[悲情甜故] 孤雛淚 (完): 第五章

呢幾年, 穩定嘅工作令我都叫做儲到啲錢, 一次偶然響報紙上睇到一則公司招頂廣告, 已經平復多年創業嘅心, 突然之間, 又試響心底入面再度湧現番出黎。 

同麗芳商量過後, 麗芳似乎唔係咁贊成我去咁做, 更甚仲將擺響心底入面多時嘅說話都講埋出黎, 「志宏, 不如算啦, 唉, 唔怕坦白咁同你講, 你根本就唔係做生意嘅材料黎嘅, 你仲記唔記得你講過響五年之前, 你同人夾份做生意做野果陣時啲苦況同經歷呀? 志宏, 不如唔好再考慮啦, 你就繼續好似而家咁, 正正經經, 安安定定咁去做番呢份政府工咪仲好!」

我唔服氣, 以前只係因為同左一個奸人夾份, 所以果陣時先至會攪成咁樣, 但今次, 我就無打算再同人夾份去做, 我要間公司所有嘅野, 都係由我自己全權咁去話哂事。 

就由呢日開始, 麗芳就成日都係為左我呢件事，而經常同我發生唔少嘅拗撬。

一句我唔係做生意嘅材料, 就更激發我立志要去証明比其他人睇, 我聯絡左登呢段招頂廣告嘅老闆, 約過幾次見面, 理解過所有嘅細節, 計過條數, 我覺得應該係有得去做嘅, 唔理麗芳嘅反對, 我決意辭退福利官嘅工作, 立心就要向外再闖另一番嘅事業。 
 


終於, 我辭退左福利官嘅工作, 再跟住就真係頂左呢間公司黎開始我嘅另一番事業, 好快地, 三年過後, 經我一番破斧沉舟嘅努力, 呢間公司亦總算比我做到都叫係有啲小成, 但最可惜嘅, 就係我同麗芳亦因為呢間公司嘅事, 最終都係攪到意見不合, 而最後大家仲要分手收場。

呢日晚上, 供應商嘅貨物遲遲都仲未送黎, 伙記又已經準時收哂工, 我唯自己留響公司度等啲貨物送黎, 已經成九點幾, 貨物終於都等到送黎, 工人正將車上啲貨物搬緊落地, 「唔該幫我將全部啲貨搬去舖頭入面個倉度吖!」 

搬貨工人正好心急咁同我講, 「喂老細, 真係唔好意思, 今日全世界都遲哂, 而且我地仲有成半車貨要趕住去送, 其他公司啲老細都咋緊我地型, 所以, 呢次我地真係無時間咁幫老細你搬入去嘞!」 我未及發火, 工人已經跳番上車度咁好快就開車絕塵而去。

望住地上呢一大堆貨物, 我開始自言自語咁發住晦氣, 唉, 一個人搬似乎無個幾鐘頭都搬唔哂入個倉度, 呢次慘嘞, 仲未食飯添架, 但又唔可以就咁擺哂啲貨響街邊呢度, 都仲係快啲郁手開工好過, 如果唔係, 到今晚十二點都唔知搬唔搬得哂入去添架。

已經搬左成個鐘頭, 又攰又餓嘅感覺已經攪到我想死咁滯, 仲有一半貨倒未搬哂, 我繼續咬住牙關咁頂硬而上, 就響呢個時候, 路邊好似有個人正企左響度望住我呢個方向, 係一個著住長裙仲生幾靚嘅長髮後生女仔, 個女仔係咁望住我, 而我又覺得佢好似好面善咁, 但就硬係諗唔起佢會係邊個。



「張生…」 哦, 個女仔響度叫緊我喎, 「妳係…」 「張生, 咩原來真係你黎呀, 黎, 等我幫你一齊將呢度啲貨搬哂入去吖!」 講完, 個靚女居然真係走黎搬住我啲貨入去我舖頭度, 我仲呆左咁企度, 「張生, 做咩仲停哂手呀, 我係美惠呀, 仲唔快啲郁手一齊幫手搬哂入去!」

係美惠? 佢真係美惠, 已經無見美惠三年倒, 估唔到佢個樣而家居然變得成熟左唔少咁, 而且, 真係可以講係愈大仲愈靚女添, 我地兩個開始夾手夾腳, 好快, 其餘所有嘅貨物都已經搬哂入去個倉度。


得人恩果千年記, 有緣千里能相會, 街角重遇, 已平靜多時的湖水又再泛起絲絲的漣漪