【天使之戀 - III】《公主道上與天使訂立永恆婚約》: 人類荒謬

 
時間就這樣過，阿銓依舊在思考著自己的人生，芷瑤則是每天活在深沉的傷痛之中。
 
雖然芷瑤每天都有佩君和梁醫生等教友的陪伴和呵護，但這只能確保她不再嘗試自盡罷了，她的心情其實沒有任何改變，直到她要假期結束那天亦是如此。
 
這天早上，芷瑤要再次面對校園生活了，而且這天是她的生日。
 
芷瑤還沒起來，母親就已經提早起了床，在廚房忙著煮什麼。
 
「瑤瑤等陣啦，等陣啦!好快得架啦!」：母親說


 
芷瑤家裡十分窮，大家明常都有沒什麼好的東西吃。但原來母親因為今天是芷瑤的生日，所以特意煮了一頓有肉有蛋的豐盛早餐，裝在盒子裡給芷瑤。
 
「生日快樂啊瑤瑤!大個女啦!」母親說：「拎返學校食啦，唔好食豬仔包啦!」
 
芷瑤感慨地點了點頭，把這生日禮物珍而重之地放進書包裡，便起程上學。聖誕假期完了，佩君也不能陪伴她了；芷瑤又回到孤獨一人的境況，雖是生日，她卻只能獨自寂寞地走在街上。
 
回到學校後，她不是先回課室，而是走進飯堂享用母親特別為她生日準備的早餐。這是她整天中，唯一算是高興的事。
 
然而冤家路窄，她還剛開始吃，徐嘉玲和她的朋友也到了飯堂。


 
「青山魔女居然起canteen?好少有喎!」
 
「佢唔係平時中意食豬仔包架咩?」
 
徐嘉玲看著芷瑤的背影，回想起放假前與她的衝突；嘉玲仍然懷恨在心，不忿道：「條死窮喱果日推我落地下......黎canteen食野?」
https://www.youtube.com/watch?v=wPGCIqt_klw
 
芷瑤正低著頭吃著這碗載母愛的麵條，不知道周圍的情況；徐嘉玲走到她面前，無情地搶過芷瑤的碗，直接一下把它反轉在桌上。
 


手還握著筷子的芷瑤痴呆地看著桌面，看著自己唯一的生日禮物就這樣在桌上爛成一團變為廚餘，這對她可是晴天霹靂。
 
「啊，Sorry啊，無心架，」徐嘉玲拿出一張港幣壹佰圓，丟在桌上，輕笑道：「賠返比你啦!」

然而這次情緒崩潰的芷瑤卻沒有像以前那樣失控，她累了，這次她只是單純地坐在原位，嗚咽地哭起來，脆弱地哭著。
 
小公主毫無尊嚴地坐在這裡，嗚咽地哭著，然而就在這一刻……
 
「啪!」的一聲響起，是一位男生直接扇了徐嘉玲一耳光!
 
