燈光一亮
眼皮睜開
頭上亮度不高又被鐵網網住了的燈光,早已看厭了
但我們的心情卻是難得地開心
因為今日係大日子, 農曆新年,大年初一
大時大節, 我地期待既唔係利是, 而係等陣聽講有齋菜食既早餐
之所以咁期待,其實係因為二年班的我, 飯量已經變大左, 之前食唔多既一碟飯, 已經可以完全吞落肚無難度
至於其他人, 更加係覺得唔夠食, 武傑和諸仔更是晚晚搵機會同我排隊排埋一齊,目的就係想R埋我既提子包(因為我覺得夠飽,所以個包次次都搵佢地幫我啃.佢地兩個就當然樂意啦.)
除左齋菜之外, 仲有我覺得最爽既就係這些日子可以唔使好似平時一樣,勞動那麼多,就連PE都唔使上
一個字 :正 !




起床後, 我們精神奕奕地開始打理房間, 整理倉務, 乜都做得特別起勁.誰想阿sir幫自己開年? 不想吧哈哈
到右班阿sir們check房, 草草check完後,
成個沙咀的人, 開始聚集在飯堂等待,
等待等陣可以食到的豐富大餐
等齊人後, 我們開始拎飯
哇..咁重手既!?
呢個係我見到碟嘢既反應

因為到我拎飯果陣, 碟飯既分量簡直係平時既兩倍!
疊到好似一座小山的白飯, 上面鋪滿了滿滿的齋菜, 冒著熱氣和手中的沈重感




今鋪點都可以食飽啦掛?
我地拎曬飯, 埋返位
「全部人留心 ! 等陣我要齊啊 ! 唔齊無得食 !」
資深的虎sir開始發號比全部沙咀仔, 包括S, J, YA
「全部一齊坐 ~~低 !」
碰 ~
我們展現出平時訓練有素的表現, 一齊快速坐下
「對 !」
嘣  !
「對 !」




嘣 !
兩下精準齊聲的揼地聲, 反映了我們多麼想食眼前的齋菜大餐
「移碟 ! 移碟 !」
好了, 開飯前置功夫總算全部做完, 係時候, 將昨晚排練的東西, 一字不漏地嗌出來了
咁我們到底排練左啲咩呢?
其實昨晚, 君實sir特意比了半個鐘自由時間我地, 比我地夾下向每個阿sir講既慶祝說話
我心諗, 無非都係一啲賀年說話姐, 使鬼夾啊?
但原來, 沙咀有個傳統, 就係每逢大時大節既第一餐飯,或者係某個阿sir升官,生日, 開飯前都要講啲應節祝賀語, 仲要係一齊講, 唔可以亂
所以這刻, 阿峰拎出了白紙, 向我們集思廣益, 開始寫低同每個阿sir既應節祝賀語
「喂喂, 邊個讀過書嫁, 快啲講啲成語出黎啦,  我地起碼要講得長過J仔啊. 聽之前既牌板話, 年年過新年,我地兩個大Team都會鬥邊個講得最長最好,所以你地講啦, 我抄低.」
但屌,我心諗, 呢個都有得鬥?
不過難得既擦鞋機會, 又真係唔可以放過既
總之講到阿sir開心, 我地就開心
於是我們百花齊放百家爭鳴, 乜鳩都開始提議出黎





「心想事成 !」
「馬到成功 !」(今年係馬年)
「一馬當先 ! 」
「財源廣進 !」
「蒸蒸日上 !」
「步步高升 !」
「快高長大 !」

「屌你, 咪撚玩啦仆街 」
「學業進步 !」

「邊個阿sir讀書啊 ?學你老母」

.





.

.

.

.

.

.

.

.





我地傾啊傾, 諗啊諗, 終於湊齊一大堆賀年說話, 接下來就係安排邊啲阿sir講咩了
「聽日返工既阿sir有邊幾個 ?」

阿峰問
「戈sir, 君實sir, 子藍sir, 虎sir, 漢sir, 羅sir, 音sir ....啊係,仲有廚房龍sir , 係咁多」
Check架 阿大立即提供了阿sir的返工情報, 無疑係我地S佔優
「好, 咁我地逐個逐個阿sir諗講啲乜啦..」

.

