【天使之戀 - III】《公主道上與天使訂立永恆婚約》: 愛裡沒有恐懼

 
同一時間 何文田會堂
 
Henry來到何文田會堂，一回到樓下，便剛好碰上佩君，她一副喘著氣的樣子。
 
「Henry，起到既?」：佩君問道
 
Henry答道：「係啊，傳教士叫我返黎玩啊嘛，話今晚開聖誕party喎。」
 
佩君問道：「見唔見瑤瑤啊?佢走左未啊?」


 
「下?!」Henry說道：「Catherine今日下晝冇番學喎。」
 
「咩話?!」佩君瞪大眼睛，看著Henry問道：「佢冇返學?!請病假定係點啊?」
 
Henry答道：「冇見佢有咩身體唔舒服戴口罩喎，佢上晝都有番學，但下晝就唔知做咩唔見左人。」
 
佩君擔憂道：「我行勻哂四層都唔見佢，佢平時放學日日都會即刻返教會，好少會返屋企架喎。」
 
就在這時，阿楊剛好也走進會堂，他不以為然地說道：「哇，企哂起到，咁人齊既?」


 
佩君對阿楊問道：「喂，阿銓點啊?精神返啲未啊?有冇搵Catherine啊?」
 
阿楊說：「搵咩人啫?阿銓咪又係話要專心讀書，準備A-Level，咩人都唔理。呢排都係咁啦佢，尤其呢兩日特別cool。」
 
佩君聽後苦嘆了一口氣，阿楊續道：「啱啱我臨走前，Catherine黎搵阿銓，但阿銓唔起到，佢就眼濕濕咁放低左封信同條頸巾落佢櫃桶到。」
 
佩君聽後呆呆地看著阿楊……
 
「失戀姐下，時間會沖淡架啦。」：阿楊說道


 
佩君焦急道：「唔係啊!我硬係有啲不祥既預感，最驚係個傻妹自己諗埋一邊，唔知會做咩啊。」
 
「總之佢好少會咁啦，我去佢屋企睇佢先。」：佩君離開了教堂，走向愛民邨。
 

我來到芷瑤家門前，按下門鈴，但無人回應。
 
我不禁嘆道：「屋企都唔起，仲可以去邊啊?」
 
我無奈地離開，但是......
 
等等!
 
她不在學校，也不在教會的話，除了自己家之外她還能留在哪裡啊?


 
我其實有她家門的鑰匙。
 
我深呼了一口氣，然後轉身回去，拿出鑰匙打開芷瑤家的門，於是就在我拉開門的一瞬間，眼前的景象使我驚呆了......
 
芷瑤躺在地板上，不省人事，她的血正不斷從左手手腕流出，把她的校裙染紅了一片！
 
「芷瑤！！！」
 
……
 
佩君心亂如麻地打電話呼叫救護車，學習過急救的她立即嘗試為芷瑤的手腕止血，包紮她的傷口。
 
醫護人員很快到場將芷瑤送到最近的醫院，經過一輪搶救後，芷瑤......
 