徐嘉玲驚呆地按著自己的臉，發現何正銓正站在她面前，眼神空洞地瞪著她，徐嘉玲即使被打都無法作聲，她被何正銓的神情嚇得不寒而慄。
 
「哇……」飯堂中的同學都因剛才那聲響而轉過頭來看著他們。
 
在場的徐嘉俊看到自己的妹妹被摑，立即憤怒地衝向阿銓，給他一拳；然而阿銓的憤怒是遠遠在他之上……


 
阿銓擋下這一拳，把他推開，然後一下給徐嘉俊一下回旋踢!這黑帶力道的一腳正中徐嘉俊腹部，他當場立即倒在地下。
 
現場的所有人都看得目瞪口呆，徐嘉玲看到自己哥哥的遭遇，不知所措地看著阿銓，連傻子都知道她有多欺善怕惡。
 
維吉爾拾起桌上那張港幣壹佰圓，掉在地上，憤怒地對徐嘉玲問道：「你而家咩事啊?!」
 
「我而家問你咩事啊?!」維吉爾喝道：「而家係咪住半山既先係人，住屋邨既就唔係人啊?!」
 
「你蝦Catherine做咩啫?」維吉爾質問道：「你係咪自悲，覺得自己唔夠人地靚，所以先要咁蝦人、貶低人黎平衡自己心態啫?!」
 
阿銓說出這句後，徐嘉玲驚呆地張口結舌，猶如被刺中要害一般，說不出半話句。
 
……
 


這件大事在放學後當然有鬧到訓導處，何正銓、傅芷瑤和徐氏兄弟三方的家長親臨了學校，與訓導主任及班主任展開了討論。
 
「何正銓你點都好，打人係唔啱既，你應該道歉。」：7C班的班主任說
 
阿銓看了看徐嘉玲，淡然道：「佢咁樣對Catherine，如果佢唔同Catherine道歉先，我點都唔會同佢道歉。」
 
阿銓母親立即拍了拍阿銓的手，示意他認錯，阿銓無視母親的阻撓，面不改容地說：「呢個原則問題，你要記我大過都係咁話。」
 
「……」：訓導主任和老師都一時無話可話。
 
班主任轉向芷瑤母親，說：「拿，傅太，咁既……」
 
但她此句一出，芷瑤母親立即激動道：「我唔係傅太，我唔係傅太!我自己就係姓傅，我姓傅!瑤瑤係跟我姓!」
 
阿銓母親愕然地看著芷瑤母親，一時間對身處於這弱智人士身旁感到十分不自在。


 
經過一輪調解和家長的半推半就下，徐嘉玲勉強地象徵式向芷瑤道了歉，何正銓亦對徐嘉玲做了同樣的事。何正銓、徐嘉俊和徐嘉玲都受到了適當的處分，這事件便在和平中結束。
 
走出走廊，阿銓母親立即拉開阿銓，對阿銓怒道：「你叻啦，比人處分啦!你傻左啊，咁既態度對啲老師主任?!」
 
「原則問題，」阿銓淡然道：「你剩係識對我惡架喳?啱啱起果兩兄妹面前又唔見你咁惡?」
 
「你咩意思啊?!」阿銓母親說道：「一日最衰都係你跟你老豆返左間摩門教，識埋啲咁既人!你平時就係同啲咁癲癲地既人打交道架啦?」
 
「又關教會咩事啊?仲有咩癲癲地啊?」阿銓質問道：「我以前仲係同你地一齊番教會果陣，教會都唔係教你去睇唔起人架啵，點解你番教會番到咁狗眼看人低既?」
 
「而家我番呢間教會有咩問題啊?就單純因為『摩』同『魔』同音，就好得人驚啊?個英文譯音咁啱譯成咁你就覺得聽落好邪啊?」：阿銓續道
 
阿銓痛苦地說：「香港就係因為有太多好似你咁，聽個英文譯音係『摩』就話邪教既人，傳到謠言滿天飛，教會先至比人誤認為邪教；Catherine先至會比人當做異端，比人笑，比人歧視，白白受咁多苦!」
 


阿銓說：「你根本咩都唔知，郁啲開口埋口就話人邪教，口水花噴噴唔洗負責任，你有冇顧過人感受架?!」
 
說罷，阿銓便轉身離開；阿銓母親深嘆一口氣，對阿銓搖了搖頭，便當作什麼也沒發生過那樣離開學校，繼續投入到竹戰當中。
 
維吉爾鼓起勇氣來到7C班的課室，一位紮著馬尾，額前留著深棕色的斜瀏海，臉容楚楚可憐的小公主正坐在課室最左後方的角落。
 
小公主正垂著頭抱著自己的書包，維吉爾走到她身旁蹲下，按捺著自己的心跳……
 
然後伸出手來，輕輕地握住小公主的手。小公主抿著嘴，臉紅耳赤，淚水在她的眼框打著轉。
 
阿銓生硬道：「Catherine，我……」
 
然而就在這時，Catherine突然閉上了雙眼，臉上的血色散去了，她變得滿臉蒼白，然後一下失去了知覺，昏倒在阿銓身上!
 
