［童叟無欺，真正短篇］香港都市傳說：判若「兩」人（實體書已登陸各大店鋪，希望大家多多支持）: （二）美女

「喂，Stephen，走啦，聽朝仲要開會。」
「哦，好呀，噉走啦。等我埋單啦！五六七，咦，七個？我哋明明得六個咋喎？」
「可能有人早走呢。」
「嗯，應該都係。好，走啦，聽朝返工見啦！」
 
阿信的同事，直到離開酒吧也沒有想起那第七位同事就是阿信。
當阿信從洗手間出來時，發現其他人已經離去。
他臉上沒有任何表情，或許，他已經習慣了別人這樣對待他吧。
 
但習慣了不等於不會不開心，所以他留了下來一個人喝酒。




喝得半醉的他，開始一個人自言自語著，但即使這樣，還是引不起別人的注意。
 
「點解……點解我咁努力，都……都無回報。返學係噉、搞活動係噉、畫畫係噉、就連返工都係噉。點解……點解無人肯注意我……點解呀……」
 
就在他自言自語期間，一位身材高挑，身穿紅色連身裙，身體散發出一陣清新幽香的美女在他身旁坐下。
 
阿信沒有理會她，因為他知道，這美女只會跟其他人一樣，不會知道他的存在。
 
「咁多年入面，我學呢樣學嗰樣，參加比賽、參加活動，我都係想得有人關心……但點解，點解個天要噉樣玩我！無論我幾努力，我都好似路人噉，無人留意無人理！點解……」
 




就在他發酒瘋的同時，那美女把一杯雞尾酒推到他面前。
「得你一個人咋？」
 
阿信聽到這句說話，他疑惑地抬起了頭，看了看這美女一眼。
 
然後看了看四周，確定身旁沒有其他人後，才用手指指著自己。
「你……你同我講嘢呀？」
 
「嘻嘻，你都幾搞笑喎，我眼前得你一個，梗係同你講嘢啦。咁你可以答我問題未？」美女甜美地笑了一下。
 




「哈哈，唔好意思，平時無人會好似你噉留意到我，所以我先唔識畀反應。係呀，我一個人咋。」阿信尷尬地笑了笑。
 
「點解你會一個人喺度飲酒嘅？」美女的眼神好像有魔力似的，令阿信不自覺繼續說下去。
 
「原本我同同事嚟飲酒嘅，佢哋走嗰陣應該無注意到我……唉，其實都唔係第一次發生㗎啦。返學係噉、比賽係噉、返工又係噉。靚女，我講樣好笑嘢你知呀，早兩日我去搵個舊客，個客我跟咗佢七年㗎，你知唔知佢見到我嗰陣第一句講咩呀？佢話：『你好，我叫Keith，第一次見面。』，食屎啦，七年！係七年呀！咁都唔認得我！」醉醺醺的阿信把積壓已久的心底話說了出來。
 
美女放下了酒杯，柔聲地說。
「咁都幾好呀，有時太過引人注意都唔係咩好事嚟，至少你依家可以自由自在噉生活。」
 
「哈，靚女你唔會明㗎啦，你咁靚，肯定吸引到好多人注意你。但係我由細到大，無論幾努力，就連我得獎嗰陣，都無咩人會留意到我！我都好想有人注意我，關心我！」阿信用盡全身的力氣放下酒杯，發出了很大的聲響，但不知道是否酒吧太嘈雜的緣固，還是其他原因，四周的人連看都沒有看他一眼。
 
「你……好想有人注意咩？」美女幽幽地看著阿信。
 
「有邊個會唔想？有邊個會唔想？」
 




「既然你咁想，如果我話，我可以幫到你變得引人注目，不過代價係你會變到再唔係你自己，你仲會唔會想改變？」
 
「做自己無人理，我寧願做個唔係自己但有人注意嘅人啦。」
 
阿信說到這裡，再也不勝酒力，醉倒在酒吧裡。
 
「既然你咁想有人留意你、關心你，就等我幫下你啦。希望你到時唔好後悔啦，嘻嘻！」
那美女撫摸了阿信的臉一下，然後就消失了。