《逃學》校園遊戲逃生日記: 第一章-紅雨
《逃學》by雨天霹靂
第一章「紅雨」
我叫鄭俊峰，中四學生
今日落勁大雨
咁作為一個本土香港學生
梗係開電視睇下有冇紅雨架啦
不過大家經歷過都知
紅雨呢D嘢都係ff下好啦
真正大雨嘅時候永遠都只係得黃雨
我即刻收拾返書包，準備出門口
再等紅雨就真係博遲到，做人腳踏實地D好
係屋企行過黎用左15分鐘
我條校服褲同埋襪都已經濕曬
返到學校，我買咗個三文治入飯堂坐
我個死黨阿威，行咗過黎坐我隔離
「紅雨你仲返？都好，有多個SB陪我」
我真係嚇咗一嚇，應該都係fake架啦
「收啦，頭先睇明明黃雨」
「岩呀，5分鐘前岩岩轉咗，唔信你自己開手機睇」
我光明正大咁樣攞咗部手機出黎
（好彩冇訓導）
開咗「我的天文台」，又真係紅雨wor
「唉早知係屋企訓覺啦」
「夠鐘上去啦，睇下學校點安排好過啦」
08:30
我返咗上去4A，跟住就打鐘啦
照道理應該係班主任課
但係一個老師都見唔到
平時嘅早會宣布，都冇出現
坐係我隔離嘅係女班長林曉晴
佢長頭髮，斜陰，帶住一副黑色幼框眼鏡
大概160左右，每次見到佢都係攞住本書
有時都幾羨慕佢呢D品學兼優嘅乖乖學生
「班長你不如去校務處搵下Miss Lam」
因為唔熟，叫全名又好怪
所以我都係就咁叫返班長
5分鐘後，佢返咗黎
企咗係黑板面前，好似有嘢宣佈
佢臉色唔係幾好，應該係壞消息
「校務處冇人，我去咗隔離幾班，情況都係一樣，冇老師。」
與此同時，廣播器響咗「叮咚叮咚」
出現咗一把我從來未聽過嘅中年男人聲
「全校學生：956人
回校學生：671人
死亡：0人
逃出：0人
我依家宣佈遊戲開始，學校大門同後門都鎖咗，如果想試下爬出去嘅，後果自負。
俾你地其中一個離開方法：收集50張學生證，我相信你地每人有一張。祝大家挽得開心。」
在場嘅人，有D就顯出好驚嘅樣
有D唔怕死，諗住係後門爬出去
我只係不斷思考頭先嘅廣播。
「死亡」係咩意思，唔通真係會死人？
仲有逃出方法，收集50張學生證。
最多都係13個人走到
不過頭先嘅聲音好似刻意強調咗「其中」
即係有其他方法走？
不過如果有廣播，即係代表個男人一定係廣播室入面。
我依家應該點算
A-搵埋阿威一齊係後門爬出去
B-組成小組，商討下對策
C-獨自前往一樓廣播室