「Catherine!!!」
 
救護車來到學校，醫護人員迅速地到場，拉出擔架，把芷瑤搬上救護車，阿銓也立即跟上車。這是交通擁擠的時段，阿銓眼看著臉無血色的芷瑤躺在擔架上，內心焦急如焚。
 
但Catherine卻緩緩地睜開了眼睛，醒了。
 
「Catherine!」：看到芷瑤有了知覺，何正銓立即緊張地握著她的手。
 
「Ver…gil…」：芷瑤縱使是如此虛弱，卻還在努力地嘗試說話。
 
阿銓擔憂說：「你咁辛苦，唔好講野住啦。」
 
芷瑤卻不放棄，繼續低聲道：「你之前……話唔中意我，係咪……真架?」
 
「唔係啊!」阿銓急道：「果句一時氣話黎架喳，我中意你，我由頭到尾都係咁中意你!」
 
……
 
 
兩小時後 某醫院病房 何正銓
 
病床上的Catherine終於緩緩地睜開眼睛，不料她一看到我的手，便立即捉著不放，把頭偎在我的手臂旁，可憐地扁著嘴。
 
小傻瓜。
 
「我唔知你有糖尿病，」我心有餘悸地說：「無啦啦就咁暈低，啱啱真係嚇死我。」
 
「你有好多野我都唔知，好對唔住，」我嘆道：「都係近排佩君同Henry講比我知我先知。」
 
「對……」芷瑤努力地張開口說：「唔……住。」
 
我對她微笑了一下，然後從口袋中取出芷瑤寫的那封信，說：「我睇到你封信啦。」
https://www.youtube.com/watch?v=ds6U2OEl-MQ
 
