[少年監獄] 感受沙咀: 42.新年前夕

其實每逢每個月的第唔知第幾多個既星期日,又或者係一啲大時大節, 都會有一些外來宗教團體來到我們沙咀探訪我地,搞下活動
(之前已經寫過的聖誕節前夕其實都有, 不過在此一次過提吧)
星期六早上, 我們做洗衣的一早收到風,今天會有活動
所以我哋一早做好曬啲嘢,比張sir帶我地去飯堂參加(如果無做好啲嘢,張sir可以唔比我地去)
入了飯堂, 飯堂的膠枱已經全部搬去了後面, 只剩下一排排的膠凳,上面坐滿了全部沙咀既學童
我們全部就曬位, 等待著義工來臨
等待著遠處走來的義工, 為我們搞的活動
他們入來了
大概十個人左右,他們逐個逐個進入了飯堂,
我地則留意到佢地有人帶了音箱, 有人帶了吉他, 更有人帶了一袋袋的零食包裝




看來今天的節目會很開心呢
我們全部人一早企了起身, 然後好似日本的小學生一樣, 對著義工們禮貌地大聲打招呼
「義~工~早~晨 !」
除了某些人給回了笑容外, 其他一些年輕的義工似乎被我們的招呼嚇親,震了震

或許在他們眼中, 大嗌早晨的我們比起外面的人,是多麼的異類吧
「咁各位同學早晨啊 !」帶頭的義工亦都給了回應
阿sir見招呼打完,跟住發令
「全部一齊坐 ~~低」
對腳 !




對 ....!
當然無對腳啦
只不過習慣性的, 我們自己主動對了一次腳.
接下來, 就有一個笑容滿面,帶慣活動的阿伯渣住一支mic , 行了出來開始做司儀帶活動,佢自我介紹完話,原來佢係神父. 不過我就覺得佢既氣場歡樂十足, 更加似聖誕老人就真
然後就係固定流程了
先派歌詞, 唱唱詩歌
再玩玩遊戲, 講一講經
讚頌主, 講耶穌
宗教團體的探訪,大致上都是這些東西
偶爾有些團體好似今次咁,會帶埋零食入來分派




我們就當然開心啦
一包檸檬茶帶來的酸澀味
一塊糖果帶來的甜
一盒零食紫菜所帶來的口感, 無不讓人懷念
原來自己仲可以食到呢啲
呢個時候可能有啲人會話教會團體呢啲叫人信教, 好撚戇鳩
但我就覺得佢地派既零食, 安排既音樂, 唔算好玩既小遊戲,

真的可以幫我們解脫一個早上的勞累,然後投入去一個稍微放鬆的時間
雖然我份人就無宗教信仰,唔會真係去領洗信耶穌
但我亦都不討厭這些宗教團體, 因為至少, 思定會真的是有在做事
不用對住他們good morning sir, 不用對住他們 同sir報,

他們的溫柔慰問,真會讓沙咀仔記返起,其實我地仲係個人, 係個值得擁有尊嚴的人
而且呢啲節目到最後, 通常都有分組傾計環節




一個義工分八個沙咀仔左右組成一組

然後互相傾計, 聊聊外面, 分享每個人入來的原因
所以這個時候, 我們都會略略問問現在外面的世界有咩大新聞, 聽一聽,就會覺得自己未算脫節,仲算係社會既一份子
但反過來, 義工有陣時,都會問返我地一些問題
「你地係入面係唔係好辛苦啊? 」
呢條問題, 問得最多
「當然啦..呢到有名你叫, 勞教中心啊嘛.」
這時候我們回答出來的話, 大部分都同自己屋企人探訪果陣講既嘢相似
只說步操, 摺毯, 體育堂, 絕口不提找數, 牌頭, 阿sir
義工們身後既阿sir, 令我們只能回答那些官方的答案
而且就算無阿sir係到, 我都覺得講左一樣都係幫唔到的
「都係一啲步操啊, 摺毯, 體育堂咯, 都算辛苦既, 不過我地係犯錯, 唯有捱下啦...」
不要變成閪人搞事啦.
你知你要答啲咩嫁喇.




無錯, 每個沙咀仔都有一個表裡不一的一面
說著善良的大話, 隱瞞難堪的真相, 忍著慘無人道的生活
所以我每次答完呢啲問題, 心中都會出現一股強烈既挫敗感
真係好諷刺,居然要一個受害者來主動回答自己無事
不過在這個環節, 我都可以聽到更多其他Team既人既經歷, 因為J,S,YA 三Team人都會打亂再分組
有人偷竊, 有人無牌駕駛, 有人不誠實使用電腦, 有人詐騙....等等等等
真係衰乜嘢罪,都有機會被判入沙咀呢...
談著談著,活動已經接近完結,最後祈禱完後,一眾義工將走了
他們在門口收拾器材和集合, 而我們亦自動自覺企了起身
「一 二 三 」
「多~謝~義~工, 義~工~再~見 ~」
「拜拜啦大家. 大家加油啊 !」
拜拜...
拜拜啦..
頭先仲覺得自己係個人的時光,拜拜啦..




「收拾好心情啦, 頭先還頭先, 入返黎啦」

帶隊的阿sir命令道
「Yes sir Thank you sir  !」
一時扮演自己係人,然後再當自己唔係人
每次既外來探訪活動, 都要重複這個心理變化過程
無辦法, 因為呢到係沙咀

然後年二十八同年二十九, 戈sir帶了我們大掃除了一次沙咀.
由於毛毯是不會換的(起碼我的毛毯真的是由新人組陪到我出冊),
所以戈sir先著我們搬床同毯出去空地攤開曬.
再出動埋水喉駁水射地下, 又用消毒水加掃把, 著我們將兩個倉刷得一乾二淨
到了年三十, 我又收到我阿媽寄來的信了
每次見到阿媽的字跡,著實讓我感到安心
我在倉內打開單行紙...媽子說的話, 在腦海迴蕩




兒子
今日大年三十日,沒你在家,你爸叫我不用煮飯,沒人陪他吃.你看你多重要, 今年的最後一天, 希望明年以後是一個更好的開始. 我沒多大願望,只要你們兩個身體健康,沒病沒痛,就是我最大的幸福
最近好多人感冒, 你自己要小心, 有什麼不舒服,一定要看醫生
見你升班,為你高興, 可以早啲同你相聚了.雖然今年有啲失望, 但我相信我兒子以後會更珍惜以後的日子.為自己的願望而努力.
我們這一個星期要上班, 你爸可能也要上班, 所以別擔心我們, 你自己注意身體
我上班了, 煮了湯圓帶回公司吃, 等你出來,我親手做湯圓給你吃, 希望我兒子來年有個更新的開始, 忘掉過去, 邁向新的一切日子, 開開心心 !
媽咪字
xx-xx-20xx



是啊..今天是應該要團圓的日子啊..以往家中都會煮湯圓,大家一齊食,團團圓圓
但宜家, 無法團年的人和思念彼此的人
相隔了不知多少距離
唉...
心中一片感觸
算啦. 聽日大年初一,唔諗了
學阿媽話齋, 開開心心地過吧
嗯, 開開 心心.

那年的新年 ，我第一次無得同屋企人團聚
過了第一個無同屋企人一齊過的新年