「恭喜哂喎,終於拍拖。而家唔洗成日痴住我啦!」個日我地係房邊隊啤邊吹水,Sophia話我知佢同隔離department個男仔一齊。

「拿,我同咗阿謙講我同你好friend,佢唔會有啲咩架,所以我都會照痴你架喎,放心!」佢好燦爛咁笑,之後show咗張合照俾我睇:「點呀,得唔得先。」

相入面係佢地兩個人嘅大頭照:個男仔戴住圓形復古幼框眼鏡,白色裇衫;然後Sophia笑得好甜咁挨係佢膊頭上面。

「掂喇,文青仔仔喎。」我俾返部電話佢。

「我地係個workshop到識架,估唔到佢男人老狗會自己走去整皮革。」佢手舞足蹈咁講佢地嘅相識經過比我聽,睇得出佢好開心。



自從Sophia拍拖開始,佢就少咗搵我。
不過我都唔覺得奇怪,話哂熱戀期緊,正常都會痴男朋友多啲,唔通痴第二條仔咩,仲奇怪喇。

Sophia:15:31 今晚食飯?

係佢地拍咗個幾月之後,Sophia約我食飯。

「咩風吹你嚟呀,唔洗瘟仔咩。」我習慣一定要揶揄下佢先安樂,所以一見面就拮咗佢兩句。

「屌,講到我咁重色輕友,我拍咗拖唔可以搵你嘅!」Sophia向住我舉咗下中指,然後話:「阿謙呢排忙呀,我地無得成日見。」



阿謙,即係Sophia男朋友好似有上莊,應該要忙住搞唔同嘅活動,分分鐘仲忙過final year嘅Sophia。

「哦,即係搵我攝時間喇撚樣?」我故作生氣咁講。

「唔係囉,咁我都可以搵其他人架嘛,搵你即係重視你喇,係咪呀。」佢好似驚我真係會嬲咁,猛咁係到解釋。

「係喇,知喇知喇。」我擺一擺手,問佢:「你條仔無詐你型咩同我食飯?」

「都話知我同你friend底,無嘢囉。」



「唔係呀,我係驚我太靚仔,佢怕自己比下去咋。」我撥一撥其實已經gel起咗嘅頭髮。

「屌,你食屎啦。」佢打咗我一下,然後我地就嗌嘢食。

雖然我地之間從來都唔會係好聲好氣個種態度,但我又幾享受呢種打打鬧鬧嘅相處模式。

起碼我可以對佢做返自己。

又過咗一段日子,間唔中我都有同Sophia食下飯飲下嘢咁。

有次,收到佢電話。

「喂點呀Sophia。」我一接就講。



「喂....」Sophia把聲震哂咁。

「喂,做咩事呀?」我見勢色唔對路就即刻正經地問。

「你...你係邊呀...」佢好哽咽咁講,話裡間仲聽到斷斷續續嘅索鼻聲。

「我係hall呀,發生咩事呀,你無野呀嘛?」

「我嚟搵你得唔得呀…」

隔咗唔洗半個鐘,佢whatsapp我話已經到咗我樓下,叫我落去接佢。

一見到佢就好明顯見到佢喊過嚟:雙眼浮腫,眼白入面有好多紅筋;而個鼻都紅哂,望落好似好憔悴咁。

我地返咗上房,之後佢緩緩地講:「琴晚呢,阿謙話要分手。」



「吓?點解呀?你地唔係好地地架咩。」

「我地琴晚嗌交,之後佢就話覺得我地性格唔係好夾,不如分開算。」

然後佢一五一十講哂成件事嘅經過比我聽。

聽完之後我只係覺得,Sophia根本同呢個男仔唔夾,無論係感情觀定性格上。

係我眼中我唔覺得佢地會行得長,就算唔分手都好。

「咁你仲想唔想同返佢一齊?」我好認真咁問佢。

「我唔知呀,我仲鍾意佢,不過我自己都覺得同佢唔係話好夾。」佢嘆咗口氣:「不過我諗佢唔會搵我架喇,佢都講到咁。」



因為個晚我roommate好夜先返,所以Sophia留到好晏先走,我陪佢呢個夜晚就係不停咁討論佢同阿謙之間嘅感情、講咗好多佢無講過嘅事比我聽。

呢晚之後我覺得我又了解Sophia多咗。

---------------

好多野有咗第一次就會有第二次。


自從我聽完Sophia講佢同阿謙之間嘅事,以後事無大小,但凡係佢地有咩爭執或者阿謙講咗任何令到Sophia好不解、不滿嘅說話,佢都會即刻話我知,通常都會附上對話圖。

係呀,佢地無分到手。

而阿謙做嘅野好多時都係挑戰緊Sophia嘅底線,例如係比Sophia見到佢同女莊員講咗啲無咩避忌、甚至乎我都覺得有少少flirty成份嘅說話。

「屌,正常一個男仔有女朋友,都唔會咁樣對其他女仔咁樣講野掛。」佢好嬲咁講。



「係嘅,無避忌又無避嫌,仲要比你見到。」我唯有咁講。

「好失望。我失望一次,失望兩次、三次、四次,但唔知去到第幾次我就唔會再失望。」

「失望太多次就會超過容忍上限。」我講。

「到時我會直接分手,唔會再畀機會。」佢呼咗一口氣,望住前方。

「有時唔係話幾愛對方就有幾長久,有啲人真係要相處過先知夾唔夾。」我停咗陣,望住佢講:「你地一齊唔係好耐都咁多磨擦,證明佢未必適合你。」

「不過都要睇下佢有無改進先嘅。」我補返一句。

寧教人打仔莫教人分妻,我都係唔好參與咁多人地嘅感情事好啲。

始終有啲野得佢地兩個自己先最清楚,所以我唔想左右太多Sophia嘅決定同諗法。

「始終都係你最明白我。」Sophia總係咁樣講。

佢地之間嘅離合仲要唔只一次。

Sophia: 01:52 今次真係分咗。
Sophia: 01:52 傳來一張圖片
Sophia: 01:52 傳來一張圖片
Sophia: 01:53 傳來一張圖片
Sophia: 01:53 傳來一張圖片


呢次嘅對話內容大概就係Sophia話阿謙唔重視佢,質疑阿謙愛唔愛佢;然後阿謙就話唔想再繼續,覺得性格無得改變,分手會係個好啲嘅選擇,然後係一篇千字文。

以男人嘅角度,其實阿謙講到咁樣,鍾意極Sophia都有個譜。

至少如果我好愛我女朋友我會試下同佢磨合,而唔係咁輕易話分就分。

我:01:55 分手都好嘅,長痛不如短痛喇。
我:01:55 既然都唔合適,一齊落去都無咩意思。


然後Sophia話佢同佢個friend飲酒,聽日再講。

我:02:01 sad還sad都唔好飲咁多,留返一絲清醒比自己喇,唔好做錯決定。


結果兩日後,佢地又一齊返。

我開始對佢地之間嘅離合變得習以為常。

感覺上係無論點都好,佢地始終都會一齊返。