「係咪真係好似封信講咁，如果我有野需要你既話，你願意做任何事黎補償咬我同打我果幾次? 」我說道：「拿，我比你咬果陣其實真係好痛架。」
 
芷瑤靦腆地避開我的目光，點了點頭。
 
我輕輕地拿起芷瑤的雙手，問道：「係咪我要你做任何野都可以?你都肯應承我?」
 
芷瑤原本蒼白的臉已經變得紅通通，她羞澀地閉上眼睛，再點了點頭。
 
「望住我。」：我溫柔道
 
我認真地看著芷瑤，說道：「我要你應承我，從呢一刻起，以後你即使遇上幾大既苦難，就算有幾悲傷痛心都好，都唔好自暴自棄，同我坦白講。」
 
我說著說著，不知不覺就哽咽了，我懇求道：「無論發生咩事，以後再發生咩事都好，你都要好好珍惜自己生命，點都絕對唔好再嘗試輕生。你應承我呢件事，可唔可以?」
 
Catherine含情脈脈地看著我，點了點頭。她這一個承諾，使我頓時放下了心頭大石。
 
「我坦白先啦，」我誠懇道：「對唔住啊，我之前成個人好低落、好消沉，理解錯左好多野，誤會左你。」
 
芷瑤聽後立即抿著嘴搖搖頭，說：「係我錯，我咩都冇話比你知。」
 
「我對唔住......」芷瑤說：「你送比我果塊木牌我驚刮花，所以......所以冇拎黎做匙扣，我有好好珍藏。」
 
她急著續道：「同埋啲藥.....啲藥，係伊利莎白開架，我特登用第個袋裝起，因為本身個袋係有伊莉莎白個名，同埋寫住......寫住......」
 
Catherine越說越小聲：「因為係寫住精神科......mood stabalizer，仲有大大隻字寫住我個全名起上面。」
 
「我見過果個袋啊，有咩問題啫?」我輕撫著Catherine的後腦，苦笑道：「傻妹黎架，直接同我講咪得囉，我根本都唔會介意。」
 
Catherine垂下頭，扁著嘴說：「之前有次包藥跌左落地，比人睇到哂。」
 
「見到咪見到囉，」我微笑道：「病左食少少藥，好正常喳嘛。下次再有人望住你食藥呢，你同佢講『望咩啊?咪阻住哂啦，一係你就一齊食!』」
 
愁眉苦臉的Catherine聽後一下破涕為笑。
 
然而就在這時，Catherine打了一個噴嚏，她這痛苦的表情使我的心都跟著揪痛了一下。我立即鬆開她的手，為她蓋好被單。
 
我看著纖弱的芷瑤，愧疚道：「對唔住啊，我唔知道你受住咁多苦，仲離開你，趕你走，仲……仲大大聲對你講話.…..我唔中意你。」
 
「我唔知架……」Catherine扁著嘴，嗔道：「你平時同我講既每一句野我都……我都係直接相信，唔會懷疑架。」
 
……
 
芷瑤是那麼的純情，那麼的純真，我卻那般待她，我真是個不知所謂的傢伙啊。
 
「Vergil…」：芷瑤輕喚著我的名字
 
「嗯?」：我應道
 
「你平時有咩脾氣都收埋唔發，但你將自己既憤怒一下全部釋放果陣，真係好得人驚；雖然你係為左保護我，但你發嬲果陣我真係好驚……」：Catherine抿著嘴說
 
Catherine楚楚可憐地看著我，問道：「Vergil可唔可以唔好對我發嬲，可唔可以唔好鬧我?」
 
我笑嘆道：「傻妹，我起學校次次都係為左你先發嬲喳，果道火梗係唔會用起你身上啦。」
 
「你唔會對我發火，唔會喝我；但係你嬲我果陣就唔講野，一句野都唔講，果種……果種又係另一種得人驚囉。」：Catherine仍是可憐地看著我。
 
我微笑著點了點頭，說：「我應承你。」
 
我看著芷瑤，嘆道：「屋企環境唔係咁好，點解從來都唔話我知既?」
 
芷瑤黯然道：「我由細到大都係咁環境，捱下捱下就慣啦，有咩好講姐……」
 
「唔好再日日啃豬仔包啦，」我說道：「平時返學你早餐午餐同我食好冇?」
 
芷瑤愕然看了看阿銓，然後垂下頭，緊緊地抱著被單，低聲道：「唔洗啦…...媽咪教我屋企窮都要有骨氣，唔好靠人。」
 
呵呵，你真是個擁有良好價值觀的好女孩。
 
「咩靠人啫?幾時話過唔比你有骨氣啊?」我哄道：「你要番商場果份part-time幫補家計既咪照番囉，只不過以後我會好中意買野比你食，睇你食野個樣喳嘛。日日喂你食野，喂到你肥!」
 
Catherine嫣然一笑，我看著這笑容，心裡回想起自己在九龍塘曾立下過的第三個神聖誓約：我將來縱使未必大富大貴，但至少也要確保芷瑤一家豐衣足食，不愁生活。
 
我在一生人中對芷瑤犯過四次錯，這是第三次。我在心情低落時誤會芷瑤，完全忽視了她對我的愛，甚至一度與她決裂，使她傷心欲絕，而且她真的嘗試了一次自盡。我以後會好好珍惜這純情的小公主。
 
剛放學的佩君也立即趕到來現場，我剛好也人有三急。
 
「阿銓?」佩君看著躺在病床上的Catherine，急喊道：「瑤瑤!」
 
「你地傾啦，我咁啱都要去廁所。」：我站起身來，離開房間，把床邊的椅子讓給佩君。
 
……
 
 
「發生咩事啊，成個人暈低既?」：我擔心地問道
 
「唔知啊，就啱突然暈，之前都冇試過，」芷瑤苦笑說：「我會小心食野架啦。」
 
我有氣無力地嘆了一口氣，回頭一望，確認何正銓已走遠，便問道：「同阿銓坦白哂未啊?」
 
芷瑤靦腆地看著我，說不出話。我輕笑道：「姐係未啦。」
 
芷瑤生硬道：「佢知道左我……我係精神科病人。」
 
「之前瞞黎根本嘥氣既，阿銓都唔會介意呢啲，」我說道：「你一早話比佢知你有情緒病，就唔會有咁多誤會，你地都唔洗行咁多彎路啦。」
 
「當初你咁努力去瞞佢，仲要我咁努力去配合，咩都唔講得；結果原來佢一知道你有情緒病，你地既關係就即刻走前左一大步啦。」：我說道
 
「呢個巧合啫……」芷瑤說：「唔係個個都頂得順精神病人，Vergil佢對我係特別好。」
 
「巧咩合啫?根本你越瞞就你地既感情越冇幫助，越坦白佢就越理解你，」我嘆道：「趁而家咁，索性一次過話埋比佢知剩低既野啦。」
 
芷瑤聽後急忙搖著頭說：「唔得啊!唔得……」
 
「呢件事同我有情緒病根本完全兩個層次，絕對唔講得架，」芷瑤激動地捉著我的手，懇求道：「求下你，千祈唔好同Vergil講，千祈唔好!」
 
「得啦得啦!」我鬆開她的手，說：「啱啱先暈低完，咪咁激動咁大動作啦，抖下啦你。」
 
我坐下來，嘆道：「點解唔想比阿銓知啊?」
 
芷瑤黯然道：「由得佢啦，而家咁樣，對我呢個咁既人黎講，已經係前所未有既幸福啦；雖然唔知幾時會失去呢份幸福，但趁仲有得捉住既時候，就有幾緊捉幾緊；然後時間到既時候，我再靜靜咁離開佢。」
 
我笑道：「傻妹黎架，成日諗分開做咩啫?你一定會幸福架。」
 
……

我們身邊太多假人，心中太多傷痕，等不到私奔。