幸運地被救活過來。
 
大量失血的芷瑤躺在病床上，臉色蒼白得可憐。坐在床邊的佩君尚未從剛才的打擊中回復過來，她精神呆滯，雙手都在震顫著。
 
黃柏楊、Henry、梁醫生和蘇Sir也很快趕到來醫院。梁醫生和蘇Sir都是在何文田看著芷瑤長大的人，看到她這樣子，簡直心如刀割。
 
醫生走進來病房解釋情況，說：「病人割腕既位置唔準，好彩既係有你及時同佢包紮傷口同call白車，所以放血既時間唔長。病人而家已經冇生命危險，吊一晚針就可以架啦。」
 
醫生看著大家，黯然道：「不過最重要既都係防止佢再次自殺，要帶佢睇心理醫生；搵人陪住佢，唔好比佢自己一個；同埋幫佢穩定返情緒。」
 
「嗯，唔該醫生。」：蘇Sir答道
 
「親屬請跟我過黎登記一下啦。」：護士說
 
……


 
醫生一片白色的死寂，病床上躺著一位剛剛才嘗試自盡的女孩，這悲慘的氣氛使大家都透不過氣來，這感覺是如此沉重。
 
「係我衰既，」阿楊先開口說：「佢黎課室搵阿銓果陣，擺明係有野既，我又冇理到佢；果陣其實應該至少試下開解佢既。」
 
Henry生硬道：「平時起學校剩係見佢唔多講野，唔想理人咁，我真係唔知……唔知佢原來已經抑鬱到呢個程度。」
 
佩君黯然說：「佢以前起學校成日比人欺凌架，係阿銓幫佢出過一次頭，班入面啲人先冇咁猖狂，唔郁手整佢。」
 
「冇郁手啫，」Henry說：「不過口都係照講，而且平時啲人好明顯係排斥孤立佢。我見係真係得阿銓會當佢女仔咁錫。」
 
Henry續道：「銓哥要頹到幾時啊?佢明明就中意Catherine。」
 
佩君無力地按著額頭，苦惱道：「而家最重要係何正銓啊，芷瑤佢好純，已經完全係愛何正銓愛到傻左啦。何正銓只要一日仲係咁對芷瑤既話，芷瑤心情係唔會變好架。」
 


阿楊說：「千祈唔好逼阿銓，始終佢啱啱失去父親，佢情緒崩潰係無可厚非，呢個冇得講，係需要時間去恢復架。」
 
「而家呢個時候，千祈唔好同阿銓講話Catherine自殺，」阿楊說：「你突然同佢講話Catherine因為佢而自殺既話，阿銓而家咁既狀態，一定承受唔到架；到時盞佢更加冇辦法同Catherine變番以前咁。」
 
「你講得啱既，呢點的確要注意，」Henry看了看阿楊，看了看佩君，問道：「咁而家啫係點啊?」
 
「你問我啊?」佩君苦嘆道：「我知就唔會搞成咁啦。」
 
「咪咁講啦，唔關你事既，」阿楊說：「而家惟有你24小時陪住Catherine，令佢冇易感到孤獨，同埋防止佢再自殺多次；我同Henry就輪流approach阿銓囉。」
 
佩君苦惱地點了點頭，說：「暫時惟有係咁啦。」
 
過了一會兒後，虛弱的芷瑤緩緩地張開了眼睛，活了過來。
 
佩君激動地抱著她，哽咽地道：「你個傻妹黎架!有咩唔開心咪同我講，同梁醫生Sir講，同蘇Sir講，同傳教士講囉!做咩搞到要自己做傻事啊?!」
 
芷瑤聽後也不禁落淚，佩君罵道：「你下個禮拜就生日啦，你生日變左要你阿媽同你搞喪禮？你想喊死佢啊?!」
 
Henry生硬道：「係囉，大家同班，有咩咪……同我地講囉，唔洗……唔洗搞到咁架嘛。」
 
「阿銓中意你架，佢好中意好中意你架，」阿楊勉強地笑道：「佢個傻仔起到鑽牛角尖喳。」
 
……
 
晚上阿楊回到家後，立即在MSN上傳給阿銓一段信息。
https://www.youtube.com/watch?v=nwObYQkSC8w
 
「Hey man!」：楊
 
「Hi」：Vergil
 
「my friend，聖誕假有咩搞啊?」：楊
 
「溫書，A-Level。」：阿銓給出一個大家意料之中的答案。
 
「教會組織聽日一齊去扶康會做義工喎。」：楊
 
「好。」：Vergil
 
 
翌日早上
 
不少教友、男女青年和傳教士在早上便集合在何文田會堂。阿楊和Henry也到場了，他們已經有周密的計劃來喚醒阿銓。
 
阿楊和Henry商議道：「當然唔好直接同佢講話Catherine為佢自殺啦，不過施加少少壓力，話比佢知Catherine有幾愛佢係OK既。佢根本就中意Catherine。一步一步咁引導佢。」
 
大會主持人喊道：「好多謝你地咁多位今日黎呢到做義工啊，首先我地就會包禮物既，每個袋就放一粒朱古力，兩粒糖......」
 
大家開始圍在桌邊，在工作人員的指導下幫忙包起禮物來，Henry看著時機，立即走到阿銓身旁。
 
Henry打開話題，說：「喂維吉爾，我沉日同馮佩君傾左陣，終於八到徐嘉俊既真相啦，原來事情唔係我上次同你講咁架，你絕對唔係比人收兵架!」
 
「......」：阿銓聽後一臉愕然，一時間說不出話來回應。
 
過了幾秒後，他才遲緩道：「是但啦，我都唔中意佢啦。」
 
「你成日八咁多無謂野。」：阿銓補充道
 
「咩無謂啫?你中意人，人地都中意你啊!」Henry說：「個徐嘉俊老豆原來就成日向Catherine阿媽買豆腐花，一買就買好多拎返公司比佢啲伙計食。所以徐嘉俊細細個就已經見到Catherine，並且對佢色心大起。」
 
