[少年監獄] 感受沙咀: 2. 靶友

佢都算係我既第一個靶友吧?

「係到等車啦. 」
庭警照慣例拋低左呢句,就留低左佢同我同一個倉.

佢一入黎就hi左我一聲.

我都回左句hello.

之後佢逐步坐左係我對面既石磚,隨口問了句





「老友,你衰咩啊?」
我內心一虛,想講又唔想講,因為話比人地聽自己衰咩,真係好淤

「呃..我..衰藏有兒童色情物品.」

「哇屌,你好呢味嫁?」

佢立刻笑左笑屌左句
睇下, 呢個就係我怕既反應





「咁係唔係啦屌..唉係我衰on9姐,咁你呢?」

「衰打交咯,傷人19.」佢fing左fing佢側金毛陰說道.

「哇...點解既? 佢同你有仇?」我直問道

「有嫁屌, 佢老母閪當我面撩我條女,我仲忍佢? 咪即刻打到佢變豬頭咯.我練泰拳嫁,一拳打到佢即刻留鼻血訓低,然後我坐埋上去佢身到砌佢」

「條友又真係幾賤既..」




我應道.
但果刻我心諗:你都幾衝動下…

之後佢又同我講左好多好多佢係出面撈既威水史,我總算get到

眼前呢位朋友,原來係個黑道中人.

「你呢? 你點解會衰呢個on9野既? 我都係第一次聽呢條罪」
於是我又重複左一次自己既on9

佢聽完屌左句
「哇屌你都衰得幾on9 wor,你又唔係壞又無撈黑又剩,即係你係白手啦.哎希望你打得甩個官司啦」

「白手姐係咩?」雖然我都隱約估到,但都想確認下





「即係你無衰過,白底入去既咪白手咯,衰過入過冊既就係黑手嫁啦..其實白手入到去好易比人食住,蝦你乜鳩都唔識..」

「哎屌..預左要吃苦...」
我無奈嘆句.係唔知道個苦,有幾苦姐.

「不過放心啦,見你同我有緣,我入面有人,可以幫手睇住你既」
聽到呢句我心中真係有股感動同安全感,但若然我順住去,等唔等於我入左黑社會跟左佢呢

我隨便問左句「即係你係黑手?」
「唔係啊,我都係白手,未真正受過靶嫁，入面d野我都唔算熟嫁」

屌,我心入面既安全感即刻消失到無影無蹤.

「咁點算啊..」我好迷惘地問左句.





「有得算既咩屌,一齊捱咯」佢行過黎拍左拍我既膊頭.

「哈哈,一齊捱咯」我將身子挨後,望住佢話.

其實果刻,大家都知道大家, 係驚既.

「你叫咩名啊」

「叫我衡仔」

「我叫阿壯啊」

我苦笑望住佢

而佢就係我第一個靶友.阿壯.





之後,我地傾左好多佢既事同我既事,
係沉悶既地下牢房(俗稱臭格)中,傾計真係個最好既解悶方法.

而我都藉此了解左好多黑社會既事,同阿壯既事,
原來佢都有讀書,不過讀到form4就識左壞朋友(佢自己都認係壞朋友),搞到去左撈黑,宜家聽落其實都幾好搵既.

「我同我個老表(意思姐係同一個社團既朋友),一日走一轉丸仔可以走差唔多6000幾,屌搭程地鐵行多幾步交貨,緊就可以袋緊多錢,真係幾好搵嫁 」
「不過,果次散貨既時候,我老表比差佬捕到,宜家泊左去(我唔記得係邊既)環頭,哎屌好對唔住佢,大拿拿10幾碌,點捱啊.」

佢講到呢到,有眼濕.睇黎佢都幾著緊佢老表

(一碌姐係等於一年，明顯的,呢D風險同利益係成正比既,大家千奇唔好試啊)

之後又傾左好耐好耐,突然間閘口停左2個著住綠色軍裝既人,佢地開左閘，然後入左黎





阿壯同我都企左起身

「阿sir好」阿壯說

「嗯.」阿sir A好似好滿意阿壯既招呼緊哼了聲

「宜家幫你地2個驗身,有無帶D小刀,利器,鋼線,打火機之類既野,諗住入去對冧阿sir啊」阿sir B同阿sir A 一邊帶上手套一邊問道.

