《逃學》校園遊戲逃生日記: 第二章 死亡
逃學》by雨天霹靂
第二章 「死亡」
上章選擇結果
B-組成小組，商討對策
C-獨自前往廣播室
我即刻去咗搵阿威
「如果頭先佢講嘅嘢係真嘅，咁我地要認真傾下點算」
阿威點頭表示贊同
我同佢分別搵咗林曉晴同李若琳加入我地
（李若琳係阿威暗戀果個，嘻嘻）
我地坐咗係課室一角，我率先打破沈默
「我地依家要去檢查下大門同後門，如果真係鎖咗嘅話，就要報警，呢個工作我會交比兩位女仔。」
「阿威，你負責校務處同教員室睇下有冇老師，順便睇下有冇D有用嘅資源。」
「我會去廣播室睇下，或者會有D線索。
大家飯堂集合」
我地四個將手搭埋一齊，講咗聲加油
跟住就開始我地各自嘅任務
我落咗去一樓廣播室
廣播室入面好整齊，完全唔似有人黎過
我睇咗CCTV，依舊係見唔到任何人
唔通個男人係出面控制個廣播？
我咩頭緒都冇，諗住行返落去飯堂
呢個時候，我見到後門有2個F.1學生
佢地冒住大雨，諗住爬上圍欄離開
兩聲清脆嘅槍聲快速響起
果兩個學生頭部中槍倒地
狙擊手？而且唔止一個？
冇可能咁快連續發出咁精準嘅兩槍
跟住發生嘅事令我更為震驚
有2個應該係高form嘅學生衝咗出去
翻找佢地嘅屍體，攞走佢地張學生證
依家死左人，佢地仲有冇人性
或者呢個先係依家應有嘅態度？
我冇諗咁多，加快腳步落飯堂
飯堂
曉晴同若琳帶住一副驚恐的表情入飯堂
「我地去睇過，大門同後門的確鎖咗，電話收唔到信號，而且頭先大門果度...」
佢地好似受咗驚嚇
諗返起頭先後門嘅事
應該大概估到佢地見到咩
「得啦我明啦，但係係咪確定電話冇信號？有冇用另一部試下？」
「有，但係結果都係一樣。」
「唔出奇，我懷疑有人控制咗呢度嘅通訊」
阿威依家返左黎，手上攞住4舊黑色嘢
「咁就啱啦，校務處同教員室冇人，但係我搵到4個對講機，多謝我啦」
我向佢反咗個白眼
「叮咚叮咚」
廣播器再次傳出果個男人的聲音
呢個時候，我即刻衝去廣播室確認
「都叫咗你地唔好爬出去架啦，仲有想出去嘅人自便。
回校學生：671
存活：666
死亡：5
逃出：0
依家宣佈第一個遊戲-「迷惘」
你地要自己摸索遊戲規則
呢個當係熱身，之後會更好挽
有5個人已經幫你地觸發咗第一條遊戲規則
1.嘗試離開學校者死
2.未知
3.未知
呢D規則如果有人觸發，就會公佈
最後仲有一條隱藏規則
整個遊戲持續一個禮拜，祝大家好運」
不出所料，廣播室入面冇人
一定係出面嘅人控制咗呢度嘅廣播系統
我返到飯堂，好認真咁樣講
「聽著，依家係要係學生生存一個禮拜，唔係去camp咁簡單。我地一定要有足夠嘅食物，所以依家要去小食部攞返D物資」
阿威問：
「我地係咪應該要有返個組名呀」
「岩，我地就叫 威風 啦，我地兩個個名嘅諧音」
本身諗住講下笑，見冇人反對，呢個就變左我地嘅組名（真係好膠）
「咁各位，我地4個之後嘅目標會係咩？」
A-趁夜晚行動，偷學生證，儘快攞到200張之後走人
B-以探索遊戲規則為目標，決定用「其他方法」離開學校
C-佔據所有資源，並販賣資源獲取金錢同學生證