Henry續道：「Catherine生得越大就越靚女，個徐嘉俊亦都因為咁，對佢越黎越唔規矩；Catherine就只可以擋下避下，因為始終係阿媽盤豆腐花生意既大客，所以唔敢得罪佢。」
 
Henry誇張道：「但係有一日，有個叫維吉爾既男仔發佢脾四......」
 
阿銓抬起頭來，意味深長地看著Henry，Henry續說：「因為維吉爾鬧佢同徐嘉俊咩，所以Catherine第日就同徐嘉俊決裂。點知徐嘉俊即刻發癲，想佔有Catherine!」
 
說到這裡，Henry刻意止住了口。阿銓驚訝地看了看Henry，問道：「咁佢點啊?」
 
Henry說：「好彩呢，就有個好緊張Catherine既男仔，曾經教過Catherine兩招防狼術。Catherine起果個危急關頭就成功咁用果兩招掙脫徐嘉俊既魔爪。」
 
Henry把手放在阿銓肩上，說：「所以其實阿俊只係一個變態追求者。」
 
「......」阿銓有氣無力地說：「你講啲野，我都係信三成就算。」
 
「妖!」Henry補充道：「消息來源係馮佩君啊!絕對真實。」
 
阿銓聽後愕然地抬起頭來，他雖然不完全相信Henry，但這些關於芷瑤的消息若是佩君所述的話，那便截然不同了。
 
無謂再關心你，我沒資格慰問你；
 
「我要認真讀書，今年A-Level啦。」：阿銓敷衍道
 
「頂你咩!睇你個款，讀完中學你都係想做傳道，唔係讀U架啦。扮哂野咁咩A-Level為重。」：Henry說
 
無謂再騷擾你，我沒這塊厚面皮；
 
Henry和阿銓從小就一起在大埔長大，他深知阿銓是位忠信的男青年，也知道阿銓一直夢想在中學畢業之後外出傳道。
 
阿銓被問得啞口無言，其實他最清楚自己有多愛芷瑤，只是這處境對大家都有點尷尬，發生了這麼多事，他一時間也不知如何面對芷瑤。
 
無限次對不起，放在心裡等心死；

Henry勸道：「唔好咁頹啦!去氹下Catherine啦，人地女仔黎架嘛。」
 
「嗯......」：阿銓點了點頭。
 
難道我與他相比，尚有一線生機?
 
阿楊「恰巧」地來到兩人之中，問道：「又講Catherine啊?」
 
「係喎啱啦，」阿楊拍了拍阿銓的肩膀，說：「沉日放學果陣，Catherine黎送聖誕禮物比你喎，不過你唔起到，所以佢剩係擺左起櫃桶。」
 
阿銓瞪大眼睛看著阿楊，問道：「聖誕禮物?咩黎架?」
 
阿楊刻意不告訴阿銓，說：「你放完假番到去咪知囉!」
 
阿銓聽後一臉無奈，內心卻是百感交集。
 
就在阿銓這心亂又心癢的時刻，阿楊再裝作不以為然地補充一句說：「鬼叫你平時唔理人地，放學時又一支箭咁鏢走咩!」
 
「佢......放左咩起我櫃桶啊?」：阿銓好奇地問道
 
阿銓話音未落，Henry便立即指著阿銓，笑說：「又話唔中意人?睇下幾緊張!口不對心既銓哥!」
 
......
 
Henry和阿楊的這幾句台詞聽似簡單，其實是經過阿楊的精心構思才得出的，能夠牽引阿銓的心，勾起她對芷瑤的愛。
 
一整天的義工工作完結後，大家回到何文田會堂用餐。長年缺乏家庭溫暖的阿銓罕有地可以和大家一起用餐，再加上白天那有意義的義工工作，他整個人也沒有那麼消沉了。
 
用完晚餐後，大家陸續離去。文化廳角落的雜物房的門突然開了，佩君從房中走出來。佩君和阿銓都驚奇地看著對方。
 
「阿銓？」：佩君說
 
「原來你......一直起教堂架？咁晏都未走既？」：阿銓生硬道

「芷瑤病左啊，陪佢囉。」：佩君嘆道
 
佩君裝作對幾天前阿銓和芷瑤發生過的事毫不知情，她故作自然地呼了一口氣，指著雜物房對阿銓說：「你黎得啱啦，入去睇住瑤瑤先啦，佢啱啱訓左。契姐我成晚連廁所都未去過。」