.

.





.

傾完之後, 阿峰手抄了兩張白紙稿,一張比我地C2, 一張比A1.
「大家聽住啊, 今晚好背熟佢, 我同阿壯會輪流做講先既果個人,之後跟住一齊講就得嫁啦, 如果唔記得就做口形,總之唔好嗌錯..我會講左一二三先開始, 之後先講 祝 子藍sir.....」

.

.

.
就這樣, 一切準備就緒, 夜晚的兩張白紙開始考驗著我地既記憶
回到飯堂, 現在氣氛開始變得有些期待, 阿sir們個個都在期待,等待我地祝福他們
戈sir說

「你地知咩事嫁啦, 記住啊, 講既嘢唔可以重複, 每個阿sir都要恭喜, 準備好既, 隨時講得.」
「Yes sir Thank you sir !」

我地大聲回應, 信心十足
「一, 二, 三 !」

阿峰開始大嗌出暗號
「祝戈sir」

阿峰先開始講祝福邊個, 然後我地再跟,
「身體健康 ! 恭喜發財 ! 萬事如意 ! 步步高陞 !笑口常開 !意氣風發 ! 青春常駐 !」

我地跟隨昨晚的記憶, 開始嗌出連串成語
戈sir聽完, 蠱惑地笑了笑
見到阿sir開心, 我地就開心
接著係

「祝君實sir」
「新春愉快 ! 大紅大喜 ! 喜氣洋洋 ! 年年有餘 ! 雙雙對對 ! 二全其美 ! 百年好合 !」

對君實sir既祝福編排,我們其實暗藏了些心思, 因為君實sir仲未有女朋友, 所以我地係後面加左啲特別祝賀
「哇, 你班衰仔咁撚大膽既, 佢地潤鳩君實sir你無女wor !」

音sir在對面聽完後笑了出來, 立即報串
我們亦笑笑口地sorry sir
那邊廂的虎sir立即說

「誒, 我又覺得班衰仔一片苦心wor, 就係無, 先想祝福君實sir有啊嘛, 你地話係唔係咁先?」
見到虎sir幫我們S打圓場, 我地立即嗌
「Yes sir !」
「哼 ...枉我平時對你地咁好 !」

前面君實sir故作生氣道
「sorry sir ..」
「哎好啦好啦, 承你地貴言, 今年我一定溝返件啊 」

君實sir哼了口氣道
「好 ! 」

音sir拍手叫好
我地亦都喜慶地道出鼓勵

「Yes sir Thank you sir ! good morning sir Thank you sir !」
接著下去
「祝虎sir」
「一馬當先 ! 生龍活虎 ! 虎虎生威 ! 花開富貴 ! 龍鳳呈祥 ! 龍精虎猛 !」
「你班仆街今年係馬年啊 !哈哈哈, 不過講得幾好」

虎sir聽完大笑了出來, 看來我們是成功逗笑了佢
「Thank you sir !」

阿sir開心, 我們便開心
喜慶的氣氛仍舊繼續,
「祝音sir」
「祝羅sir」
「祝龍sir」
「祝子藍sir」
「祝漢sir」
.

.

.

.

「最後, 祝咁多位阿sir」
「健康長壽  , 幸福快樂 , 一路暢通 !」

總算, 我們成功背曬了所有對白
「恩. 好 !」

全部人都拍起手來, 氣氛喜氣十足
到最後, 雖然J的祝福語不及我地長同完整, 但這已經不重要了
因為眼前的齋菜才是最重要的
等三個Team都講曬後, 戈sir企了出來說
「今日大年初一, 我地咁多位阿sir都要返工陪你地, 你地要講啲咩啊?」
「Thank you sir !」

