新手作家的共鳴: 靈感 （反省篇）

    唐朝之時，有兩禪師，一名神秀，一名慧能。

    分別作為南北兩派之首，兩人都有不同的主張。神秀以一句‘身是菩提樹，心如明鏡臺。時時勤拂拭，勿使惹塵埃。’勸導世人要慢慢參透，才能夠真的得到開悟。

    慧能則以‘菩提本無樹，明鏡亦非臺，本來無一物，何以惹塵埃。’提出他對神秀那種‘漸悟’主張的反對，以及提出頓悟才是能夠得到智慧的正途……

    食屎啦！頓悟？頓到先講啦！

    如果大家唔系創意爆燈既話，應該都會經歷過一個非常大獲既劇情：‘冇！靈！感！’





    或者更極端既劇情：前個幾日電腦出問題定唔知點總之就出唔到文既時候，靈感好似上帝攪肚咁不停響腦入面浮現，但係當你能夠打文既時候居然好似上帝便秘咁，點都嘔唔出。

    系好大獲架！

    小則心情煩躁，重則比人吊翻三十幾四十次唔系夢。

    腦細，諗一下，本來乜都諗唔到已經系煩架啦，宜家仲要比人吊，梗系心情再煩啲，跟住咪再咩都諗唔到，惡性循環。

    好似宜家，基本上我可以同你講由五點幾已經藕響電腦面前，然後首歌都loop左唔知幾多次但係又嘔唔出一粒字。





    最最最最最好笑既系，唔知點解當你系完全腦袋空空既時候系特別容易去諗第二啲野。

    由婆媳關係到瑪雅末日，由FNAF去到call of duty，真係咩都可以諗。

    再慘啲，就係變得語無倫次，姐系根本你都唔理到底你宜家講既野有冇同之前講既野矛盾，唔理自己講既野係咪合符邏輯同埋通唔通順，只系一心諗住快啲搞掂了左一個心事就算。

    最好笑既系，通常如果你越舒服，基本上你腦便秘既情況系越大獲，但係過度趕既時候，腦便秘又好似方死你唔會過勞致死咁不停炮轟你。

    聽講日本有一啲暢銷漫畫家系想要拖稿就可以拖稿，某程度上我係非常羨慕。





    但係諗深一層，如果我地能夠做到咁既情況，就應該唔會滿肚怨氣咁，成個行尸走肉一樣，不停為同一個目標前進。

    唔系咩？邊個唔想坐響度就有錢攞？不勞而獲邊個唔想先，但係有邊個想人地不勞而獲？

    大家都應該經歷過學生時代，終會有一啲時候系要進行一啲美名為‘專題演習’既功課，實際上大家心裡有數，只系老師為左一啲同佢地friend既同學，特登為佢地設立既一個為佢地增加平時分，增加優點既團體功課。

    如果真係要做依啲野，一定要觸及既一樣恐怖野叫做free rider。

    引用依個google translate（大家都知道唔準既野）對free rider一詞既解釋，系‘搭便車’既意思。

    可想而知，依種生物既存在就係根本靠你地既努力去癡餐。

    但係通常依種free rider既下場？基本上就係想食兩家茶飯，但係兩頭唔到岸。

    一方面老師對於佢依種蛀蟲行為而感到不滿，心入面一定系盤算緊點樣疏遠佢；同學方面仲GG，唔想瀨野，就快快脆疏遠佢，得閒就踩佢兩腳，總之就係不得好死。





    如果你果組系有一啲咁既人，相信你都會想攞住一個巫毒娃娃然後快啲詛咒佢死啦？

    同樣道理，知道如果想要獲得成績，首要任務除左有人緣（但係大家知道其實從頭到尾都係一場騙局）之外最少，你要有心。

    冇錯！從頭到尾我既依篇文章貫徹始終都係發洩對世界‘人緣大於實力’既依樣奇怪情況。但係當我地不停咁怪責外界對自己既不重視同埋用佢地各種手段阻止夢想既行進同時，有冇諗過自己有冇真係用心去對待？

    我記得以前有一篇我已經刪除過既文章，曾經攞過杯麵黎比喻熱情：杯麵其實非常好食架，尤其系當你肚餓既時候，真係好似活佛一樣，而且味道濃郁，麵條如果經過一個好時間真係可以做到咬落去回彈一下然後斷開。但係同樣，授人以魚不如授人以漁。

    就算你真係買幾多個杯麵都好，終有一日會食完。

    杯麵真係好似熱情。

    當你對一件事情有興趣既時候，就好似三分鐘過左果一下，令到自己有一種‘我有一種好好既習慣’差唔多咁。





    但係其實參考翻1903年《美國心理學期刊》入面，對於習慣既描述為：‘以心理學的觀點來看，習慣是某種程度上固定的思考方式、意志或者感覺方式，是由以往重複的心智體驗而獲得的。’

    如果單靠熱情，你會發覺好快，自己既戰鬥力好似垂直下降咁，根本冇辦法做一個長期續航。

   利用翻打機既道理，如果MP唔能夠被回復，而對面既怪物唔能夠攻擊，失敗條件就係過左特定時間。

    宜家你有兩個選擇：普攻，技能。一旦選擇左，就唔能夠改變。

    無可否認，用技能的確能夠做到短時間內快速輸出，但係冇藍既時候，你只系一件垃圾。

    用普通攻擊既話，攻擊力的確唔算高，但係長遠而言，毫無消耗，能夠造成既傷害遠遠比起技能高。

    如果你系打算用熱情黎融化大眾對文學既隔膜，只能夠講，我相信你三個月內會放棄。

    如果想要將問題歸咎於人既時候你必須要先睇一下自己有冇一啲潛在既破綻。蘇軾《范增論》之中有一句，‘物必先腐也，而後蟲生之；人必先疑也，而後讒入之。’





    意思為物品必須先要自身腐敗，蒼蠅等等的蟲才會出現；人與人之間必須要先有疑心，才會有小人從中作梗。

    如果你自認自己真的有把這件事情當成切身的存在，你才有基本門券來斥責別人。

    冇錯，只系基本門券。

    有心無力，都會惹人詬病。

    你要真係有心去作文，然後有力去繼續，去研究自己同人地既差別，先能夠真正將問題聚焦到社會之中。

    共鳴，唔系只有一啲表象就能夠稱之為共鳴，只有雙方深層擁有同樣難處，先能夠稱為共鳴。

    若果有心，有力，其實人人都已經取得門票。只系，社會容許你入場定一早DQ，僅此而已。