Hep Five摩天輪近在眼前,卻比我想像中遙遠,我們跨越好幾條大街,走到腳都快跛,才來到Hep Five商場。


這商場最奪目,必定是裡面的那兩條紅色的巨型鯨魚,一大一小,掛於商場中心。


「哩個商場好似好鍾意紅色咁嘅。」BoBo說,原因是不單摩天輪、門口外牆,連裡面的鯊魚也是紅色。


「妳知唔知點解哩兩條鯊魚會面紅?」我說。




「點解.......?」她問道。


「因為佢地兩條魚見到妳,忍唔住.....」


我看她臉上有點喜悅之色,就知道自己可以流露勝利眼神。




「.......見到妳仲惡過佢地,作為鯊魚覺得愧疚所以臉紅。」


「我係問點解你會將佢地當成鯊魚嘅?佢地鯨魚嚟架啵。」


「吓?喔......咳,差唔多啫......」




「哼哼。想串我?」


來到乘坐摩天輪的樓頂,人流不算多,稍為排一排隊便會輪到我們。





BoBo曾經離隊去找職員,詢問一番後才回來。


「妳問咩呀?」




「我問佢大概玩幾耐咋嘛。」


「咁玩幾耐?」


「大概十幾分鍾。」


她忽然定睛地望著我,似是在研究什麼。


「其實你幾多度近視?」




「百幾度左右咁。」


「得百幾度,但點解見你好鍾意戴眼鏡咁?」


「其實又唔係鍾意嘅.....」我說。


「又係因為你女朋友呀?」她說,話語又如箭一般穿中我的內心。


「係呀......」




「喂你記唔記得你輸咗?」


「唔記得。」


「咁我提你,你係輸‧咗‧架!」


「咁妳想飲咩呀?」


她雙腳併攏,雙手放在背後,語氣輕柔道:「而家唔想飲啵~」




「咁妳想點呀?」我猜想到她必定打什麼主意。


她一手拿走我的眼鏡,然後自己戴上。


戴上眼鏡的她,就好像女中學生扮女教師的感覺,效果出來蠻好笑。


可是不知怎地,看見她戴上我的眼鏡,心跳好像變得頻密。


「我想你哩十幾分鐘,可以除一除眼鏡,咁樣去睇哩個世界。」


「但.......無眼鏡,我點睇景色呀?」








我沒有說過,你看的是夜景呀。