自從住咗hall先知，扑野原來可以咁簡單: 《十、404 not found 》10.8
兩日後，我考哂試，阿信都考哂試。
我知道佢應該執哂野返屋企，我以後都唔會再見到呢個人。
雖然學校唔係好大，都有機會再撞到，但比起住hall，機會一定微好多。
我都係時候要放低啦。
我返返下工收到個whatsapp，居然係阿信：「今晚有無牌打？」
「你唔係quit咗hall啦咩？」我好開心，佢原來仲係hall。
「我聽日先走呀。」
之後我搵咗兩隻腳，個晚我地係hall打咗最後一次牌。
「係呢，未同過你打牌喎，你叫咩名呀？」牌腳A問阿信。
「我叫阿信，不過都唔重要啦，我聽日都quit hall囉。」
講完呢句之後，大家都靜咗落黎，牌腳A鳩笑咗兩下就帶過咗個奇怪既氣氛。
「我聽日都quit hall囉。」呢句說話係我個腦到不停重複。
我諗返起第一次見佢，佢副眼鏡仲滴緊水個狼狽樣；
諗返起第一次見佢，佢同我地講佢叫阿信既樣；
諗返起第一次見佢，我地成日撞褲然後望住大家笑個樣；
諗返起第一次同佢係床，佢話好鍾意我個樣；
好多好多第一次，但係咁快已經係最後一次。
真係最後一次喇。
我地打完四圈，佢話要睇波，留咗係common到無走。
牌腳A、B走咗，得返我同佢係到。
「你今晚過唔過黎訓？」佢問我。
「訓囉。」
個晚佢仍舊訓係阿軒張床到，我就訓係佢張床到。
「你陪我訓好無？」 我從來無開口要求過佢陪我訓，但係今晚我真係好想佢訓我隔離。
「唔得。」佢答完就背住咗我，面向住佢個邊既牆。
「都最後一次啦，黎啦。」
「除非你話我聽點解你個胸大咗咁多，我咪同你訓囉。」佢擰轉個身過黎，笑淫淫咁同我講。
「屌你啦，咁我自己訓囉。」今次到我背住佢，我好想喊，點解連最後一次都唔肯比我訓係佢隔離。
「又嬲，你真係好小器。」
講完呢句之後，佢無啦啦一野彈咗上黎我訓緊張床到，之後係我身後好大力咁攬住我，仲用對腳夾實我個身。「訓啦戇鳩，又話攰。」
之後我地好平淡咁扑咗最後一次野，今次一啲都唔激烈，佢都唔係好投入，好似純粹係一件例行公事咁。
完事既時候個天開始光，我好似第一次係呢間房望住個日出。
我地兩個無攬住訓，因為佢又過返去阿軒張床到訓。
係呀，連最後一次佢都選擇自己一個訓。
我冷笑咗一下，我已經唔知可以講咩，我都唔想再求佢陪我訓。
太低賤喇。
去到第二日醒，我同佢講咗聲返自己房訓，我就走咗。
我唔敢係到留太耐。
我驚我唔捨得。
我個腦諗返呢半年既所有所有情節：
唔知佢琴晚係咪特登話比我聽今日quit hall，比個機會我係佢到訓；
又問我有無牌打，好似做哂全部我地之前會做既野咁。
雖然我無親口同佢講過，但係我諗佢一定知我鍾意佢。
但我對佢係愛，佢對我只係得性，兩樣野根本唔平衝，所以我地無辦法一齊。
呢個係我地既結局。
呢段關係已經無咩遺憾，要做既已經做哂，我仲偷多咗一晚。
多謝你阿信，你真係教識咗我一課。
成個sem啦，今次真係要放低。
「你一陣幾點check out？」我諗起同佢一張相都無，我想同佢影返張相，當係留個最後既紀念比自己。
結果佢無應過我，直到而家呢一刻。
我知道佢唔會睇唔到。
只係佢唔想應我。
－－－－－
去到quit hall period既最後一日，我同晴晴Kenny食完野返到hall，係lobby見到阿軒坐咗係到。
「喂你未走咩，又話前幾日就搬哂啲野走既。」Kenny問阿軒。
「我地今日先真係走呀，喂阿信！」
阿軒答完之後望住lift個邊既方向，我見到阿信拖住個喼行出黎。
原來佢今日先真係搬走。
佢去到最後都無同我講真話，連幾時quit hall都要講大話呃我。
我地兩個好似唔識大家咁，佢無同我say hi，只係同晴晴佢地點咗個頭就走咗。
因為約咗中學同學食飯，我返房換咗套出街衫，之後再落返去。
可能因為係quit hall period既最後一日，架lift好滿，十樓既言仔、一樓既Chris同Chloe、三樓既阿宜都係到，好似愛回家咁，去到結尾大家都會出現哂，差在未BBQ咁解。
架lift係七樓開咗，又係阿信，但佢無入黎。
「你地落去先，我等阿軒。」佢望住我地全部人講，之後架lift就閂埋咗。
我落到樓下點起咗枝煙。
都唔知話個天係咪玩我，點解要比我再見到佢。
我寧願上次係最後一次見，都唔想好似而家咁樣再見面。
呢種「最熟悉的陌生人」既感覺好難受，我啲眼淚就黎湧出黎。
我行咗落去巴士站等車，呢個時候我第三次見到阿信。
佢無望我，只係一路望緊佢部電話。
阿軒見到我，同我講咗聲byebye。
「byebye」我趁阿信行過我身邊，我拍一拍佢同佢講。
「byebye」佢由此至終都無望過黎，講呢句既時候已經背住咗我向前行緊。
我望住佢個背影係心裡面講咗句「再見」，我就頭也不回上咗巴士。
佢既hall life咁就完咗，我地都就咁就完咗。