三個Team的人加起來的音量, 果然非同凡響
「大時大節, 傷心既嘢就唔多講啦, 擺埋一邊, 食完呢餐就唔好再返黎食下餐啦, 知唔知?」
「Yes sir !」
「出返去, 記得同屋企人過返下一個新年啊,  好啦, 全部開飯 !  撈亂黎食! 食飽啲 ! 」
「Yes sir  Thank you sir ! Good morning sir Thank you sir !」
「開飯 !」
拎起膠筷子和瓷羹,我將還冒著熱氣的齋菜,塞入口中..
齋菜的味道,好似好耐無試了
我嚼了幾下,爽脆的口感,熱辣辣既芡汁讓我直呼過癮
但其實齋菜的味道真的不算特別,不過勝在勝在這個份量,是我們期待的份量
好像餓狗一樣,我們將白飯齋菜粗暴地塞入口中,隨便嚼了幾口,便鯨吞落肚
不求味道享受,只想一嘗久違的飽肚滋味
拼命地食,拼命地飲
到底有多久,沒有大吃大喝一次了?
這種大快朵頤既本能享受, 讓我吃著吃著,便想哭了

原來我仲識得享受,追求這種飽死滋味
吞完碟齋菜飯, 再飲埋杯甜甜地既奶茶, 一餐豐富既齋菜,為我地呢班沙咀仔既新年, 開了個好頭
Thank you sir完汁完嘢, 隨後我地便去體育館那邊搬枱櫈, 係返有蓋空地到開檔

跟手, 阿sir們便拎出了一袋袋既零食出黎 !

無錯,係平時我地係出面屌也不屌的各款零食.

但這刻讓我看著都流口水

雖然我們S都唔算細路了, 但看著阿sir們不斷拎出各種賀年糖果, 麥提沙朱古力, 維他檸檬茶同各式各樣既零食包時

我們真的好似細路一樣咁開心

太好了 ,有嘢食!



另外,我地係心內亦都好多謝阿sir們咁做
因為我地知道做懲教既阿sir們, 其實無必要這樣做.
無必要為左我地既開心,而專登帶咁多零食返黎比我地
無必要在今天大赦特赦, 放過曬一些平時得罪或者閪既人
無必要開心地同我地渡過這個佳節
甚至在規矩上, 懲教人員更加係不得帶食物給予我地呢班囚犯的
不過這個初一,右班的阿sir們全部破例了
這刻每個阿sir, 都帶了不少零食回來,和我們一起開心share, 共度佳節
這些微小的舉動, 著實讓我們感動和期待
這種知道自己被人關心的感覺,好窩心,甚至讓我們覺得這班阿sir,真的算是不錯

   

隨後阿sir們開始分派零食
他們各自開始分發糖果零食比自己所帶的Team的每一個人
我們S的零食自然係戈sir同君實sir分派的
大白兔, 檸檬糖, 迷你裝麥提沙朱古力, 雜牌夾心餅等等等等
每人都分到各式各樣的糖果, 渣係手上, 就好似擁有左全世界的寶藏一樣,超級開心
「拎到之後就即刻食啦, 唔好留啊 」
「Yes sir !」
然後我們一齊道謝

「多~謝~戈sir  !  多~謝~君實sir !」
「食啦, 啲包裝紙唔好亂丟啊 」
「Yes sir !」
我打開一顆大白兔放入口中
啊真甜
不知道是多久沒有試到的甜.
濃郁既牛奶味, 甜到漏既糖分, 讓我振奮十分, 情不自禁地開心起來
檸檬糖既酸 ,朱古力既香醇,餅乾既口感......