「無」我同阿壯答

「咁除衫啦」

我聽到後有D遲疑.但頭先個問題又真係有保安理由.所以唯有聽從指示

我同阿壯開始剝衫除褲,側眼一望,方見到阿壯身上的鬼頭同鯉魚紋身.

「哇你又鬼頭又鯉魚,好唔濟要靠呢D黎威咩」阿sir A講笑地潤左佢一潤

「無啊阿sir, 貪靚姐.」
不過剝到底褲既時候,諗起,屌係唔係要除埋佢?

仲未開口問,另一邊廂既阿壯已經除埋底褲,赤身裸體地企係阿sir A面前.

唉.我作為一個肥仔,對身材點都係有D自卑.但情況和氣氛似乎不容得我不從,我除下底褲,然後立起身站在阿sir B面前.
冰冷既空氣接觸左本應溫暖既大腿間,開放式既環境,加上附近3個你都唔熟既人.

而我正赤裸地處於其中.

果刻其實覺得幾尷尬,肉酸到爆.

之後,便開始他們所謂的驗身.

「行埋黎, 喂屌你,怕乜鳩野醜姐,縮開個手向兩邊展開」
雖然我好唔情願，但我都縮開遮住下體既雙手,舉高,此刻,我等於徹底地赤裸在阿sir面前

「舉高D」阿sir B行近望左望腋下.

「雙腳抹開D,再大D」
我宜家個姿勢應該好似一個「大」字形.呢個指令應該係檢查我有無用腳夾住野

「好啦擰轉身,屎忽對住我」

「照舊啦手同腳都抹開」

「好,跟住上半身向前捂低,小心咪仆親啊.」
原來呢個尷尬姿勢係要睇埋會陰呢個位.不過個姿勢真係好羞恥

「ok啦,企埋一邊等」
阿sir B check完後行去檢查我既衣物,然後退還返比我地著返.

「架車就到啦,宜家帶你地落去,醒醒定定啦」
說罷我同阿壯就跟住阿sir行出呢個留言板監倉,

然後搭lift落左幾層,最後入到去一個都幾昏暗而且細好多既新監倉.

不久,突然有個新既阿sir行埋閘前.

「喂喂喂! !」

哇屌，呢下真係好撚大聲,嚇到我成個人震左震.

「yes sir」阿壯應左句.

「喂你係唔係無反應啊」
今次佢唔係對住我地喝,而係對住我喝.


「呃」...
我好明顯仲未適應到個聲量,因為個阿sir講野真係幾大聲下.

「呃乜撚野啊,屌你咁既樣,入到去死得啦,yes sir啦懵撚」
個阿sir又再加大佢個聲量屌我

「yes sir」
我立刻改正返個回答

「屌你記得應啊,唉你咁入去死得啦」
佢又再重複呢番說話.我心入面亦提醒自己要記住應機.

「喂,兩個過黎上銬」
於是阿壯同我行左去閘邊,
原來道閘有個開口可以比手伸出去,阿壯伸出右手,而我伸出左手,
咔嚓一聲,佢麻利地銬上了一個鐵製手銬上係我地兩個手到,

除咗話比你聽我地走唔甩之外,更加提醒左我地宜家要去既,係壁屋,係監獄

銬完後個阿sir都不忘潤返句「唉你死得啦」
我屌...我無應一次機既,可以死3次咁多?
之後我地2個被帶到去車庫,見到了平時偶爾係新聞上見到既被黃條界開上下兩半既黑色囚車

只不過

今次係我親自搭

我們依照了車上既阿sir指示坐好位,其他倉既犯亦都一一上車,就位.

引擎一開,車庫門口上升.

架車就載住我地一班犯，

駛出了日常常見的街道,而窗邊的街景也開始不斷地向後伸延.

途中,架車經過左我屋企.

我望住屋企棟樓,明明這刻距離這麼近,但我卻要和家不斷拉開距離.

囚車不斷地向著壁屋趕路,而我既人生,亦漸漸不再普通.