阿銓驚訝地看著雜物房，但佩君不給他時間反應，便直接離場走向女廁。
 
「下?......」：阿銓呆道
 
……
 
阿銓心亂如麻，完全不知如何面對芷瑤，但還是一步一步地走向雜物房。
 
他輕輕地推開門，久違的小公主又再一次出現在他面前。芷瑤正躺在床上安祥地睡著，她像個小女孩般緊緊地抓著被單，深棕色的秀髮襯上白晰的臉，楚楚可憐到極點。阿銓不禁屏住了呼吸，心「噗噗!」地跳起來。
 
一股淡淡的櫻花香從芷瑤的秀髮傳來，還有那股醉人的少女體香亦是同樣的沁人心脾。酣睡的芷瑤微微地張開了嘴巴，這純真的臉毫無防備地對著阿銓，使阿銓的心越跳越快。
 
阿銓感慨地坐在床邊，靜靜地凝望著芷瑤。
 
阿銓溫柔道：「你幾時都係咁可愛......」
 
「對唔住，近排發生左好多事，我自己都好亂，」阿銓嘆道：「好多時我都唔知自己到底想點。」
 
「我......」
 
這時，睡著的芷瑤發出嬌喘的「嗯哼」聲，平躺著的她把身子轉為側躺，面對著阿銓；阿銓的心頓時怦然地跳起來。
 
芷瑤的天使髮亂了，落在她的唇邊，這模樣看得阿銓臉紅耳赤，全身發燙......
 
呆呆地看了她一小時後，阿銓靜靜地為芷瑤蓋好被單，離開教會，乘170巴士回家。
 
當然他不肯放手。如果準我，重新學過可會白頭?

他坐在上層的第一個座位上，他雖然已坐過這趟由何文田駛往沙田的巴士無數次，但仍然最愛坐在這裡細看沿途風景。
 
由此可知，維吉爾是個念舊、長情且專一的人。
 
我不配。         
 
然而在巴士駛經九龍塘時，阿銓從左方的車窗外看到一座金色的天使像，那是歌和老街上一座建築物的頂部。
 
阿銓逃眺著這天使像，無比感慨地回想起自己在暑假時完成暑假傳教士工作後的情景……
 
-------------------------------------------------------------------------------------------------------------------
我站在這裡，看著對面歌和老街上這座聖潔高貴的白色建築物，頓時感到萬分感慨......
 
我凝望著建築物最頂部的金色天使像，立下莊嚴的承諾：
 
我何正銓，一定要做兩件事，並以此為我人生中最大的目標。
 
第一：我將來長大後一定要當一個全職傳教士；
 
第二：我要在這香港聖殿中，與自己最心愛的女孩訂立永恆婚約!
 
如果可以的話，我希望那位女孩會是傅芷瑤。
-------------------------------------------------------------------------------------------------------------------
 
明明是我面對著聖殿訂立過的神聖誓約，難道真的這麼兒戲就結束了嗎?
 
要把這天使迎娶過來的確一點兒也不容易，但我就做不到嗎?
 

同一時間 何文田會堂 雜物房 馮佩君
 
我守在芷瑤床邊，雖然已經精疲力竭，但我還是盡量留在她身邊。
 
這幾天我每次一閉上眼睛，腦海中便浮現出芷瑤躺在血泊中，不省人事的影像。那一幕就如惡夢般不斷在我眼前重現，我也不知這會不會再次成為現實。
 
現在的我極度精神緊張，生怕自己一離開芷瑤，她又可能會割脈。
 
「Vergil!」：芷瑤的一下叫聲使我驚醒過來。
 
「Vergil…」：芷瑤睜開眼睛，苦澀地叫著他的名字，看來又做惡夢了。
 
「傻妹，發夢喳下?」：我苦笑說
 
芷瑤哽咽道：「Vergil唔中意我……」
 
我哄道：「梗唔係啦傻妹……」
 
 
愛裡沒有恐懼。
 
如你恐懼，就是愛得不完全。
 
愛既完全，就怕恐懼除去。