這些平時在外面屌也不屌的零食, 想不到在這裡竟然變得這麼珍貴同好味
我地食得津津有味, 不亦樂乎, 個個面上都掛著開心的表情, 阿sir們則是一副滿足的模樣
不知怎的, 吃著吃著這些阿sir們專登帶返黎既糖果, 心中竟湧現出了幸福感同開心
這種家的感覺在這裡也會感受到,實在意外
飲埋包檸檬茶, 我不禁感歎了一下,
點解入左黎之後, 我先發覺呢啲嘢既珍貴之處呢
食完頭一轉既分量之後, 戈sir開始派額外既糖果,
「牌板同洗衣牌板! 出黎.」

阿峰和子豪應完機後,走了過去戈sir跟前
「伸隻手出黎.」
「Yes sir ! 」

兩位牌板照做, 如果係平時, 這個擺位一定係伸手找板
但今天,伸出去攤大的手掌,迎來的不是帶來痛楚的板, 而係戈sir特別帶來的朱古力
「呢啲係專登由日本帶返黎既朱古力,食完記得比心機做嘢啦」
「Yes sir ! 」

他們兩個面上帶著傻笑,笑到成個細路般
「多謝戈sir ,多謝君實sir ! 」
「嗯. 到Check架 同 士多 !」
「Yes sir !」

輪到阿大同諸仔
「伸隻手出黎」
「Yes sir ! 」

他們兩個亦同樣照做, 阿大更是眉開眼笑
「拎去啦, 繼續比心機做野啊」

又是兩塊精緻包裝既朱古力, 放在了他倆的手掌中,讓他們兩個心花怒放
「Yes sir ! 」

他們兩個面上帶著傻笑,笑到成個細路般

「多謝戈sir , 多謝君實sir ! 」
這時,音sir走了過來, 帶了一大袋"旺旺仙貝"
「戈sir ! 你地要唔要啲餅乾啊?」
「啊好啊, 呢到啲糖你地都攞啲啊 」
我們S見狀,立即道謝

「多謝音sir ! 多謝羅sir ! 」
那邊廂的J亦都嗌出道謝

「多謝戈sir ! 多謝 君實sir !」
於是我們又可以吃到久違的旺旺了
派完基本份量的糖後 阿sir們的糖果仲剩好多
於是右班帶我們出籃球場, 正式舉辦了一場沙咀嘉年華
所謂既嘉年華,姐係各個阿sir都將手頭上剩餘既糖當作獎品,
而遊戲則係千奇百怪, 虎sir就係 咩飛拖鞋砸中條線就當有糖
戈sir就 玩射藍, 射中都有糖, 但射唔中就五組掌上壓
等等等等..
亦都有阿sir, 比如音sir, 只要走過去笑嘿嘿咁講句恭喜說話, 又有糖
我則比較喜歡參加子藍sir既自轉二十圈再鬥快跑過終點既競賽, 因為子藍sir手上有一款燕麥朱古力好撚好食, 真係第一次食我就迷上了果種味道, 所以我瘋狂去參加競跑
可惜出冊後,那款朱古力既牌子名我已不記得了.再也找不回那時我著迷的味道
可惜可惜
於是,那年的初一上午, 我們過得很開心, 大時大節, 就算係沙咀, 都不應該憂愁吧

快樂的時光, 過得特別快, 轉眼間, 接更的時候又到
我們坐在飯堂, 啃完音sir頭先比既旺旺仙貝,再吃著紅妹等接更, 我開始有些期待, 左班的阿sir會比咩驚喜我地了
「Good afternoon sir !」

只見勁sir和朱sir,我們的正IC和副IC入了飯堂
年初一,左班的下午, 現在開幕 !
當全部左班阿sir入來之後,我們又上演了一場恭祝話劇祝賀阿sir
「祝朱sir 新年快樂,家好團圓,歲歲有餘,年年歡喜,家和萬事興 !」

由於朱sir有家庭,所以我地自然講啲對號入座,祝福家庭既說話
輪到秋sir,由於秋sir鍾意賭馬

「祝秋sir 一馬當先, 買馬必中,長賭長有,財源廣進, 有賭未為輸,馬年發大財!」
「哇屌! 宜家S咁撚識擦鞋既?!但又講得幾好wor ! 就今晚買個六合彩啦 ! 等陣搵你地攞number,唔中就找數好唔好!?」

