又是在Star迫的時光。很享受這些時間,因為它們只屬於我一個人,不用愁如何跟別人分享,也不用煩怎樣與別人共處。
 
當然,他是例外的。在這世上,我就只願跟他共享每分每秒,分享每寸時光。尤其在今晚以後。
 
想到這裡,我的臉上無意間滲露出甜笑。這三年跟宏一起的日子確實過得幸福快樂。
 
突然間,一把女聲打斷了我的憧憬。
 
「Ashhhhley! 喂好耐無見喎真係!」一名跟我年齡相若的女子拿著咖啡靠近我所在的桌子旁。
 


「阿凌?!嘩,真係好耐無見喇...」原來是凌,就是宏第一眼看上、愛上、戀上、最後被她傷害的女人,簡單點就是宏的...前女友。
 
「個位有無人架?介唔介意坐低?」凌問道。
 
我示意可以坐下。
 
「坐丫,無人架。」
 
「唔阻住你啊可?」
 


「唔阻,我都係等緊我男朋友之嘛,佢今日有d野做,等佢搞掂之後夜晚一齊食飯。今日係我同佢一齊既第三年紀念日。」我客氣地說。
 
「嘩...真係Sweet。係呢,你男友係咪...阿宏?」他突然這樣問我。
 
「Em......係啊...係Facebook話你知架啦可?」
 
凌點頭。
 
「哈哈,無錯,科技之下真係無私隱...唔好介意。係呢,阿宏而家點啊?」
 


「佢ok 啊,啱啱轉左工,而家係稅務局度做。」
 
「咁好啊,佢一直都想入稅局,而家佢得償所願啦。講起上黎同阿宏分開左之後都無咩聯絡lu。」
 
氣氛開始有點奇怪。
 
其實我真心想她快點離去,我不想跟傷害宏的人有什麼交流,更不想繼續跟她討論一個被她傷害得體無完膚的人。
 
「EM...咁你呢?幾好丫嘛?」我轉換話題。
 
「都係咁啦。餓唔死咁啦。」
 
「咁好好啦~ 」我在敷衍著她,只想她快點知難而退。
 
這句回應之後,我們靜了數秒。


 
就在她正要開口說離開之際,我突然想起一個問題想要問凌。
 
「係呢,阿凌,其實我一直有個問題,唔知你介唔介紹答我。」
 
「咁認真?你試下問,我又試下答啦,我唔保證一定答到你架。」
 
「其實係咁既,當日點解你要同阿宏分手?」這是我一直想知,卻不敢問的問題。
 
「下?你認真...唔知架?」凌反問。
 
「係...不過你唔想講就算啦,我只係想了解多d阿宏,佢好似因為呢件事一直都有d芥蒂,就好似對愛情失去左信心咁。而且佢好似唔想多提呢件事,可能對佢黎講係一個幾大既打擊。」
 
接下來凌的反應讓我有點在意。
 


「喂喂,咪住先,你講咩啊?佢受打擊?」凌有點激動。
 
「係啊,我啱啱識佢果陣,佢咁啱同你分開無耐,個樣勁頹廢,仲成日借酒消愁。」我繼續說。
 
「雪瑩,你聽我講,我諗當中有好大既誤會。」凌說。
 
「誤會?」我腦海開始空白。
 
「係。」
 
凌拿起咖啡,喝了一口,然後繼續說。
 
「首先,你劈頭問我點解要同阿宏分手,呢個問題已經錯。你應該問阿宏點解要同我分手。第二,受打擊果個,需要借酒消愁果個,係我。」
 
「你意思係...」我不太明白凌所說的話。也許不是不明白,而是我不想去明白。


 
「當日,係阿宏主動同我講分手,難聽d講係佢飛左我。就係我以為佢會向我求婚果晚。」
 
「咩話?你講乜啊?邊有可能?!」我想像不到凌會這樣說。
 
「我無乜必要呃你,你亦都放心,我而家對阿宏無野架喇,可能仲要多謝佢當日既決定。」似乎凌已放下了宏。
 
「Sorry,我一時之間真係Load唔到。」我說。
 
「唔緊要啦,我諗詳細既野你問返阿宏啦,我唔方便講太多。Anyway,今日見返你最少令我明白一樣野。」
 
「係咩?」
 
凌動身站了起來,喝光她手中所剩無幾的咖啡。
 


「算啦,唔講喇,我諗都唔適宜繼續講落去。」凌看一看手錶,然後繼續說:「唔好意思,我約左我老公,夠鐘要走喇。」


此刻,我的心只餘下空白,伴隨著無限個問號。
 
(第九回完)