佢下一句係乜，當然，女仔嘅野我咁易估到嘅話我晨早就溝唔少女啦。
無錯，我就係忐忑左成日，我唔敢撳入去同佢傾計果個版面，我驚自己比人已讀…於是，我不斷係到諗：係咪我覆得唔好搞到佢接唔到落去呢？佢係咪有野忙緊呢？佢係咪同男朋友去拍拖但係一直唔post ig？如果我依家再問佢一句食左飯未，佢會唔會覺得我煩，跟著unfollow我呢？我其實係咪應該放棄，唔應該識佢呢？反正我自己都唔係幾襯得起佢…
由以上可見，你地可以得知我果時係幾杞人憂天同埋係幾負面⋯
「今日補左成日習，好攰😭」係呢個時候，我收到佢嘅ig direct message.
你永遠都唔會諗到女仔會覆咩。我心入面亦到放鬆左一下——至少佢唔係同男朋友一齊先。但係其實人地真係女神黎，即使佢有男朋友，咁都唔出奇，更何況我又唔係佢邊個，粗魯啲講句，關我撚事呀。
收到佢嘅message之後，其實我有少少驚喜，因為起碼佢將平常生活啲感受同我講。可能你地會覺得好不值一提，無錯，我未遇到佢之前都係咁諗，但係遇到佢之後就發覺同自己中意嘅人傾計，無論佢講咩都好，你都會一樣咁開心。
「😨唔係呀？！成日？今晚早啲訓呀，唔好再成2點先訓」
「係呀😭放心啦，我會架啦🙈」
於是，我地一直傾，我諗到咩話題（當然係走甜嘅話題）都一直同佢講，而今晚佢對我講得最多嘅果句就係「白痴🙈」
「死火，原來我唔記得聽日要去賣旗！」無錯，小弟係讀保良局學校，每年一定要去街上賣旗。題外話，其實每年幫保良局賣旗都唔知啲錢去哂邊，學校一年殘過一年，hi你個auntie，我地到依家全部電腦仲係用緊xp，平時上堂等部機load完，我已經可以打完個邊爐。好似拉得太遠，翻返黎先…
其實當時我好似已經諗唔到要講咩，咁岩仆佳無啦啦打比我問我聽日邊到等，我先記起聽日要去賣旗。
「咦？你都要賣旗呀？你咩學校呀？🙈」
「我保良局架🙈，痴線，啲旗年年都係紅底白字寫著保良局，我唔明點解仲有人肯買😛」我都唔係幾記得自己點解會打到呢翻說話，之後我同佢開始愈傾愈順，我地咩都講一餐。
「係囉，啲旗都咁舊，仲要係你個死蠢去賣🙈，會唔會連5蚊都賣唔到架😰」佢覆
「咩呀，我唔蠢架😒講到自己賣旗好似好掂咁😒」
「我賣旗真係好叻架，賣左半個鐘個旗袋已經重到拎唔到😆😆😆」
「😒唓，得把口」之後，佢就已讀我仲有off左line。我又開始驚，驚係咪我自己問題…
過左5分鐘到…
「嘩，搵到啦，你睇下東華啲旗幾靚😌」跟著佢影左幾幅旗仲有啲賣旗記念品比我睇，十足十一個細路咁。
「嘩，好靚呀😍」
「呢啲機會你恨唔到架啦😆😆😆」
原來一直傾，已經係凌晨2點...
「喂，你聽日唔係要去賣旗咩，做乜仲唔訓😠」
「唓，你岩岩都應承我今晚早啲訓啦，點知到依家都未訓😒仲好意思話我」
「咦，係wo🙈不過我唔理呀 你要訓左先架🙈」
點解佢無啦啦會咁關心我嘅...
「好啦 我去訓啦，你都早啲訓啦😠」我同佢咁講
「知啦🙈」佢覆
望見你那天，只知心裏面已不能變遷…
待續⋯⋯