秋sir成功地被我們哄笑了, 仲開心到想發一筆新年財
見個氣氛咁好, 我們當然和應

「Yes sir !」
隨後,我們更玩味十足地繼續祝賀勁sir

忍著笑,大嗌

「祝勁sir , 身體力強, 龍精虎猛 , 日日笙歌, 步步高升, 鞭鞭有力,長做長有 ! 」
「哈哈, 屌你地鞭鞭有力都講得出.哈哈哈...」
「嘻嘻嘻」

我們亦嬉皮笑臉, 因為阿sir開心, 我地就開心
「好啦, 全部縮腳, 立正起 , 全部汁嘢」
「Yes sir Thank you sir !」
出了飯堂之後,左班繼續帶我們過呢個大年初一的下午
不過, 老實地說, 今個下午, 和平時的左班帶的大衛Day, 並沒有什麼不同, 最多, 都係朱sir比左一個籃球比我地打打波而已
沒有派糖,沒有嘉年華, 比起右班的節目, 左班的帶隊風格著實遜色不少
不過, 我地其實好滿足了,
至少對我們而言, 不用操已經係一個莫大的福音
沒有什麼特別, 平淡的下午
阿sir們的有說有笑, 我們的短暫放鬆
玩著康樂棋,打打籃球,或者坐低睇下報紙(一個星期前的報紙)
難得的過節, 就是偶爾輕輕鬆鬆
同勁sir好friend既阿大,在旁和勁sir吹水, 我亦睇住報紙, 聽埋一份
「勁sir, 點解新年唔拎假陪屋企人既?」

阿大用同我地講嘢既語氣,同勁sir吹水
不過我地亦見怪不怪, 因為勁sir的確係好隨性, 好同我地講得埋既人, 只要係同佢熟又醒目既, 勁sir都唔會擺出阿sir既架子
「邊有假啊, 係都大既果啲放先啦, 點嘛你地班衰仔, 今朝右班比左啲咩你地食啊?」
「哇正啊勁sir, 右班都比左唔少嘢嫁..」
勁sir聽完後

「屌, 益左你地啦, 受靶都有人對你地咁好, 其實我都想咁做, 不過呢..」
說到這裡,勁sir招了招手,示意我們將耳仔靠過去
「其實唔係我唔想帶啲嘢食比你地既, 不過其他Team既阿頭阿sir唔帶, 得我一個帶既話, 好怪同埋唔啱規矩, 不過右班比左你地喇, 夠喉了掛?」
「Thank you sir !  點敢啊勁sir.我地話曬受緊靶, 無必要享受咁多既, 而且出面大把呢啲嘢食, 聽到勁sir你有我地心, 我地就已經好開心嫁啦.」

這句倒是不假, 阿大代我們說出了真心話
「嗯嗯, 你地識咁諗就好啦.」

難得, 見到勁sir佢欣慰既一笑
隨後既下午, 和初二的早上, 我們都係好平安地繼續餅
無風無浪, 這節日既氣氛,甚至讓我繃緊既神經都放鬆下來了.
雖然身體放鬆左,但我個心,總覺得這新年是一個遺憾和後悔
我望住眼前有說有笑既阿sir,
望向那邊打著康樂棋既人, 打籃球的人, 睇報紙的人,
無錯, 佢地面上都係帶住笑容的
但在心裡, 我們真的開心嗎?
明明係新年,
明明,這時候應該是一個和家人共聚, 和親戚聊天既日子
這幾天的快樂, 應該要和家人共享的
但我們雙方, 阿sir又好, 學童又好
各自都要為不同的理由, 聚在這山長水遠, 無人問津的地方,
為時節的到來強添歡笑, 但絲毫沒有履行這節日既內容
這不無奈嗎?
這不是應該哭的時候嗎?
胡思亂想到這裡, 我望住眼前的報紙笑了笑
咦?我這不是還笑得出來嗎?
原來人越大就越要懂得笑, 就算係苦笑都好,
笑住過, 總好過喊住過, 與其傷心地過,不如麻痺自己, 振作地過.
我苦笑著, 繼續翻開星島的新聞版
繼續苦中作樂
到了初三, 中午接更, 右班的君實sir已經放假, 取而代之,子倫sir暫代了副IC同戈sir拍住上
但由於出面太熱的關係, 就算係有蓋空地開檔,阿sir都覺得難受
所以PE的紅sir提議,不如去體育館開檔.
於是我們移師到體育館,搬了長凳, 坐低,順便準備寫信
突然, 陣陣不自然,帶著冰意的涼風在頭頂上降下,
伴隨著機器運作的沙沙聲, 我才發現

