［童叟無欺，真正短篇］香港都市傳說：判若「兩」人（實體書已登陸各大店鋪，希望大家多多支持）: （八）代價

「點呀，新嘅生活係咪好開心呀？」美女那甜美的聲音響起，但傳進阿信耳內，卻比較像是死神的話語。
 
「你……你……你點解要噉對我？」阿信激動地說。
 
「我點對你呀？我幫你實現你嘅願望咋喎。」
 
「唔係，我唔想消失，我唔想消失呀！」
 
「我一早已經問咗你，係咪願意付出任何代價，都想要改變，呢個係你親口講，我無逼你㗎。」
 




「我……我唔要改變啦！我淨係想做返自己，你幫我變返以前噉啦！張卡紙我畀返你。」阿信把紅色卡紙遞到美女面前，但美女卻只是投以輕蔑的眼神，沒有接過卡紙。
 
「你會唔會太過天真？係你話要改變，我幫咗你之後，你一個唔該就話唔想，想變返以前噉？哈哈哈哈，呢個世界所有嘢都要代價㗎！」
 
「代價？你……你要啲咩？我咩都應承你！我咩都應承你！我唔想消失……我唔想消失呀……」阿信跪在美女面前，眼裡流出熱淚，那是後悔的淚水。
 
「哼！你連自己嘅靈魂都唔要，乜你以為你仲有嘢可以付出咩？」美女不肖地說。
 
「我……我……如果我唔駛消失，我之後得到嘅嘢，錢又好，名譽又好，健康又好，咩都好啦，我都會分畀你！我……我唔想消失，我唔會再半途而廢。求下你……求下你……」
 




美女看到阿信這個樣子，並沒有任何的感覺，因為她已看過太多這種只會在失去所有，才會假裝悔改的嘴臉。
 
突然，美女好像想到了甚麼似的，她低下頭看著阿信，臉上露出了一個狡猾的笑容。
 
「你真係咁唔想死？」
 
「係……係呀，我唔想消失！我唔想離開呢個世界！我仲有好多嘢想做，仲有好多嘢想同重視我嘅人去講！求下你放過我。」阿信聽到美女態度似有轉變，馬上緊抓著美女，希望她能給予一個機會。
 
「放過你唔係唔得，不過，我之前都有講過，任何事都要有代價！你會唔會消失，就取決於你願唔願意付出呢個代價啦。」
 




「我明！我明！」
 
「個代價其實好簡單，就係由其他人代替你消失，噉你就可以擺脫消失嘅命運啦。」美女把臉靠近阿信的耳邊，每一個字都充滿著不可抗拒的魔力。
 
「其……其他人代替我？」阿信聽到後，眼神顯得有點動搖，他……真的可以犧牲他人，用來換取自己的自由嗎？
 
「無錯，好簡單嘅一個決定，你唔想消失，就等其他人代替你。不過，呢啲工序好繁複，所以，我哋需要三個人去代替你。」
 
「三……三個？」阿信沉默了，用三個人的消失，去換回自己的存在，這樣……會唔會太過自私了。
 
「其實你唔駛諗得咁辛苦喎，雖然話用三個人去代替你，但係嗰三個人唔係死咗，只係會有另一個更好嘅佢哋，取代咗原本嘅佢哋。咁樣嘅話，對呢個世界唔係會更好咩？」美女的說話彷彿有魔力似的，阿信差點衝口而出要答應，可是，僅餘的人性告訴他這不是一件正確的事情。
 
而且，在這段期間，他由受到重視，再經歷被「另一個自己」取代的痛楚，他深深明白，這絕不是美女口中說得這樣美好。
 
至少，對被取替的三人來說，這一定是非常難受的。