我已經餓到想死, 我嗱嗱林拉埋度閘, 跟住美惠話要陪我一齊行去食飯, 我地去左附近街頭嘅麵檔度食麵, 我二話不說就已經狼吞左兩碗麵, 而美惠就只係微笑住咁坐響我對面凝望住我。

終於飽肚嘞, 我開始問住美惠, 「無見咁耐, 真係差啲就唔認得妳咁滯, 係呢, 點解無端端妳會響呢度出現嘅?」 原來美惠啱啱同啲同事一齊去睇完戲, 咁啱成班人經過呢度, 突然見到我覺得有啲面善, 但就估唔到呢個響街度搬緊貨嘅人, 居然真係就會係我。

「係呢, 子健佢幾好吖嗎?」 我關心咁問住, 「幾好呀, 尋日佢仲參加左學校嘅遊學團去左外地, 今年佢都中學畢業囉, 係呢, 你同麗芳姐姐都幾好嗎?」 我苦笑住咁搖住頭, 跟住我地就接住互相講左響呢三年嘅近況出黎。

美惠原來都已經出黎社會度做事, 而家係響中環度番緊寫字樓工, 我笑佢而家生得咁靚, 一定係有大把男仔想追佢架啦, 美惠聽到之後, 就搖住頭咁做左一個奇怪嘅苦笑。 

好嘞, 都要埋單走人嘞, 突然, 美惠一個箭步咁就跑左過去幫我比錢, 我話比番錢佢, 美惠搖住頭講, 「唔使嘞, 張生以前成日都咁幫我地兩姊弟, 而家我總算可以有機會第一次請番張生食野, 應該係我開心至啱!」 既然佢都咁講到, 咁我亦都唔再勉強佢嘞。





美惠仲係住緊以前果間屋村單位度, 我揸住公司部客貨車車佢番去屋企, 好快, 已經到左佢屋企嘅樓下, 「到嘞, 咦, 呢度四圍都好似無咩點變到咁, 呀係呢, 有時間嘅, 妳咪得閒就搵吓我出去食飯囉, 我個電話都無改到架!」 

我正想同美惠講拜拜嘅時候, 美惠就有啲唔係好自然咁同我講, 「張生...不如...可以嘅話, 而家就上黎我屋企度坐一陣先走啦….!」 哦, 咁…都可以嘅, 況且美惠嘅屋企我又係咁熟, 咁我唯有先將部車泊好之後, 然後就同美惠一齊上去佢嘅屋企度坐吓咁啦。

入左屋後, 除左比起以前更為整潔之外, 其餘嘅感覺就一切依舊, 美惠斟左杯水比我, 我飲住水, 咦, 我好似望到啲咩咁喎, 電視機旁正有兩個精緻嘅相架響度。

相架內嘅相, 正係我地三年前響河堤之處影果啲相, 一張係我地三個人嘅合照, 另一張就係美惠撓住我手臂嘅合照, 而響相架旁邊, 美惠仲放住當日我送比佢嘅音樂盒響度。

我打開個音樂盒, 一陣悅耳清脆嘅音樂正響住起黎, 我望住呢張合照, 「估不到咁快就過左三年囉!」





我正想坐番埋櫈嘅時候, 美惠唔知幾時已經企左響我嘅後面, 我一轉身, 美惠突然就將我緊抱住, 我呆左一呆, 美惠伏在我懷內咪埋左對眼, 比佢抱左一陣, 我拍拍佢嘅膊頭, 「美惠, 美惠, 可以放開手嘞!」 美惠不斷係咁搖住頭, 我無奈咁同佢一齊繼續企響度。

我已經唔再係美惠佢地嘅福利官, 呢一刻, 懷中嘅美惠的而且確係變得幾咁美艷動人同吸引, 而我亦開始忍唔住, 雙手亦緩緩咁將佢抱番住, 呢個時候, 美惠突然抬頭咁凝望住我, 跟住就好快咁襟實我後尾枕黎深深咁錫住我個咀。 


情不自禁, 久埋心內的傾慕經已一發不可收拾