原來紅sir開左冷氣
這陣陣人工涼意,不知有多久沒有嘆過了
我大吸口氣, 偷偷伸展了下關節, 想將這涼意享受至盡
真的好涼快, 不過這還不是更好的,
「情願獲得你的尊敬 承受太高傲的罪名   擠得進你臂彎 如情懷漸冷...........」
突然間, 我一直以為體育館上面是裝飾的黑色音箱響起了音樂和歌聲.
原來體育館仲可以播歌? ! ?
我默吃一驚, 隨即放鬆少少,我想聆聽這些許久未聽的歌曲, 和旋律
「多謝各位觀眾繼續收聽我地... 跟住落黎一首...」
「財神到, 財神到 ,好走快兩步. 財神話,財神話.....」
夾雜的DJ說話, 和不時空來一首的賀年歌曲, 原來播出的音樂是收電台收返來的
不過這也無損我們聽歌的興致, 可以嘆住冷氣, 坐係到乖乖聽歌的享受, 實在太奢侈了
我一路聽, 一路覺得心情有啲複雜,唔慣
無端端可以接觸返這些現代文明的產物, 令我有種脫節但又懷念既感覺, 好矛盾...
不過,還是先享受這些吧
一時鄧麗君, 一時張學友, 喜氣洋洋, 歡樂年年, 仲時不時有一首杰倫彈出彈入.
我們則在長凳下一邊享受這時光,一邊玩著估歌仔
真的算是寫意
但這時,

李主任來了,
見到主任級人馬,我們自然不敢怠慢

立即起身

「Good afternoon sir 」
不過李主任都明白事理, 簡單揮了揮手就叫我地坐返低. 然後隨便叫了個J仔幫佢鬆一鬆肩
時間繼續過, 電台繼續播
李主任似乎覺得悶, 行了過來, 想搵我們S傾計
「二年班以上果啲, 比我再認識下你地, 報多次比我聽, 報埋入左黎幾耐.」
「Yes sir !」

突然如來的要求, 雖有些愕然, 不過都難不倒我地
但由於佢係主任級別既阿sir, 心裡不免有些緊張
藍牌和黃牌組成的隊伍,開始向李主任逼近,頭位的人開始報了
不過出乎意料既係, 李主任真係聽了聽就算,
而且佢講既說話, 令我發現原來李主任真係有記住我地全部人既存在.

「哦? 三個月啦已經, 有無食檸檬啊.」
「三年班就出冊了wor, 你衰既野諗通左未啊?」
想不到, 平時高高在上的李主任, 都會這樣,放我們在心上
不過我一直都對李主任有好感
因為我曾經收到一份來自佢既鼓勵
記得我新人組有一次, 朝早上紅sir既PE堂,
那時我逼住自己做那些我根本做不來的動作
做到抬腿既時候, 抬腿既辛苦扭曲了我既身軀, 我憋紅了嘴面,拼命地想將腳扯上半空
但突然, 在場的李主任叫停了阿峰的打數
「全部停低!」

李主任打斷了體育堂既進行, 開始訓話
佢先指住了那邊動作閪到仆街既莊逆天,表情嚴肅
「莊逆天你到底有無心操嫁 ! 你睇下你 ! 入左黎成個月都仲做唔到標準既抬腿, 點點當當, 比啲心機啦 ! 」

李主任當住大棚,狠狠地對住莊逆天怒斥.
我則處於震驚,因為李主任年邁但充滿威嚴既聲音, 沉而有力,字字鏗鏘. 句句都可以講到你入心
所以這番沉重的訓話, 真係會屌到人上心頭.
但之後更加吃驚的是, 李主任突然間指向了我
我既心立即七上八落 , 發生咩事 ! ?
「仲有啊, 大家都要學下呢個肥仔,呢個新人組既肥仔, 佢雖然做唔到所有既動作,但佢既態度係全場最好既果個, 睇下佢流既汗, 紅撚曬既面, 佢下下都盡力做,  咁你呢? 莊逆天!?」
「Sorry sir ...」莊逆天低頭回應.
而我則繼續震驚, 是我的努力,引來了李主任的讚賞嗎?
真的嗎?
「喂大文 !  你過去新人到show下你既肚腩」李主任點出了一人
「Yes sir !」

應完,

那個叫大文的三年班跑了過來, 卷起上衣,露出了.....有少少腹肌紋理既腹部
「大文岩岩入黎果陣,都同你差唔多一樣, 都係咁肥嫁, 但你宜家睇下, 佢瘦左幾多, 條車胎差唔多無曬咁濟,  所以你記住比心機啊蔡衡,  晚晚堅持落去, 好似宜家咁盡力做, 就減到肥嫁啦.其他人聽唔聽到啊!?」

「Yes sir !」

在場的全部學童,給予了回應, 我突然變了一個模範, 有種奇怪既榮耀感在心中出現
明明,我係最唔掂既果個,但這刻, 我卻是最叻的那個
那天李主任充滿力量既鼓勵話語,真的給予了莫大的鼓舞給我
那時的我,真的好開心
好開心自己的努力,有人認同,讚賞
好開心那天的PE堂, 收到了一份難得既鼓勵
甚至那份鼓勵, 都有讓我堅持到宜家

「下一個, 到你報啦蔡衡.」

李主任對住我微笑了下,佢低沉有力的聲線,呼喚著我
「Yes sir !」

我神氣地收腹,挺起胸膛,向前走去
「good afternoon sir 同sir報 我學童S.....進入沙咀勞教中心已經有二個月三星期, good afternoon sir Thank you sir !」
「咦? 差唔多升三年班了wor」
「Yes sir !」

我回答道
「減肥減成點啊?」

李sir問
「呃..同sir報...進度良好...」

我有些心虛地回答道
「下? 肥仔你話你進度良好? 」

另一把帶著威嚴和玩味的聲音傳來
慘了,被戈sir聽到了
「仲未減到咩?」

李sir問
「同sir報唔係啊...差少少, 差少少」

我連忙補鑊到
「差你個頭啊差, 你乸高件衫比李主任佢睇下先啦」
戈sir走了過來,說道
「Yes..Yes sir..」

屌...好耐無再黎呢套了.
我乸高件衫比李主任檢視我既進度
「哇, 仲有一截未減曬wor條車胎 ...」

李sir說
「聽到未啊,肥~仔~!」

說罷戈sir一下將手擺落我條車胎啊
啊.
不妙

「啊唔係啊戈sir !哇哇哇!Sorry sir.哇哇哇哇好痛啊.. 哇哇」

我肚腩既肉立即傳來赤痛,屌真係好耐無被揸過車胎了
久違既痛感,讓我吃痛大嗌
「咁你應該對李主任講啲咩啊宜家?」

戈sir笑笑口問道

但絲毫沒有放鬆手上力度
「哇哇! 啊.! 同sir報 我學童一定會加倍努力啊啊! 啊!」
擾攘一番後
我坐返埋位苦笑
哈哈...
我揉著肚上被捏紅的皮膚看來我的革命尚未成功呢
繼續hea下hea下
下午的時間有五個小時,但總不能五個小時都在體育館坐同hea吧?

於是右班阿sir們又宣佈了一個振奮人心的活動
「嗶 -------------!」

紅sir口中既口哨發出嗶聲  
隨即, 一個被踢出的八角菱形黑白球體在草地上滾動著
追住波跑既阿sir同學童
綠油油的草地,
無錯,
有得踢波喇 ! !

「嗶 -------------!」

又一聲哨聲, 開波 !